2 Iskay kimsa wata pasaruptinmi Rey Josafat rirqa Samaria llaqtata Rey Acab watukuq,

Rey Josafatpaqwan riqmasinkunapaqmi Rey Acab nakachirqa achka ovejakunatawan bueyeskunata hinaspam rimapayarqa Galaad lawpi Ramot llaqtata atacanankupaq.

3 Israel nacionpa reynin Acabmá Juda nacionpa reynin Josafatta tapurqa:

—¿Munawaqchum ñoqawan kuska rispa Galaad lawpi kaq Ramot llaqta atacamuyta?

—nispa.

Chaymi Rey Josafatñataq nirqa:

—Qanwan ñoqaqa hukllam kanchik,

hukllataqmi kanku soldadoykunapas soldadoykikunawan guerraman rinanchikpaq.

4 Ichaqa ama hina kaspayá puntata tapuy Tayta Diospa imam ninanta —nispa.

5 Chaymi Israel nacionpa reynin huñurachirqa Diosmanta willakuq tawa pachak runakunata hinaspam tapurqa:

—Galaad lawpi kaq Ramot llaqtapa contranpi peleaq ¿risaqkuchu icha manachu?

—nispa.

Hinaptinmi paykunañataq llullakuspa nirqaku:

—Riypuniyá,

Diosmi makikiman churamunqa —nispa.

6 Rey Josafatqa nirqataqmi:

—¿Kanmanraqchu Tayta Diosmanta huk kaqnin willakuq chaynapi payta tapunanchikpaq?

—nispa.

7 Chaymi Josafat sutiyoq reyta Israel nacionpa reynin nirqa:

—Arí,

tapunanchikpaqqa kachkanraqmi Tayta Diosmanta willakuq,

payqa Imlapa churin Micaiasmi,

ichaqa cheqninim paytaqa,

manam haykapipas allintaqa willawanchu aswanqa mana allinllatam —nispa.

Chaymi Rey Josafatñataq nirqa:

—Ama chaynataqa rimaychu —nispa.

8 Chaymi Israel nacionpa reynin qayarachimurqa huk serviqninta hinaspam nirqa:

—Imlapa churin Micaiasta chaylla pusamuway —nispa.

9 Israel nacionpa reyninwanmi Juda nacionpa reynin Josafat sapakama sillankupi tiyachkarqaku,

paykunaqa reypa pachanwan churakuruspankum Samaria llaqtaman yaykuna erapi tiyachkarqaku,

Diosmanta llapallan llulla willakuqkunañataqmi paykunapa qayllanpi willakuchkarqaku.

10 Quenaanapa churin Sedequiasmi rurarurqa fierromanta waqrakunata hinaspam nirqa:

—Kaynatam Tayta Dios nin:

“Kay waqrakunawan waqrachkaq hinam Aram nacionniyoq runakunata atacarunki chinkarachinaykikama” nispa.

11 Diosmanta llapallan llulla willakuqkunapas chaynallatam willakurqaku:

—Galaad lawpi kaq Ramot llaqtataqa atacamuyá.

Tayta Diospuni makikiman churaykamuptinmi paykunataqa ganarunki —nispa.

12 Micaiasta qayamunanpaq kachasqan runam payta nirqa:

—Diosmanta willakuqkunam llapallanku hina chayna allinllata reyman nirunku.

Qampas paykuna hinayá niy allinta —nispa.

13 Chaymi Micaias nirqa:

—Kawsaq Tayta Diosraykum jurani,

ñoqaqa Diosniypa imam niwasqallantam rimasaq —nispa.

14 Reypa kasqanman hamuruptinmá rey nirqa:

—Micaias ¿Galaad lawpi kaq Ramot llaqtataqa atacamusaqkuchu icha manachu?

—nispa.

Chaymi pay nirqa:

—Riypuniyá,

Diosmi makikiman churamunqa —nispa.

15 Chaymi reyñataq nirqa:

—¿Hayka kutitañataq nisqayki Tayta Diospa sutinpi cheqapllata juraspa niwanaykipaq?

—nispa.

16 Chaymi Micaias nirqa:

17 Chaymi Josafat sutiyoq reyta Israel nacionpa reynin nirqa:

—¿Manachu nirqayki:

“Manam imatapas ñoqapa allinniypaqqa willakunchu aswanqa mana allinllatam” nispay?

18 Chaymi Tayta Diospa nisqanta Micaias nirqa:

—Ñoqam Tayta Diosta qawarqani tiyananpi tiyachkaqta,

qawarqanitaqmi hanaq pachapi llapallan serviqninkunapas alleqninpi hinaspa ichoqninpi sayachkaqta.

19 Tayta Diosmi nirqa:

“¿Pitaq Acabta engañarunman Galaad lawpi kaq Ramot llaqtata atacamunanpaq chaynapi chaypi wañuchisqa kananpaq?”

nispa.

Chaymi huknin serviqnin nirqa hukta,

hukninpas huktataq.

20 Ichaqa huk espiritum Tayta Diospa qayllanpi rikuriykuspa nirqa:

“Ñoqam engañamusaq” nispa.

Hinaptinmi Tayta Dios nirqa:

“¿Imaynatataq ruramunki?”

nispa.

21 Chaymi espirituñataq nirqa:

“Llapallan willakuqkunawanmi reyman llullata willachimusaq” nispa.

Chaymi Tayta Diosñataq nirqa:

“Engañamuspayá chaynata ruramuy” nispa.

22 Chaynaqa kunanmá serviqniki llapallan willakuqkunapa siminman Tayta Dios churarun llulla espirituta,

Tayta Diosmi rimarun chinkarachisunaykipaq —nispa.

23 Micaiasman Quenaanapa churin Sedequias asuykuspanmi uyanpi takarurqa hinaspam nirqa:

—¿Maynintataq Tayta Diospa espiritunqa ñoqamanta rirqa qamtaraq rimapayasunaykipaq?

—nispa.

24 Chaymi Micaias nirqa:

—Chaytaqa yachanki cuarton-cuarton pakaykachakusqayki punchawmi —nispa.

25 Chaymi Israel nacionpa reynin nirqa:

—Micaiasta hapiruspayá pusay llaqtapi gobernador Amonmanwan churiy Joasman.

26 Ñoqa reypa kayna nisqaytam nimunkichik:

“Kay runata carcelpi wichqaspayá mikunanpaqpas qoychik tantatawan yakullata,

chaynam kanqa vencespa kutimunaykama” nispa.

27 Chaymi Micaiasñataq nirqa:

28 Israel nacionpa reyninwan Juda nacionpa reynin Josafatmi rirqa Galaad lawpi kaq Ramot llaqtaman.

29 Josafat sutiyoq reytam Israel nacionpa reynin nirqa:

—Ñoqam huk pachawan pantarachikuspay peleaq yaykusaq,

qamñataqmi hina rey pachallaykiwan churakunki —nispa.

Israel nacionpa reyninqa huk pachawan pantarachikuptinmi iskayninku peleaq yaykurqaku.

30 Aram nacionpa reyninmi ichaqa carretankunapi kaq capitankunata kamachirqa:

—Amam piwanpas peleankichikchu aswanqa Israel nacionpa reynillanwanmi —nispa.

31 Chaymi carretakunapi kaq soldadokunapa capitanninkuna Josafat sutiyoq reyta rikuruspanku piensarqaku:

—Paymi Israel nacionpa reyninqa —nispa.

Payllawan peleanankupaq pasaykuptinkum Rey Josafatñataq yanapachikunanpaq qayakurqa chaymi Tayta Dios yanapaykuspa paypa kasqanmanta asurirachirqa enemigonkunata.

32 Carretakunapi kaq soldadokunapa capitanninkunamá mana Israelpa reynin kasqanta qawaykuspanku anchurikururqaku.

33 Aram nacionniyoq huk kaqnin soldado llutanpi flecharuptinmi Israel nacionpa reyninta qasqonpi hapirurqa harkachikunanpa tupanakuqninpi chaymi reyñataq carretan manejaqta nirqa:

—Muyurichiy carretata hinaspa horqoway kaymanta,

llumpay heridasqam kachkani —nispa.

34 Ichaqa chay punchawpi guerra llumpay kasqanraykum Israel nacionpa reyninqa hina carretallanpi sayarqa Aram tropakunapa chimpanpi,

payqa inti seqaykuytañam wañururqa.