—¿Manachu yachankichik Galaad lawpi Ramot llaqtaqa ñoqanchikpa kasqanta?

Ñoqanchikpa kachkaptinpas Aram nacionpa reyninmantam mana kutichikunchikchu —nispa.

4 Josafat sutiyoq reytam nirqa:

—¿Munawaqchum ñoqawan kuska rispa Galaad lawpi kaq Ramot llaqta atacamuyta?

—nispa.

Chaymi Rey Josafatñataq nirqa:

—Qanwan ñoqaqa hukllam kanchik,

hukllataqmi kanku soldadoykunapas soldadoykikunawan chaynataq caballoykunapas caballoykikunawan.

5 Ichaqa ama hina kaspayá puntata tapuy Tayta Diospa imam ninanta —nispa.

6 Chaymi Israel nacionpa reynin huñurachirqa Diosmanta willakuq yaqa tawa pachak runakunata hinaspam tapurqa:

—¿Galaad lawpi kaq Ramot llaqtapa contranpi peleaq risaqkuchu icha manachu?

—nispa.

Hinaptinmi paykunañataq llullakuspa nirqaku:

—Riypuniyá,

Tayta Diosmi makikiman churamunqa —nispa.

7 Rey Josafatqa nirqataqmi:

—¿Kanmanraqchu Tayta Diosmanta huk kaqnin willakuq chaynapi payta tapunanchikpaq?

—nispa.

8 Chaymi Josafat sutiyoq reyta Israel nacionpa reynin nirqa:

—Arí,

tapunanchikpaqqa kachkanraqmi Tayta Diosmanta willakuq,

payqa Imlapa churin Micaiasmi,

ichaqa cheqninim paytaqa,

manam haykapipas allintaqa willawanchu aswanqa mana allinllatam —nispa.

Chaymi Rey Josafatñataq nirqa:

—Ama chaynataqa rimaychu —nispa.

9 Chaymi Israel nacionpa reynin qayarachimurqa huk serviqninta hinaspam nirqa:

—Imlapa churin Micaiasta chaylla pusamuway —nispa.

10 Israel nacionpa reyninwanmi Juda nacionpa reynin Josafat sapakama sillankupi tiyachkarqaku,

paykunaqa reypa pachanwan churakuruspankum Samaria llaqtaman yaykuna erapi tiyachkarqaku,

Diosmanta llapallan llulla willakuqkunañataqmi paykunapa qayllanpi willakuchkarqaku.

11 Quenaanapa churin Sedequiasmi rurakururqa fierromanta waqrakunata hinaspam nirqa:

—Kaynatam Tayta Dios nin:

“Kay waqrakunawan waqrachkaq hinam Aram nacionniyoq runakunata atacarunki chinkarachinaykikama” nispa.

12 Diosmanta llapallan llulla willakuqkunapas chaynallatam willakurqaku:

—Galaad lawpi kaq Ramot llaqtataqa atacamuyá.

Tayta Diospuni makikiman churaykamuptinmi paykunataqa ganarunki —nispa.

13 Micaiasta qayamunanpaq kachasqan runam payta nirqa:

—Diosmanta willakuqkunam llapallanku hina chayna allinllata reyman nirunku.

Qampas paykuna hinayá niy allinta —nispa.

14 Chaymi Micaias nirqa:

—Kawsaq Tayta Diosraykum jurani,

ñoqaqa Tayta Diospa imam niwasqallantam rimasaq —nispa.

15 Reypa kasqanman hamuruptinmá rey nirqa:

—Micaias ¿Galaad lawpi kaq Ramot llaqtata atacamusaqkuchu icha manachu?

—nispa.

Chaymi pay nirqa:

—Riypuniyá,

Tayta Diosmi makikiman churamunqa —nispa.

16 Chaymi reyñataq nirqa:

—¿Hayka kutitañataq nisqayki Tayta Diospa sutinpi cheqapllata juraspa niwanaykipaq?

—nispa.

17 Chaymi Micaias nirqa:

18 Chaymi Josafat sutiyoq reyta Israel nacionpa reynin nirqa:

—¿Manachum nirqayki:

“Manam imatapas ñoqapa allinniypaqqa willakunchu aswanqa mana allinllatam” nispay?

19 Chaymi Tayta Diospa nisqanta Micaias nirqa:

—Ñoqam Tayta Diosta qawarqani tiyananpi tiyachkaqta,

qawarqanitaqmi hanaq pachapi llapallan serviqninkunatapas alleqninpi hinaspa ichoqninpi sayachkaqta.

20 Chaymi Tayta Dios nirqa:

“¿Pitaq Acabta engañarunman Galaad lawpi kaq Ramot llaqtata atacamunanpaq chaynapi chaypi wañurachisqa kananpaq?”

nispa.

Chaymi huknin serviqnin nirqa hukta,

hukninpas huktataq.

21 Ichaqa huk espiritum Tayta Diospa qayllanpi rikuriykuspa nirqa:

“Ñoqam engañamusaq” nispa.

Hinaptinmi Tayta Dios nirqa:

“¿Imaynatataq ruramunki?”

nispa.

22 Chaymi espirituñataq nirqa:

“Llapallan willakuqkunawanmi reyman llullata willachimusaq” nispa.

Chaymi Tayta Diosñataq nirqa:

“Engañamuspayá chaynata ruraramuy” nispa.

23 Chaynaqa kunanmá serviqniki llapallan willakuqkunapa siminman Tayta Dios churarun llulla espirituta,

Tayta Diosmi rimarun chinkarachisunaykipaq —nispa.

24 Micaiasman Quenaanapa churin Sedequias asuykuspanmi uyanpi takarurqa hinaspam nirqa:

—¿Maynintataq Tayta Diospa espiritunqa ñoqamanta rirqa qamtaraq rimapayasunaykipaq?

—nispa.

25 Chaymi Micaias nirqa:

—Chaytaqa yachanki cuarton-cuarton pakaykachakusqayki punchawmi —nispa.

26 Chaymi Israel nacionpa reynin nirqa:

—¡Micaiasta hapiruspayá pusay llaqtapi gobernador Amonmanwan churiy Joasman!

27 Ñoqa reypa kayna nisqaytam nimunkichik:

“Kay runata carcelpi wichqaspayá mikunanpaqpas qoychik tantatawan yakullata,

chaynam kanqa vencespa kutimunaykama” nispa.

28 Chaymi Micaiasñataq nirqa:

29 Israel nacionpa reyninwan Juda nacionpa reynin Josafatmi rirqa Galaad lawpi kaq Ramot llaqtaman.

30 Josafat sutiyoq reytam Israel nacionpa reynin nirqa:

—Ñoqam huk pachawan pantarachikuspay peleaq yaykusaq,

qamñataqmi hina rey pachallaykiwan churakunki —nispa.

Israel nacionpa reyninqa huk pachawan pantarachikuspanmi peleaq yaykurqa.

31 Aram nacionpa reyninmi ichaqa kimsa chunka iskayniyoq carretankunapi kaq capitanninkunata kamachirqa:

—Amam piwanpas peleankichikchu aswanqa Israel nacionpa reynillawanmi —nispa.

32 Chaymi carretakunapi kaq soldadokunapa capitanninkuna Josafat sutiyoq reyta rikuruspanku piensarqaku:

—Paymi Israel nacionpa reyninqa —nispa.

Payllawan peleanankupaq pasaykuptinkum Rey Josafatñataq yanapachikunanpaq qayakurqa.

33 Hinaptinmi carretakunapi kaq soldadokunapa capitanninkuna qawaykurqaku payqa mana Israel nacionpa reynin kasqanta chaymi anchurikururqaku.

34 Aram nacionniyoq huk kaqnin soldado llutanpi flecharuptinmi Israel nacionpa reyninta qasqonpi hapirurqa harkachikunanpa tupanakuqninpi chaymi reyñataq carretan manejaqta nirqa:

—Muyurichiy carretata hinaspa horqoway kaymanta,

llumpay heridasqam kachkani —nispa.

35 Ichaqa chay punchawpi guerra llumpay kasqaraykum Israel nacionpa reyninqa hina carretallanpi sayarqa Aram tropakunapa chimpanpi,

ichaqa tardeykuytam wañururqa carretapa ukunman yawarnin suturuptin.

36 Inti seqaykuchkaptinñam llapa tropakunapa kasqanpi uyarirqaku:

—Sapakama llaqtaykichikman hinaspa chakraykichikman riychik —niqta.

37 Rey wañuruptinmá Samaria llaqtaman apamuspanku chaypi pamparurqaku.

38 Chaymantam carretapi kaq yawarta mayllarqaku Samaria law estanquepi.

Chay estanquepim chuchumikakuna bañakuqku,

Tayta Diospa nisqanman hinamá allqokunapas llaqwarqaku Acabpa yawarninta.

39 Acabpa wakin rurasqankunaqa chaynataq elefantepa waqonmanta palacion rurachisqanqa chaynataq llaqtakuna rurachisqanqa Israel nacion reykunapa vidanmanta willakuq libropim qellqasqa kachkan.

40 Abuelonkuna hina Rey Acab wañuruptinmi churin Ocoziasña paypa rantinpi gobiernarqa.

41 Israel nacionpa reynin Acab tawa watamanña gobiernachkaptinmi Asapa churin Josafat Juda nacionpi gobiernayta qallarirqa.

42 Rey Josafatqa kimsa chunka pichqayoq watanpi kachkaspanmi gobiernayta qallarirqa,

Jerusalen llaqtapim iskay chunka pichqayoq wata gobiernarqa,

paypa mamanmi karqa Silhi sutiyoq runapa churin Azuba.

43 Rey Josafatqa taytan Asapa tukuy allinkuna rurasqanman hinam kawsarqa,

mana imallapipas pantaykuspanmi Tayta Diospa munasqanman hina rurarqa,

chaywanpas moqokunapi capillakunataqa manam chinkachirqachu,

runakunam hinallaraq animalkunata wañuchispa hinaspa inciensotapas kañaspa chaykunapi adorarqaku.

44 Rey Josafatqa manam guerrapichu karqa Israel nacionpa reyninwanqa.

45 Rey Josafatpa wakin rurasqankunaqa chaynataq mana manchakuspa guerrapi peleasqankunaqa Juda nacion reykunapa vidanmanta willakuq libropim qellqasqa kachkan.

46 Paytaqmi taytan Asapa tiemponpi puchuq maricon runakunatapas nacionmanta qarqorurqa.

47 Edom nacionpim rey mana karqachu,

reypa rantinpiqa gobiernarqa huk prefectollam.

48 Josafatmi negocio rurananpaq buquekunata rurachirqa,

chaykunam Ofir lawmanta qori apamuq rinan karqa ichaqa Ezion-geber llaqtapa hichpan lamar qochapim ñutupakururqa chaymi manaña rirqachu.

49 Chaymi Josafat sutiyoq reyta Acabpa churin Rey Ocozias nirqa:

—Buquepi llamkaq runaykunayá qampa runaykikunawan kuska richunku buquekunapi —nispa.

Rey Josafatmi ichaqa mana munarqachu.

50 Abuelonkuna hina Rey Josafat wañuruptinmi pamparurqaku Abuelon “Davidpa Llaqtan” sutiyoq barriopi otaq abuelonkunapa kasqanpi,

paypa rantinpiñataqmi gobiernarqa churin Joramña.

51 Juda nacionpi Rey Josafat chunka qanchisniyoq watamanña gobiernachkaptinmi Rey Acabpa churin Ocozias Israel nacionpi gobiernayta qallaykurqa,

Samaria llaqtapi yachaspanmi Israel nacionpi gobiernarqa iskay wata.

52 Rey Ocoziaspas Tayta Diospa qayllanpim mana allinkunata rurarqa,

tayta-mamankunapa huchanman hinam kawsarqa.

Israel nacionniyoq runakuna huchallichiq Nabatpa churin Jeroboam hinam huchallikurqa.

53 Baal sutiyoq taytachata servispanmi paytaña adorarqa,

tayta-mamanpa imam rurasqanta hina ruraspanmi Israelpa yupaychasqan Tayta Diosta piñarachirqa.