Sunem llaqtayoq warmipa kapuqninkunata kutiykachisqanmanta
8
Kawsarichisqan warmapa mamantam Eliseo nirqa:
—Kay nacionmanmi qanchis wata yarqayta Tayta Dios apachimunqa,
familiaykiwanyá munasqayki llaqtaman ripukuy chaypiña yachamunaykipaq —nispa.
2 Diospa runan Eliseopa nisqanpi hinamá chay warmi familianwan ripukurqa Filistea runakunapa allpanman,
chaypim yacharqaku qanchis wata.
3 Qanchis wata pasaruptinñataqmi filistea runakunapa allpanmanta kikinpa llaqtanman warmi kutiruspan reyta ruegakurqa wasintawan chakrankunata kutiykachipunankupaq.
4 Diospa runan Eliseopa serviqnin Giezitam rey nirqa:
—Eliseopa admirakuypaq llapa ruwasqankunamanta willaykuway —nispa.
5 Wañusqa warmata imaynatam Eliseo kawsarichisqanmanta reyman willachkaptinmi kawsarichisqan warmapa maman reyman chayarurqa wasinmanta chaynataq chakrankunamanta ruegakunanpaq chaymi reyman Giezi willaykurqa:
—Reylláy,
kay señorapa wawantam Eliseoqa kawsarirachirqa —nispa.
6 Reypas warmita tapuykuptinmi paypas chaynallata willakurqa chaymi serviqnin runata rey kamachirqa:
—Kay warmipa tukuy imankunatayá kutichipuychik,
kutichipuychiktaqyá saqerusqanmantapuni kunankama chakrankunapa rurusqantapas —nispa.
Aram nacionpi Hazael rey kasqanmanta
7 Damasco llaqtaman Eliseo chayaruptinmi Aram nacionpa reynin Ben-adad onqochkarqa chaymi payman willaykurqaku:
—Diospa runanmi kayman chayaramun —nispa.
8 Chaymi Hazael sutiyoq runata rey kamachirqa:
—Regalota aparikuspayki Diospa runanta watukaramuy hinaspa paynintakama Tayta Diosta tapukaramuy kay onqoyniymanta sanoyanayta otaq mana sanoyanaytapas yachanaypaq —nispa.
9 Damasco llaqtapi tukuy imapas allin kaqkunamanta regalota tawa chunka camellokunapi cargarikuspanmi Eliseo watukuq Hazael pasarqa.
Chayaruspanmi paypa qayllanpi sayaykuspan niykurqa:
—Churiki hina humillakuspanmi Aram nacionpa reynin Ben-adad qanman kachamuwan kaynata nispan:
“¿Kay onqoyniymanta sanoyasaqchu icha manachu?”
nispa.
10 Eliseom nirqa:
—Rispayki nimuy:
“Kay onqoynikimantaqa sanoyankim” nispa.
Chaywanpas Tayta Diosmi willaykuwan cheqaptapuni wañunanmanta —nispa.
11 Hazael penqarikunankamam Diospa runan qawarayarurqa hinaspanmi waqayta qallaykurqa.
12 Chaymi Hazael tapuykurqa:
—Taytáy ¿imanasqataq waqachkanki?
—nispa.
Eliseom nirqa:
—Yachanim Israelpa mirayninkuna ñakarichinaykita,
murallasqa llaqtankunatam kañaykunki,
mozonkunatam espadawan wañuchinki,
wawakunatam pampakunaman choqapaspa wañuchinki,
wiksayoq warmikunapa wiksantam kuchunki —nispa.
13 Chaymi Hazaelñataqmi nirqa:
—¿Kay serviqniki allqoqa imañataq kani chaykunata ruranaypaqqa?
—nispa.
Chaymi Eliseoñataq nirqa:
—Tayta Diosmi qawaykachiwan Aram nacionpiqa qamña rey kanaykita —nispa.
14 Hazael kutirispa reyninman chayaruptinmi tapuykurqa:
—¿Imanimusunkitaq Eliseoqa?
—nispa.
Chaymi Hazaelñataq nirqa:
—Sanoyankipunis —nispa.
15 Paqarinnintinñataqmi Hazael frazadata yakuman challpuruspan Ben-adadpa uyanman churarurqa hinaptinmi wañururqa.
Chaynapim Hazaelña rantinpi gobiernarqa.
Juda nacionpi Rey Joram gobiernasqanmanta
16 Acabpa churin Joram pichqa watamanña gobiernachkaptinmi Joram sutiyoq reypas Juda nacionpi gobiernayta qallaykurqa taytan Josafat gobiernachkaptinraq.
17 Chay Rey Joram gobiernayta qallaykuspanqa karqa kimsa chunka iskayniyoq watayoqmi,
Jerusalen llaqtapim gobiernarqa pusaq wata
18 ichaqa Israel nacion reykunapa kawsasqanta hinam kawsarqa,
kawsarqaqa Acabpa castankunapa kawsasqanta hinam.
Acabpa churintaqmi warminpas karqa chayraykum Tayta Diospa qayllanpipas mana allinkunata rurarqa.
19 Chaywanpas serviqnin Davidraykum Tayta Diosqa mana tukururqachu Juda nacionta.
Chaynataqa rurarqa wiñaypaq rataq achkiyta hina Davidmanwan mirayninkunaman qonanpaq prometesqanraykum.
20 Rey Jorampa tiemponpitaqmi Edom nacionpas Juda nacionpa munaychakusqan kachkaspan contranpi hoqarikururqa hinaspataqmi reyninkutapas churarurqaku.
21 Chayraykum Rey Joram llapa carretankunawan pasarqa Zair lawkama.
Tutayaruptinñataqmi Edom nacionpi kaqkunata atacarqaku,
aswanqa Edompa castankunam Jorampa chaynataq carretakunapi riq capitanninkunapa muyuriqninpi churakururqaku,
chaywanpas Jorampa runankunaqa lluptirurqakum wasinkuman.
22 Chaynapimá Edom nacionqa librakururqa Juda nacionpa munaychakuyninmanta kay libro qellqasqa kasqan punchawkama.
Hina chay tiempopitaqmi Libna llaqtapas Juda nacionpa munaychakuyninmanta librakururqa.
23 Jorampa wakin rurasqankunaqa Juda nacion reykunapa wakin rurasqanmanta willakuq libropim qellqasqa kachkan.
24 Abuelonku hina Joram wañuruptinmi abuelonkunapa pampakusqanpi otaq “Davidpa Llaqtan” sutiyoq barriopi pamparurqaku.
Paypa rantinpiñataqmi Ocozias sutiyoq churinña gobiernarqa.
Rey Ocozias Juda nacionpi gobiernasqanmanta
25 Acabpa churin Rey Joram chunka iskayniyoq watamanña Israel nacionpi gobiernachkaptinmi Jorampa churin Ocozias Juda nacionpi gobiernayta qallaykurqa.
26 Chay Rey Ocozias gobiernayta qallaykuspanqa karqa iskay chunka iskayniyoq watayoqmi,
Jerusalen llaqtapiqa gobiernarqa huk watallam.
Mamanpa sutinmi karqa Atalia,
chay Ataliaqa karqa Israel nacionpa reynin Omripa willkanmi.
27 Acabpa chaynataq paypa castankunapa kawsasqanman hina Ocozias kawsaspanmi Tayta Diospa qayllanpi mana allinkunata rurarqa.
Payqariki Acabpa ayllunmi karqa.
28 Aram nacionpa reynin Hazaelpa contranpi peleananpaqmi Ocozias rirqa Acabpa churin Joranwan.
Hazaelmi tarikurqa Galaad law Ramot llaqtapi.
Aram nacionniyoq soldadokuna Joramta heridaruptinkum
29 payqa kutikurqa Jezreel llaqtaman chay guerrapi peleaspa heridarachikusqanta hampichikamunanpaq.
Chaypi Acabpa churin Joramta hampichkaptinkum payta watukunanpaq rirqa huknin Jorampa churin Ocozias.
Chay rey Ocoziasqa karqa Juda nacionpa reyninmi.