Rey Ben-adadwan Rey Asapa contrato rurasqanmanta
16
Kimsa chunka soqtayoq watamanña Rey Asa gobiernachkaptinmi Israel nacionpa reynin Baasa Juda nacionpa contranpi peleaq rirqa.
Rama llaqtata aswan allinta allicharachispanmi mana pitapas kacharirqachu Juda nacionpi reypa kasqanman yaykunankuta hinaspa lloqsinantapas.
2 Tayta Diospa templonpi qori-qollqetawan reypa palacionpi tukuy imakunata Asa horqoramuspanmi apachirqa Aram nacionpi Rey Ben-adadman.
Payqa yacharqa Damasco llaqtapim.
Paytam Rey Asa kaynata nichimurqa:
3 —Qampa taytaykiwan ñoqapa taytay contrato rurasqankuta hinayá ñoqanchikpas contratota rurasunchik,
qori-qollqe regalotam apachimuchkayki Israel nacionpa reynin Baasawan contrato rurasqaykita tukunaykipaq chaynapi ñoqamanta anchurikunanpaq —nispa.
4 Rey Ben-adadmi Rey Asapa nisqanta kasukuspan tropankunapa kamachiqninkunata kacharqa Israel nacionpi llaqtakunata atacamunankupaq,
paykunam vencerurqaku Ijon llaqtata,
Dan llaqtata hinaspa Abel-maim llaqtata,
vencerurqakutaqmi kawsaykuna waqaychana Neftaliy lawpi kaq llaqtakunatapas.
5 Rey Baasa chayta yacharuspanmi Rama llaqta allichachisqanta sayarachispa manaña llamkachirqachu.
6 Juda nacionniyoq llapallan runakunata Rey Asa kamachispanmi Rama llaqtamanta apachirqa Rey Basapa rurachisqan rumikunatawan qerukunata,
chaykunawanmi aswanraq allicharachirqa Geba llaqtatawan Mizpa llaqtata.
7 Chay tiempopim Diosmanta willakuq Hanani Juda nacionpi Rey Asaman hamuspa nirqa:
—Aram nacionpa reyninman hapipakuspaykim yupaychasqayki Tayta Diosmanqa mana hapipakurqankichu,
chayraykum paypa soldadonkunaqa qanmanta lluptirun.
8 Cus nacionniyoq runakunapiwan Libia nacionniyoq runakunaqa ¿manachu karqa achka-achkallaña soldadokuna,
carretakuna hinaspa silladakuna?
chaywanpas Tayta Diosman hapipakusqaykiraykum makikiman churaykurqa.
9 Tayta Diosqa qawamuchkanmi llapallan kay pachapi pasaqkunata chaynapi paypa qayllanpi allin sonqoyoqkunaman atiyninta qawachinanpaq.
Loco hinam Aram nacionniyoq reymanqa hapipakurqanki,
kunanmantaqa guerrallañam kanqa qampa contraykipi —nispa.
10 Diosmanta willakuqpa contranpi Rey Asa piñakuruspanmi carcelarachirqa,
payqa piñakururqa chay willakuqpa nisqankunawanmi.
Chay tiempokunapim Asa llumpa-llumpayta ñakarichirqa wakin runakunata.
Rey Asapa wañukusqanmanta
11 Qallariyninmanta tukuyninkama Rey Asapa rurasqankunaqa Juda nacionpi hinaspa Israel nacionpi reykunapa vidanmanta willakuq libropim qellqasqa kachkan.
12 Kimsa chunka isqonniyoq watamanña gobiernachkaspanmi Rey Asa onqorurqa chakinwan llumpa-llumpayta ichaqa Tayta Diosta mana mañakuspanmi hampiqkunallawan hampichikurqa.
13 Payqa tawa chunka hukniyoq watamanña gobiernachkaspanmi abuelonkuna hina wañukurqa.
14 Chaymi pamparurqaku “Davidpa Llaqtan” sutiyoq barriopi kaq kikinpa rurachikusqan sepulturapi.
Chayman chutaykuspankum hinarqaku especeriakunatawan miskillaña asnarichkaq huk rikchaq perfumekunata,
chaykunatam rurarqa allin perfume ruray yachaqkuna.
Paypaqmi ratachirqaku hatun lenguachkaq ninata.