—Qochapa waklaw chimpan Edom nacion lawmantam hamuchkanku achka-achka tropakuna,

paykunaqa Engadi lawpiñam otaq Hazezon-tamarpiñam kachkanku —nispa.

3 Chaymi Josafat mancharikuspan Tayta Diosta mañakurqa yanapananpaq,

Juda nacionpi llapallan runakunamanmi willachirqa ayunanankupaq.

4 Hinaptinmi Juda nacionpi kaqkuna huñunakururqaku Tayta Diospa yanapakuyninta mañakuspanku,

hamurqakutaqmi Juda nacionpi llapallan llaqtakunapi kaqkunapas.

5 Juda nacionmanta chaynataq Jerusalen llaqtamanta kaqkunam huñunasqa kachkarqaku Tayta Diospa templonpa mosoq pationpa chimpanpi,

paykunapa chawpinpi Josafat sayariykuspanmi

6 nirqa:

—Abueloykupa yupaychasqan Dios Taytalláy,

qamqa kanki hanaq pachapi kaq Diosmi,

qamqa munaychakunkim llapallan nacionpa gobiernonkunapi.

Qamqa kanki kallpasapa atiyniyoqmi,

manam pipas contraykipiqa churakunmanchu.

7 Dios Taytayku,

qanmi wischururqanki kay allpapi yachaq runakunata Israel casta runaykikunapa qayllanmanta,

kay allpatam wiña-wiñaypaq qorqanki amistadniki Abrahampa miraynin runaykikunaman.

8 Kay allpapi yachaspankum rurarqaku temploykita hinaspam nisurqanki:

9 “Sichu hamunqa ñoqaykuman castigo hina guerrapas,

peste onqoypas otaq yarqaypas hinaptinqa kay templopa ñawpaqninpi qayllaykimanmi hamusaqku,

qamqariki kay templopim kachkanki,

llakikuyniykupipas qamtam mañakamusqaykiku hinaptinmi uyariykuspa salvaykuwankiku” nispa.

10 Ichaqa kayqayá kaypiña kachkanku Amonpa mirayninkunapas,

Moabpa mirayninkunapas chaynataq Seir Orqopi yachaqkunapas.

Paykunapa allpanku ukunta pasamunantam mana munarqankichu Israel castakuna Egipto nacionmanta hamuptinku chaynapim paykunaqa asurikuspanku mana wañuchirqakuchu.

11 Chaywanpas paykunaqa qarqowaykutaraqmi munachkanku kay allpa qowasqaykikumanta.

12 ¡Diosnillayku!

¿manachum paykunataqa castiganki?

Manam ñoqaykupaqa kanchu kallpayku kay achka-achkallaña atacaqniyku runakunamanta defiendekunaykupaq,

manataqmi ima ruraytapas atinikuchu chaymi qamllaman hapipakamuniku yanapaykuwanaykikupaq —nispa.

13 Juda nacionniyoq llapallan runakunam sayarqaku Tayta Diospa qayllanpi warmintinkama hinaspa hatunpas-taksapas churinkunapiwan.

14 Chaypitaqmi kachkarqa Zacariaspa churin Jahaziel sutiyoq runapas,

Zacariasqa karqa Benaiapa churinmi otaq Jeielpa willkanmi,

Jeielñataqmi karqa Leviy casta Asafpa mirayninmanta kaq Mataniaspa churin.

Huñunasqa kachkaptinkum Tayta Diospa Espiritun huntaykurqa Jahazielman

15 chaymi pay nirqa:

—Juda nacionpi hinaspa Jerusalen llaqtapi llapallan yachaqkuna uyariychik,

qampas uyariyá Rey Josafat.

Tayta Diosmi nisunkichik kaynata:

“Amayá manchakuychikchu nitaq hukmayaychikchu kay achka-achkallaña tropakunapa qayllanpiqa,

manam qamkunapachu kay guerraqa aswanqa kikin Diospam.

16 Paqarinyá atacaychik paykunata,

paykunam hamuchkanku Sis sutiyoq qasanta,

paykunataqa tarirunkichik wayqopa tukuynin Jeruel sutiyoq chunniqpa chimpanpim.

17 Manam qamkunachu peleankichik chay guerrapiqa,

chaynaqa allinta sayaspayá takyaychik,

qawankichikmi Tayta Diospa imaynam librasusqaykichikta.

Juda nacionpi hinaspa Jerusalen llaqtapi kaqkuna,

amayá manchakuychikchu nitaq hukmanyaychikchu.

Paqarinmi lloqsinkichik paykunapa contranpi hinaptinmi Tayta Dios yanapasunkichik” nispa.

18 Rey Josafat qonqoranpa pampaman kumuykuptinmi Juda nacionpi chaynataq Jerusalen llaqtapi yachaqkunapas adoranankupaq qonqorakuykurqaku Tayta Diospa qayllanpi.

19 Coatpa miraynin hinaspa Coreypa mirayninkunamanta Leviy casta runakunapas hatun vozpim alabarqaku Israelpa yupaychasqan Tayta Diosta.

20 Paqarinnintin hatarispankuñataqmi lloqsirqaku Tecoa sutiyoq chunniqman chaymi paykuna lloqsichkaptinku Rey Josafat sayarispan nirqa:

—Juda nacionpi hinaspa Jerusalen llaqtapi kaqkuna,

uyariykuwaychik:

Yupaychasqanchik Tayta Diosman hapipakuptikichikqa yanapasunkichikmi,

hapipakuychiktaqyá Diosmanta willakuqkunamanpas hinaptinqa allinmi kasunkichik —nispa.

21 Runakunawan rimaruspanmi takiqkunata churarqa Dios adorana pachakunawan pachakuykuspa takillawanña Tayta Diosta alabanankupaq.

Guerraman lloqsiqkunapa qayllanpi chaynata ruraspankum takirqaku:

22 Takispa alabayta qallariptinkum Tayta Dios chaqwarachirqa Amonpa hinaspa Moabpa mirayninkunata chaynataq Seir Orqomanta kaqkunatapas.

Paykunamá hamurqaku Juda nacionpa contranpi ichaqa vencesqam karurqaku.

23 Amonpa hinaspa Moabpa mirayninkunam atacarqaku Seir Orqopi yachaqkunata hinaspam lliwta wañurachirqaku,

Seir Orqopi kaqkunata wañuchiyta tukuruspankuñataqmi kikinkupura wañuchinakuspa tukunakururqaku.

24 Juda nacionpi kaqkuna chunniq qawarina sitioman rispankum chaymanta rikururqaku achka-achkallaña tropakuna pampapi wañusqata,

manam mayqallanpas lluptisqachu.

25 Hinaptinmi Josafatñataq runankunapiwan rirqaku wañusqakunapa imankunatapas apamuq,

tariramurqakum achka-achka animalkunata,

armakunata,

pachakunata hinaspa valorniyoq kaqkunatapas.

Chaykunata hapikuruspankum manaña apaytapas atirqakuchu,

kimsa punchawmi huñurqaku chaykunata achkallaña kasqanrayku.

26 Tawa punchawninmanmi huñunakururqaku Beraca sutiyoq qechwapi,

chaypim alabarqaku Tayta Diosta,

chayraykum chay sitiota suticharqaku Beraca Qechwawan kay libro qellqasqa kasqan tiempokama.

27 Juda nacionniyoq hinaspa Jerusalen llaqtayoq llapallan runakunam Josafat jefeyoq kutimurqaku kusisqallaña Jerusalen llaqtaman,

chayna kusisqaqa kutirqaku enemigonkunamanta Tayta Dios libraykusqanraykum.

28 Jerusalen llaqtaman chayaramuspankum hatun arpakunata,

taksa arpakunata hinaspa cornetillakunata tocastin Tayta Diospa templonman yaykurqaku.

29 Israel nacionpa enemigonkunapa contranpi Tayta Dios peleasqanta uyariruspankum chay nacionkunapi llapallan gobiernaqkuna Diosta manchakururqaku.

30 Chaynapim Rey Josafatpa gobiernonqa hawkalla karqa,

chaynaqa karqa paypa Diosnin muyuriqnin nacionkunawan hawkataña kawsachisqanraykum.

31 Chaynatamá Rey Josafatqa gobiernarqa Juda nacionpi.

Payqa kimsa chunka pichqayoq watanpim gobiernayta qallarirqa,

Jerusalen llaqtapim iskay chunka pichqayoq wata gobiernarqa,

paypa mamanmi karqa Silhi sutiyoq runapa churin Azuba.

32 Rey Josafatqa taytan Asapa tukuy allinkuna rurasqanman hinam kawsarqa,

mana imallapipas pantaykuspanmi Tayta Diospa munasqanman hina rurarqa.

33 Chaywanpas moqokunapi capillakunataqa manam chinkachirqachu,

runakunaqa abuelonkupa Diosninpiqa manaraqmi tukuy sonqonkuwanchu iñirqaku.

34 Qallariyninmanta tukuyninkama Josafatpa wakin rurasqankunaqa Hananipa churin Jehupa qellqasqan libropim kachkan,

chaykunaqa kachkan Israel nacionpi reykunamanta willakuq libropim.

35 Chaykuna pasaruptinñataqmi Juda nacionpa reynin Josafatqa Israel nacionpa reynin Ocoziasman hukllawakururqa,

Ocoziasqa mana allinkunalla ruraqmi karqa.

36 Paymanqa hukllawakururqa negociota ruranankupaq buquekunata rurachinankupaqmi,

chay buquekunataqa rurachirqaku Ezion-geber llaqta lawpim.

37 Hinaptinmi Maresa llaqtayoq Dodavapa churin Eliezer Rey Josafatpa contranpi Diosmanta willarqa:

—Rey Ocoziasman hukllawakusqaykiraykum Tayta Dios chinkarachinqa rurasqayki buquekunata —nispa.

Buquekuna pakipakuruptinmá negociomanqa manaña rirqakuchu.