7
Chaymi Eliseo nirqa:
—Uyariychik Tayta Diospa nisqanta:
“Paqarinmi kunan hina horata Samaria llaqtapa punkunpi qanchis kilo harina valenqa yaqa media onza qollqellaña,
chunka tawayoq kilo cebadapas valenqa yaqa media onza qollqellañam” nispa.
2 Chaymi brazonmanta rey hapipakunanpaq compañaqnin soldadokunapa jefenñataq Diospa runan Eliseota nirqa:
—¿Cielopi ventanakunataña Tayta Dios kunan kichaykuptinchu chaynaqa kanqa?
—nispa.
Hinaptinmi Eliseoñataq nirqa:
—Qamqa rikunkim ichaqa manam mikunkichu —nispa.
3 Llaqta zaguan punkupa hawa lawninpim kachkarqaku lepra onqoyniyoq tawa runakuna.
Paykunam ninakurqaku:
—Wañunanchikkamaqa ¿imapaqtaq kay hawapiqa tiyasunchik?
4 Llaqta ukuman yaykuyta atispaqa llaqtapichiki yarqaymanta wañurusunchik,
wañurusunchiktaqchiki kay hawapi kaspanchikpas.
Chaynaqa,
Aram nacionniyoq tropakunamanyá hakuchik.
Llakipayawaptinchikqa kawsasunchiki,
wañurachiwaptinchikqa wañusuntaqchiki —nispa.
5 Tutaykuchkaptinñam hatarispa pasarqaku Aram nacionniyoq tropakunapa campamenton lawman.
Campamentopa kasqanman chayaruspankuqa manam pitapas tarirqakuchu.
6 Aram nacionniyoq tropakunapa campamentonpim Señor uyarirachirqaña carretakunapa caballokunapa kallpayninta,
uyarirachirqataqmi nana-nanaq tropakunapa sinchi qapariynintapas.
Chayraykum ninakurqaku:
—Israel nacionpa reyninmi qollqewan contrataramun Het casta runakunapa reyninta chaynataq Egipto nacion reykunatapas contranchikpi hamuspanku peleanankupaq —nispa.
7 Chaynapimá tutaykuchkaptin carpankuta,
caballonkuta,
asnonkuta hinaspa campamentonkuta maymi kasqanpi saqeruspanku vidankurayku lluptikurqaku.
8 Lepra onqoyniyoqkuna campamentoman chayaruspankum karpaman yaykuruspa mikurqaku hinaspa upyarqaku.
Qollqeta,
qorita hinaspa pachakunata apaspankum pakaramurqaku.
Kutirispam huknin karpamanpas yaykuspa chaymantapas apaspa pakaramurqaku.
9 Chaymantam ninakurqaku:
—Kay rurasqanchikqa manam allinchu.
Kunan punchawqa allin noticia willakuna kachkaptinmi ñoqanchikqa upallakuykunchik.
Achikyanankama suyaspaqa castigasqam kachwan.
Kunanpuni pasaspanchikyá llaqtaman yaykuspa reypa wasinpi willakamusunchik —nispa.
10 Pasaspankumá llaqtapa punkun waqaychaqkunata qayaykacharqaku:
—Aram nacionniyoq tropakunapa campamentonmanmi rirqaniku chaymi mana pi runapas chaypiqa kanchu nitaqmi rimasqankupas uyarikunchu.
Caballokunawan asnokunallam chaypiqa watarayachkan.
Karpankupas imam kaqllam kachkan —nispa.
11 Punku waqaychaqkunam qayarikuspa reypa wasinpi willakurqaku.
12 Chay tutam rey hatarispan serviqninkunata nirqa:
—Aram nacionniyoq tropakunapa imam rurawasqanchikta nisqaykichik.
Yarqaymanta kasqanchikta yachaspankum campamentonkumanta lloqsiruspanku chakrakunapi pakakurunku kaynata nispanku:
“Llaqtamanta lloqsiramuptinkum kawsachkaqllata hapirusunchik hinaspam llaqtaman yaykurusunchik” nispa.
13 Chaymi huknin serviqnin nirqa:
—Kay llaqtapi puchoq pichqa caballokunapi silladakunata kacharuptinchikyá yacharamuchunku imaynam kasqanta.
Israel nacionpi wañuq runakuna hinallam paykunapas kawsanqa otaq wañunqa —nispa.
14 Caballokunata iskay carretakunaman wataruptinkum Aram nacionniyoq tropakunata qatipanankupaq rey kacharqa runankunata:
—Qawaramuychikyá —nispa.
15 Rispankum chayarurqaku Jordan Mayukama.
Ñanpiñataqmi tarirqaku pachakunatawan llapa imakunata Aram nacionniyoq tropakuna lluptispanku wichichisqankuta.
Kachasqanku runakuna kutiramuspankum reyman willaykurqaku.
16 Hinaptinmi llaqtamanta runakuna lloqsiruspanku Aram nacionniyoq tropakunapa campamentonmanta tukuy imata apakamurqaku.
Chay punchawpim Tayta Diospa nisqanpi hina qanchis kilo harina valerqa yaqa media onza qollqellaña,
chunka tawayoq kilo cebadapas valerqa yaqa media onza qollqellañam.
17 Brazonmanta hapipakunan soldadokunapa jefentam rey churarqa llaqtapa punkunpi cuidananpaq,
ichaqa runakunam tanqanakuspanku payta saruparurqaku wañunankama,
chaynaqa pasakurqa reywan tupasqan punchawpi Diospa runan Eliseopa nisqanpi hinam.
18 Reytam Diospa runan nirqaña:
—Paqarinmi kunan hina horata Samaria llaqtapa punkunpi chunka tawayoq kilo cebada valenqa yaqa media onza qollqellaña,
qanchis kilo harinapas valenqa yaqa media onza qollqellañam —nispa.
19 Chaynata Diospa runan niptinmá brazonmanta reypa hapipakunan soldadokunapa jefen nirqa:
—¿Cielopi ventanakunataña Tayta Dios kunan kichaykamuptinchu chaynaqa kanqa?
—nispa.
Hinaptinmi Eliseoñataq nirqa: