Juda Nacionpi Rey Joram gobiernasqanmanta
21
Abuelonkuna hina Rey Josafat wañuruptinmi pamparurqaku abuelonkunapa pampakusqan “Davidpa Llaqtan” sutiyoq barriopi,
paypa rantinpiñataqmi gobiernarqa churin Joramña.
2 Jorampa wawqenkunam karqa Azarias,
Jehiel,
Zacarias,
Azariahu,
Micael hinaspa Sefatias.
Paykunamá karqa Juda nacionpa reynin Josafatpa churinkuna.
3 Josafatmi churinkunaman regalarqa qori-qollqetawan alhajakunata,
regalarqataqmi Juda nacionpi murallasqa llaqtakunatapas.
Paypa rantinpi gobiernananpaqmi ichaqa churarqa churin Joramta,
paytaqa churarqa piwi churin kasqanraykum.
4 Taytanpa rantinpi gobiernananpaq Rey Joram yaykuruspanmi kallpanchakururqa hinaspam llapallan wawqenkunata wañurachirqa espadawan,
wañurachirqataqmi Israel wakin jefekunatapas.
5 Chay Rey Joram gobiernayta qallaykuspanqa karqa kimsa chunka iskayniyoq watayoqmi,
Jerusalen llaqtapim gobiernarqa pusaq wata.
6 Ichaqa Israel nacion reykunapa kawsasqanta hinam kawsarqa,
kawsarqaqa Acabpa castankunapa kawsasqanta hinam.
Acabpa churintaqmi warminpas karqa,
chayraykum Tayta Diospa qayllanpipas mana allinkunata rurarqa.
7 Chaywanpas Davidwan contratota rurasqanraykum Tayta Diosqa mana munarqachu Davidpa castankuna chinkarachiyta.
Chaynataqa rurarqa wiñaypaq rataq achkiyta hina Davidmanwan mirayninkunaman qonanpaq prometesqanraykum.
8 Rey Jorampa tiemponpitaqmi Edom nacionpas Juda nacionpa munaychakusqan kachkaspan contranpi hoqarikururqa hinaspam reytapas churakururqaku.
9 Chayraykum Rey Joramqa pasarqa soldadokunapa jefenkunawan hinaspa llapallan carretankunawan.
Paywan carretankunapi kaq capitankuna tuta hatariruspankum atacarqaku muyuykuqnin Edom runakunata.
10 Chaywanpas Edom nacionqa librakururqam Juda nacionpa munaychakuyninmanta kay libro qellqasqa kasqan punchawkama.
Hina chay tiempopitaqmi Libna llaqtapas Juda nacionpa munaychakuyninmanta librakururqa,
chaynaqa karqa abuelonkunapa yupaychasqan Tayta Diosta Rey Joram qepanchakurusqanraykum.
11 Rey Joramqa rurachirqataqmi Juda nacion moqokunapi capillakunatapas,
chaykunawanmi Jerusalen llaqtapi kaqkunata huchapakuq warmita hina huchallirachirqa,
Juda nacionpi kaqkunatapas pantarachirqam.
12 Chayna kachkaptinmi chayaramurqa Diosmanta willakuq Eliaspa kayna niq cartan:
Abueloyki Davidpa yupaychasqan Tayta Diosmi nin kaynata:
“Qamqa manam kawsarqanki taytayki Josafatpa kawsasqanman hinachu
13 aswanqa Israel nacionpi kaq reykunapa mana allin kawsasqanman hinam.
Acabpa castankuna mana allin rurasqankuta hinam Juda nacionpi kaqkunatawan Jerusalen llaqtapi kaqkunata huchallichirqanki.
Wañurachirqankitaqmi qanmanta aswan allin kaq wawqekikunatapas.
14 Chayraykum hatun llakita Tayta Dios kachaykamunqa runaykikunaman,
churikikunaman,
warmikikunaman hinaspa tukuy kapuqnikikunaman.
15 Qanmanñataqmi kachaykamunqa achka onqoykunata,
wiksa nanaywanmi onqorunki chunchulnikipas lloqsinankama” nispa.
16 Tayta Diosmi hatarirachirqa Filestea runakunata Rey Jorampa contranpi,
hatarichirqataqmi Cus lawpa hichpanpi yachaq Arabia runakunatapas.
17 Paykunam hamurqaku Juda nacionwan peleaq hinaspam yaykuruspanku apakurqaku reypa palacionpi tukuy ima kaqkunata,
churinkunata chaynataq warminkunatapas hinaptinmi puchururqaqa Rey Jorampa sullka churin Joacazllaña.
18 Tayta Diosqa kachaykamurqataqmi mana hampiy atina wiksa nanaytapas.
19 Iskay wata pasaruptinmi chay onqoyninwan chunchulnin lloqsiramurqa hinaptinmi wañururqa llumpa-llumpayta ñakarispan.
Runankunaqa wañuruptinpas manamya ninallatapas rataykachipurqakuchu abuelonkunapaq hinaqa.
20 Rey Joramqa kimsa chunka iskayniyoq watanpim gobiernayta qallaykurqa,
Jerusalen llaqtapim pusaq wata gobiernarqa,
payqa wañukurqa mana pipapas llakipayasqanmi hinaptinmi pamparurqaku “Davidpa Llaqtan” sutiyoq barriopi,
paytaqa pamparurqaku manam reykunapa pampakunanpichu.