Israel nacionpa reynin kananpaq Jehu nombrasqa kasqanmanta
9
Diosmanta willakuq Eliseom,
willakuqmasinkunapa hukninta qayaykuspan nirqa:
—Alistakuspayá kay puyñuchapi aceiteta aparikuspayki pasay Galaad lawpi Ramot llaqtaman.
2 Chayaruspaykim maskanki Josafatpa churin Jehuta otaq Nimsipa willkanta.
Capitanmasinkunamanta qayaykuspaykim sapaq salaman pusaykunki.
3 Chaypim kay apasqayki aceiteta umanman talliykunki kaynata nispayki:
“Tayta Diosmi nisunki:
‘Ñoqam kay aceiteta tallispa nombrayki Israel nacionpa reynin kanaykipaq’ nispa.
Chaynata niykuspam punkunta lluptikamunki ama imatapas suyaspayki” nispa.
4 Diosmanta willakuq chay mozomá pasarqa Galaad law Ramot llaqtaman.
5 Chayaruptinmi tropakunapa capitanninkuna huñunasqa tiyachkasqaku chaymi asuykuspan nirqa:
—Capitan,
qanwanmi parlaykuyta munani —nispa.
Chaymi Jehu tapuykurqa:
—¿Mayqanniykuwan?
—nispa.
Hinaptinmi chay mozoñataq nirqa:
—Qawanmi capitan —nispa.
6 Jehu hatarispan salaman yaykuptinmi chay mozoqa aceiteta umanman talliykuspan nirqa:
—Israelpa yupaychasqan Tayta Diosmi kaynata nisunki:
“Ñoqam kay aceiteta tallispa churayki Israelpa miraynin runaykunapa reynin kanaykipaq.
7 Reyniki Acabpa castankunatam wañuchinki,
ñoqamanta willakuq serviqniykunatapas chaynataq wakin serviqniykunatapas wañuchisqanmanta chaynataq Jezabelpa wañuchisqankunamantapas vengakunaypaq.
8 Acabpa llapa castanmi puchukanqa.
Tukurusaqmi ayllunkunapa qari kaq llapa mirayninkunatapas,
tukurusaqmá sirviente kaptinkupas chaynataq libre kaptinkupas.
9 Acabpa castantaqa tukurusaq Nabatpa churin Jeroboampa castankunata hinam chaynataq Ahiaspa churin Baasapa castankunata hinam.
10 Jezabel sutiyoq warmipas llaqtapi kaq chakrapi wañuptinmi allqokunapa mikusqan kanqa,
manam pipas pampaqnin kanqachu” nispa.
Chaynata niykuspanmi chay mozo punkuta kichaykuspan lluptikurqa.
11 Jehu salamanta lloqsiruspan reypa serviqnin capitankunaman asuykuptinmi tapuykurqaku:
—¿Imanantaq?
¿Imapaqtaq wak loco qayasurqanki?
—nispa.
Chaymi Jehuñataq nirqa:
—Qamkunaqa reqsinkichikmi wak runataqa,
yachankichiktaqmi rimasqantapas —nispa.
12 Paykunam nirqaku:
—Llullakunkim,
manam yachanikuchu.
Niykuwayku imam nisusqaykita —nispa.
Paymi nirqa:
—Tayta Diospa nisqantam willawarqa:
“Kay aceiteta tallispaymi churayki Israel nacionpi rey kanaykipaq” nispa.
13 Hinaptinmi llapa capitanmasinkuna chaylla pachankuta gradaskunapa hawanman churarurqaku Jehupa chakin sarunanpaq,
chaymantam cornetata tocaspanku qaparirqaku:
—Jehumi rey —nispa.
Rey Joramta Jehu wañuchisqanmanta
14 Chaynapimá Josafatpa churinqa otaq Nimsipa willkan Jehuqa hoqarikururqa Rey Jorampa contranpi.
Chay punchawkunam Joramqa Israel runakunapiwan kachkarqa Galaad law Ramot llaqtapi,
chay llaqtata Aram nacionpi Rey Hazaelmanta defiendispan.
15 Ichaqariki Aram nacionpa reynin Hazaelwan peleasqanpim Rey Joramqa heridarachikurqa chaymi hampichikunanpaq Jezreel llaqtaman kutirurqa.
Chay Jehu sutiyoq runamá puriqmasinkunata nirqa:
—Tanteaptikichkqa amayá pipas kay llaqtamantaqa lluptichunchu chaynapi Jezreel llaqtaman rispan ama willakamunanpaq —nispa.
16 Jehumi guerrapaq carretanman seqaruspan pasarqa Jezreel llaqtaman.
Chaypim Rey Joram onqospan kachkarqa,
chaypitaqmi kachkarqa watukuqnin Juda nacionpa reynin Ocoziaspas.
17 Jezreel llaqtapa torrenmanta cuidaq guardiam Jehuwan riq tropa llaqtaman asuykuqta rikuruspan willakurqa:
—Tropatam rikuruni —nispa.
Joranmi nirqa:
—Kamachiy huk kaqninta sillakuykuspan taripaykunanpaq,
tapuykamuchunyá hawkallachus icha imaynas kasqanmanta —nispa.
18 Sillada taripaykuspanmi tapuykurqa:
—Reymi kachamuwan:
“¿Hawkallachu hamuchkanki?”
—nispa.
Chaymi Jehu nirqa:
—Ama chaymantaqa iskayrayaychu.
Qepayman churakuspayki ñoqaykuwan riy —nispa.
Llaqta cuidaqñataqmi willakurqa:
—Kachasqanchik soldadom paykunaman chayarun ichaqa manam kutimunchu —nispa.
19 Yapamantam huk silladata kacharqa chaymi paypas tapuykurqa:
—Reymi kachamuwan:
“Hawkallachu hamuchkanki” nispa.
Chaymi Jehuñataq nirqa:
—Ama chaymantaqa iskayrayaychu.
Qepayman churakuspayki ñoqawan riy —nispa.
20 Llaqta cuidaqñataqmi yapamanta willakurqa:
—Kachasqanchik soldadom paykunaman chayarun ichaqa manam kutimunchu.
Puntamuqpa manejamusqanqa rikchakun Nimsipa willkan Jehupa manejamusqanmanmi.
Locollañam carretapi kallpamuchkan —nispa.
21 Chaymi Joram kamachirqa:
—Carretayman caballokunata watachunku —nispa.
Wataruptinkum Israel nacionpa reynin Joranwan Juda nacionpa reynin Ocozias sapakama carretankupi lloqsirqaku Jehuta taripanankupaq.
Paywanmi tuparurqaku Jezreel llaqtayoq Nabotpa chakranpi.
22 Jehuta rikuruspanmi Joram tapuykurqa:
—¿Hawkallachum hamuchkanki Jehu?
—nispa.
Chaymi payñataq nirqa:
—¿Ima hawkayaytaq kanman mamayki Jezabel huk taytachakunataña qatichkaptinqa chaynataq tukuy brujeriakunatapas rurachkaptinqa?
—nispa.
23 Joranmi carretanta qepaman muyurirachispan lluptikurqa Ocoziasta kaynata nistin:
—¡Traicionaruwanchikmi!
—nispa.
24 Jehuñataqmi flechanta hapiykuspan Joramta flecharurqa qepanmanta.
Corazonninta flecha lloqsiruptinmi Joramqa carretanman wichiykurqa.
25 Jehumi kamachirqa Bidcar sutiyoq capitanninta:
—Hoqarispayki Jezreel llaqtayoq Nabotpa chakranpa patanman wischuykamuy.
Yuyariyá,
iskayninchik taytan Acabta servispa carretapi qatichkaptinchikmi Acabpa contranpi Tayta Dios nirqa:
26 “Qayna punchawmi rikurqani Nabot sutiyoq runata chaynataq churinkunatapas wañuchisqaykita,
chaynaqa kay chakrapipunim qamtapas vengakusqayki” nispa.
Chaynaqa Tayta Diospa nisqanman hinayá Nabotpa chakranman wikapaykamuy —nispa.
Rey Ocoziasta Jehu wañuchisqanmanta
27 Chaykuna pasasqanta Juda nacionpa reynin Ocozias rikuruspanmi Bet-hagan lawman riq ñanninta lluptikurqa.
Jehu qatispanmi qaparirqa:
—Waktawan wañuchiychik carretanpi —nispa.
Gur sutiyoq wichariq ñampim,
Ibleam llaqtapa hichpanpi yaqalla wañurachirqaku.
Meguido llaqtaman Ocozias lluptiruspanmi chaypiña wañururqa.
28 Chaymi serviqninkuna carretapi aparuspanku Jerusalen llaqtapi kaq “Davidpa Llaqtan” sutiyoq barriopi abuelonkunapa pampakusqan sitiopi pamparurqaku.
29 Chay Rey Ocoziasqa Juda nacionpim gobiernayta qallarirqa Acabpa churin Joram chunka hukniyoq watamanña gobiernachkaptin.
Jezabel sutiyoq warmita wañuchisqankumanta
30 Chaymantam Jehu pasarqa Jezreel llaqtaman.
Chaypi yachaq Jezabel sutiyoq warmiñataqmi Jehu hamusqanta yacharuspan ñawinkunata pintakururqa,
chukchantapas sumaqta allichakuruspanmi ventananman asuykurqa qawananpaq.
31 Llaqtapa punkunta Jehu pasachkaptinmi Jezabel niykurqa:
—Reynin wañuchiq yaw aZimri ¿hawkallachu kachkanki?
—nispa.
32 Jehumi ventanata qawarispan rimarirqa:
—¿Pitaq ñoqapa favorniypi kachkan?
—nispa.
Chaymi reypa wasinpi servikuq iskay kimsa runakuna ventanamanta Jehuta qawariykamurqaku.
33 Paykunatam Jehu kamachirqa:
—Chay warmita wischuykamuychik —nispa.
Calleman wischuykamuptinkum yawarnin perqamanwan caballokunaman pinkiykurqa.
Jehuñataqmi carretanwan chay warmipa hawanta pasarurqa.
34 Jezreel llaqtaman yaykuruspanmi mikuruspanña hinaspa upyayta tukuruspanña kamachirqa:
—Chay ñakasqa warmita qawaramuychik hinaspa pamparamuychik reypa churin kasqanrayku —nispa.