3 Tayta Diosmi yanaparqa Josafat sutiyoq reyta,

paytaqa yanaparqa gobiernonta qallarispa abuelon David hina kawsasqanraykum,

payqa manam maskarqachu Baal sutiyoq taytachakunapa yanapakuynintaqa.

4 Rey Josafatqa taytanpa Diosninpa yanapakuyninta maskaspanraqmi kasukurqa paypa kamachisqankunata,

payqa manataqmi kawsarqa Israel nacionpi rurasqanman hinachu.

5 Chayraykum paytaqa Tayta Dios takyachirqa gobiernonpi,

Juda nacionniyoq llapallan runakunam qorqaku regalokunata chaymi ancha-anchallataña apuyaruspa sinchi reqsisqa karqa.

6 Payqa tukuy sonqonwanmi Tayta Diospa munasqanman hina kawsarqa.

Payqa chinkarachirqataqmi Juda law moqokunapi capillakunatapas chaynataq Asera sutiyoq mamachakunatapas.

7 Kimsa watamanña gobiernachkaspanmi kacharqa churasqan jefekunata Juda llaqtakunapi yachachinankupaq,

chay jefekunam:

Benhail,

Abdias,

Zacarias hinaspa Micaias.

8 Chay jefekunawantaqmi rirqa Leviy casta Semaiaspas,

Netaniaspas,

Zebadiaspas,

Asaelpas,

Semiramotpas,

Jonatanpas,

Adoniaspas,

Tobiaspas hinaspa Tobadoniaspas.

Paykunawantaqmi rirqa sacerdote Elisamapas chaynataq Jorampas.

9 Paykunam Juda nacionpi yachachirqaku Tayta Diospa yachachikuynin libromanta.

Purirqakumá Juda nacionpi llapallan llaqtakunapi runakunata yachachistin.

10 Juda nacionpa muyuriqnin nacionpi kaq reykunam Tayta Diosta manchakusqankurayku mana peleayta munarqakuchu Rey Josafatpa contranpi.

11 Filistea runakunapas Rey Josafatmanmi apamuqku regalokunatawan impuesto qollqeta,

Arabia law runakunapas apamurqakum qanchis waranqa qanchis pachaknin carnerokunatawan qanchis waranqa qanchis pachaknin chivatokunata.

12 Rey Josafatmi aswan-aswanta munaychakurqa hinaspam rurachirqa Juda nacionpi murallasqa llaqtakunatawan mikuy waqaychana llaqtakunata.

13 Achka-achkam karqa imankunapas Juda nacion llaqtakunapi,

Jerusalen llaqtapipas kapurqataqmi guerrapi peleaq valeroso soldadonkuna.

14 Chay soldadokunam familiankuman hina kayna karqa Juda ayllumanta tropakuna kamachiqmi karqa Adnas,

paywanmi karqaku kimsa pachak waranqa soldadokuna.

15 Adnaspa qatiqninñataqmi karqa Johanan,

paywanmi karqa iskay pachak pusaq chunkan waranqa soldadokuna.

Johananpa qatiqninñataqmi

16 karqa Zicripa churin Amasias,

paymi kikinmanta yaykurqa Tayta Diosta servinanpaq.

Paywantaqmi karqa iskay pachak waranqa valeroso soldadokunapas.

17 Benjamin ayllumantañataqmi karqa Eliada sutiyoq valeroso soldado,

paywanmi karqa iskay pachak waranqa soldadokuna,

paykunaqa karqa flechawan hinaspa taksa harkachikunawan peleay yachaqkunam.

18 Eliadapa qatiqninñataqmi karqa Jozabad,

paywanmi karqa guerrapaq armasqa pachak pusaq chunkan waranqa runakuna.

19 Paykunamá karqa reypa serviqninkuna,

ichaqa manam yupasqachu karqa Juda nacionpa muyuriqnin murallasqa llaqtakunapi kaqkunaqa.