CRONICAS SUTIYOQ ISKAY KAQ LIBRO
Yachayta Salomon mañakusqanmanta
1
Rey Davidpa churin Salomonmi takyachisqa karqa gobiernonpi.
yupaychasqan Tayta Dios payta yanapaspanmi ancha reqsisqata rurarurqa.
2 Salomonmi lliw Israel nacionpi huñururqa waranqa soldado kamachiqkunata,
pachak soldado kamachiqkunata hinaspa juezkunata,
huñururqataqmi llapallan autoridadkunatawan ayllukunapa llapallan jefenkunatapas.
3 Salomonmi rirqa llapallan huñunasqa runakunapiwan Gabaon llaqta lawpi moqoman,
chaypim karqa Diosman asuykuna karpa,
chay karpatam chunniqpi rurachirqa Tayta Diospa serviqnin Moises.
4 Ichaqa Davidmi Quiriat-jearim llaqtamanta Diospa baulninta apamurqa kikinpa alistasqan lugarman,
chaytaqa apamurqa Jerusalen llaqtapi huk karpata armasqanraykum.
5 Gabaon llaqta lawpitaqmi kachkarqa broncemanta altarpas Tayta Diospa yachanan karpapa ñawpaqninpi,
chay altartam rurarqa Uripa churin otaq Hurpa willkan Bezaleel,
chaymanmi Salomonwan llapallan huñunasqa runakuna rirqa Diosta tapukamunankupaq.
6 Tayta Diospa qayllanpi broncemanta altarmanmi Salomon seqarurqa,
chay altarqa karqa Diosman asuykuna karpapa ñawpaqninpim,
chay altarpim waranqa animalkunata wañuchispa lliwta kañarqa.
7 Chay tuta Salomonman Dios rikuriykuspanmi nirqa:
—Qanmi taytay Davidta ancha-anchata kuyapayaspayki ñoqatapas reypaq churaykuwanki taytaypa rantinpi.
9 Dios Taytalláy,
kunanyá cumplikuchun taytay Davidman prometesqayki,
qanmi churawarqanki kay pachapi polvo hina achka-achkallaña runakunapa reynin kanaypaq.
10 Kunanyá qoway yuyaytawan yachayta kay runakunata gobiernanaypaq.
¿Pitaq gobiernanman kay achkallaña runaykikunataqa?
—nispa.
11 Hinaptinmi Diosñataq nirqa:
—Kaytaqa allintam piensarqanki,
qamqa manam mañakuchkanki apuyaytachu nitaq qori-qollqetachu nitaq reqsisqa kaytachu nitaq enemigoykikuna wañunantachu nitaq unay kawsakuyta- chu.
Qamqa runaykunata gobiernanaykipaqmi mañakuwachkanki yuyaytawan yachayta,
paykunapa reynin kanaykipaqmá churarqayki.
12 Chayraykum yuyaytawan yachayta qosqayki,
qosqaykitaqmi apuyaytawan qori-qollqetapas chaynataq reqsisqa kaytapas.
Manam qam hinaqa karqachu mayqan reypas,
manataqmi kanqachu huk reypas —nispa.
13 Gabaon llaqta law moqomantam otaq Diosman asuykuna karpamantam Salomon kutimurqa Jerusalen llaqtaman hinaspam gobiernarqa Israel nacionpi.
Rey Salomonpa rantisqankunamanta
14 Rey Salomonmi huñurachirqa carretakunatawan caballopi sillakuqkunata.
Kapurqam waranqa tawa pachaknin carretankuna hinaspa chunka iskayniyoq waranqa sillakuqkuna,
paykunatam carretakunapa kasqan llaqtakunaman churachirqa,
churachirqataqmi Jerusalen llaqtapi reywan kanankupaqpas.
15 Reymi Jerusalen llaqtapi huñurachirqa qori-qollqeta rumita hinaña,
cedro sachakunañataqmi karqa waqtakunapi wiñaq purun higos sachakuna hinaña.
16 Muzri lawmantawan Cilicia lawmantam apamuqku Salomonpaq caballokunata.
Reypaq rantimuqkunamá chaylawkunamanta rantimuqku.
17 Muzri lawmantam sapa carretata rantimuqku yaqa qanchis kilo qollqewan,
caballotañataq yaqa iskay kilo qollqewan,
paykunañataqmi rantikuqku Het casta runakunapa reyninkunaman hinaspa Aram nacionniyoq reykunaman.