Rey Salomonman Saba nacionpa reinan watukusqanmanta
10
Tayta Diosrayku Salomon ancha reqsisqa kasqanmanta Saba nacionpa reinan uyariruspanmi hamurqa ancha sasa tapukuykunawan pruebananpaq.
2 Jerusalen llaqtamanmá hamurqa achka-achka serviqninkunawan kuska,
camellokunapim apamurqa miski asnaqkunata,
achka-achka qorita hinaspa alhaja rumikunata.
Salomonpa kasqanman chayaramuspanmi sonqonpi llapa ima piensasqanta nirqa.
3 Chaymi Salomonñataq niykarirqa lliw tapukuyninta,
ima tapukuyninpas manam puchurqachu mana contestasqaqa.
4 Saba nacionpa reinanmi qawaykurqa Salomonqa alli-allin yachayniyoq kasqanta,
qawaykurqataqmi templo rurachisqantapas,
5 mesanpi tukuy rikchaq mikuykunatapas,
palacionpi yanapaqninkunapa imaynam kawsasqankutapas,
sirvientenkunapa imaynam servisqantapas hinaspa imaynam pachakusqankutapas.
Qawaykurqataqmi reyman copa serviqkunatapas chaynataq Tayta Diospa templonpi animalkunata wañuchispa kañasqankutapas,
chaykunawan admirakuspanmi
6 reyta nirqa:
—Cheqapmi kasqa rurasqaykimanta hinaspa alli-allin yachayniyoq kasqaykimanta niwasqankuqa.
7 Niwasqankutaqa manam creerqanichu ñawiykunawan kunan rikuykunaykama,
manamiki partellantapas willawarqakuchu.
Yachaynikiwan tukuy imaykiqa uyarisqaymantapas aswanraqmi kasqa.
8 ¡Mayna kusisqam kachkan warmikikunaqa chaynataq ñawpaqnikipi tukuy tiempo yachayniki uyariq serviqnikikunaqa!
9 ¡Kuyasuspayki Israel nacionpi gobiernachisuqniki yupaychasqayki Tayta Diosyá alabasqa kachun!
Tayta Diosqa Israel nacionta wiña-wiñaypaq kuyasqanraykum rey kanaykipaq churasurqanki chaynapi derechonpi allinta arreglanaykipaq —nispa.
10 Saba nacionpa reinanmá Rey Salomonman qorqa kimsa waranqa isqon pachak soqta chunkan kilo qorita,
miski asnaq achka-achka especeriakunata chaynataq alhaja rumikunatapas.
Saba nacion reinapa nana-nanaq miski asnaqkuna apamusqanta hinaqa manam haykapipas Salomonmanqa apamurqakuchu.
11 Ofir lawmanta qori apamuq Rey Hirampa buquenkunam apamurqataq sandalo sutiyoq achka-achka qerukunatawan alhaja rumikunata.
12 Chay sandalo sutiyoq qerukunamantam Rey Salomon rurachirqa Tayta Diospa templonpi kaq gradaspi hapipakuna kaqkunata chaynataq kikinpa palacionpi kaq gradaspi hapipakuna kaqkunatapas.
Tocaqkunapaqpas rurachirqataqmi hatun arpakunatawan taksa arpakunata.
Chay sandalo sutiyoq qerukunataqa manam ñawpaqtaqa apamurqakuchu,
manataqmi kay libro qellqasqa kasqan punchawkamapas chayna achka-achkataqa rikurqakuchu.
13 Rey Salomonmi qosqan regalokunamantapas astawanraq Saba nacion reinaman qoykurqa tukuy mañakusqankunata hinaptinmi reinaqa serviqninkunapiwan nacionninman kutikurqa.
Salomonpa kapuqninmantawan reqsisqa kasqanmanta
14 Salomonmi sapa wata chaskiq iskay chunka iskayniyoq tonelada qorita,
15 impuestotapas chaskirqam rantikuq runakunamantawan negociantekunamanta.
Arabia law reykunamantawan Israel nacionpi llapa prefectokunamantañataqmi chaskirqa contribucionta.
16 Rey Salomonqa qorimantam rurachirqataq iskay pachak hatun harkachikuna armakunata,
sapakamatam rurachirqa soqta kilo masnin martillasqa qorimanta.
17 Hina qorimanta martillasqatataqmi rurachirqa kimsa pachak taksa harkachikuna armakunatapas,
sapakamatam rurachirqa huk kilo parten masnin qorimanta hinaspam “Libano Monte” sutiyoq palaciopi churachirqa.
18 Elefantepa waqonmantapas rurachirqataqmi hatun tiyananta hinaspam qori-purowan qaracharqa.
19 Reypa tiyananmanmi seqarqa soqta gradaskuna,
chay tiyanapa wasanñataqmi karqa ruyru,
kaylaw-waklawninpiñataqmi karqa brazonpa samanankuna,
chaykunapa sapa waqtanpim karqa sayachkaq leonkuna.
20 Chay soqta gradaskunapa kaylaw-waklawninpipas karqataqmi chunka iskayniyoq leonkuna,
huk leonmi karqa sapa gradaspa waqtanpi.
Chayna tiyanataqa manam mayqennin reypas rurachirqachu.
21 Rey Salomonpa tomanan vasokunapas karqa qorimantam,
“Libano Monte” sutiyoq palaciopi serviciokunapas qori-puromantam karqa,
qollqemantaqa manam imapas karqachu.
Salomonpa tiemponpiqa manam qollqetaqa qawariqkupaschu.
22 Rey Salomonpa hinaspa Rey Hirampa lamar qochapi negocio ruranan buquenkunam sapa kimsa watamanta apamuqku qorita,
qollqeta,
elefantepa waqonta,
monokunata hinaspa pavo realkunata.
23 Chaynapimá rey Salomonqa masyarurqa tukuy hinastinpi reykunata apu kayninpi chaynataq yachayninpipas.
24 Llapallan runakunam munarqaku Rey Salomon rikuykuyta hinaspa Diospa yachay qosqan uyariykuyta.
25 Llapallankum regalanankupaq sapa wata apamuqku qori-qollqe serviciokunata,
sumaq pachakunata,
armakunata,
miski asnaqkunata,
caballokunata hinaspa mulakunata.
Rey Salomonpa rantisqankunamanta
26 Rey Salomonmi huñurachirqa carretakunatawan caballopi sillakuqkunata.
Kapurqam waranqa tawa pachaknin carretakuna hinaspa chunka iskayniyoq waranqa sillakuqkuna,
paykunatam carretakunapa kasqan llaqtakunaman churachirqa,
churachirqataqmi Jerusalen llaqtapi reywan kanankupaqpas.
27 Reymi Jerusalen llaqtapi qollqeta huñurachirqa rumita hinaña,
cedro sachakunañataqmi karurqa waqtakunapi wiñaq purun higos sachakuna hinaña.
28 Mizraim lawmantawan Cilicia lawmantam apamuqku Salomonpaq caballokunata.
Reypaq rantimuqkunamá chaylawkunamanta rantimuqku.
29 Mizraim lawmantam sapa carretata rantimuqku yaqa qanchis kilo qollqewan,
caballotañataq yaqa iskay kilo qollqewan,
paykunañataqmi rantikuqku Het casta runakunapa reyninkunaman hinaspa Aram nacionniyoq reykunaman.