Rey Ocozias Juda nacionpi gobiernasqanmanta
22
Jerusalen llaqtapi yachaqkunam Jorampa rantinpi gobiernananpaq churarurqaku sullka churin Ocoziasta.
Jorampa mayor churinkunatam ñawpaqtaraq Arabia runakunawan kuska hamuq salteaqkuna wañurachirqaku campamentoman yaykuruspa.
Chaynapim Juda nacionpiqa gobiernarqa Rey Jorampa churin Ocoziasña.
2 Chay Rey Ocozias gobiernayta qallaykuspanqa karqa iskay chunka iskayniyoq watayoqmi,
Jerusalen llaqtapiqa gobiernarqa huk watallam.
Mamanpa sutinmi karqa Atalia,
chay Ataliaqa karqa Rey Omripa willkanmi.
3 Rey Ocoziaspas mana allintam kawsarqa Acabpa castankunapa kawsasqanta hina,
mamanmi umacharqa mana allinkunata rurananpaq.
4 Acabpa castankuna hinamá mana allinkunata rurarqa Tayta Diospa qayllanpi.
Taytan wañukuptinmi Acabpa castankuna consejarqaku mana allinninpaq.
5 Chaynapimá Ocoziasqa rurarqa paykunapa umachasqanta.
Israel nacionpa reyninwanmi otaq Acabpa churin Joranwanmi hukllawanakururqa chaynapi Aram nacion Rey Hazaelpa contranpi peleananpaq.
Galaad law Ramot llaqtapi peleaptinkum Aram tropakuna heridaramurqa.
6 Chaymi Rey Joramqa kutikurqa Jezreel llaqtaman,
payqa kutikurqa Aram nacionpa reynin Hazaelwan Ramot llaqtapi peleaspa heridarachikusqan hampichikamunanpaqmi.
Chaypi Acabpa churin Joramta hampichkaptinkum payta watukunanpaq rirqa huknin Jorampa churin Ocozias.
Chay rey Ocoziasqa karqa Juda nacionpa reyninmi.
Rey Ocoziasta Jehu wañuchisqanmanta
7 Diosmi munarqa Rey Joramta watukusqanpi Rey Ocozias wañunanta,
chayaruspanmi Joranwan lloqsirqaku Nimsipa churin Jehupa contranpi peleaq.
Jehutam Tayta Dios akllarqa Acabpa castankunata chinkarachinanpaq.
8 Jehumi Jezreel llaqtapi Acabpa castankunata castigachkaspan chaypi tarirurqa Juda nacionniyoq jefekunata.
Tarirurqataqmi Rey Ocoziaspa wawqenkunatapas chaynataq churinkunatapas,
paykunaqa Rey Ocoziastam servichkarqaku,
paykunatam Jehu wañurachirqa.
9 Chaymantañataqmi kikin Ocoziasta maskamurqa,
payqa Samaria llaqtapim pakarayachkarqa,
chaypi tariruspam pusamurqaku Jehuman hinaptinmi wañurachispa pamparurqaku payqa Rey Josafatpa churin kasqanrayku,
Josafatqa tukuy sonqonwanmi Tayta Diospa yanapakuyninta maskarqa.
Ocoziaspa castankunaqa manañam atirqakuchu gobiernoman yaykuyta.
Gobiernay munaq Atalias sutiyoq warmita wañuchisqankumanta
10 Rey Ocoziaspa maman Ataliam wawan Rey Ocoziasta wañurachisqankuta yacharuspan wañurachirqa Juda nacion reypa llapallan mirayninkunata.
11 Rey Jorampa warmi churin Josabam ichaqa Rey Ocoziaspa panin kasqanrayku turinpa churinkunata wañuchichkaptinku sobrinon Joasta wañuchiqkunamanta qechururqa hinaspam uywaqnin warmitawan puñunan cuartopi pakarurqa chaynapi Atalia mana rikunanpaq.
Chaynapimá mana wañuchirqakuchu.
Chay pakaruq Josaba sutiyoq warmiqa karqa sacerdote Joiadapa warminmi otaq Ocoziaspa paninmi.
12 Paykunawanmá Joasqa soqta wata pakasqa karqa Diospa templonpi.
Ataliañataqmi gobiernarqa nacionpi.