—Qawasqaykipi hinam kay yachasqanchik wasiqa kichkillaña.

2 Chaynaqa Jordan Mayupa patanman rispaykuyá sapakama qeruta kuchuramuspa chaypi wasita ruraramusaqku yachananchikpaq —nispa.

Eliseom nirqa:

—Riychikyá —nispa.

3 Chaymi hukninñataq nirqa:

—Ruegakuykim ñoqaykuwan rinaykipaq —nispa.

Chaymi Eliseo nirqa:

—Hakuchikyá —nispa.

4 Pasaspankum Jordan Mayupa patanman chayaruspa qerukuna kuchuyta qallaykurqaku.

5 Huknin runa qeruta kuchuchkaptinmi hachanpa fierron mayuman wichiykurqa chaymi qaparirqa:

—Ay taytáy,

chay hachaqa prestakamusqallam karqa —nispa.

6 Chaymi Diospa runan Eliseo tapurqa:

—¿Maylawmantaq wichiykun?

—nispa.

Wichiykusqan sitiota qawaykachiptinmi kaspita Eliseo kuchuruspan choqaykurqa hinaspam hachapa fierronta chaylla wampurachimurqa.

7 Chaymi Eliseo nirqa:

—Horqoy —nispa.

Chaymi haywarispan hachapa fierronta hapirurqa.

8 Aram nacionpa reyninmi pelearqa guerrapi Israel nacionpa contranpi.

Capitanninkunawan rimanakuspanmi nirqa:

—Reqsisqa sitiokunapim campamentoy kanqa —nispa.

9 Diospa runan Eliseom Israel nacionpa reyninman willachimurqa:

—Cuidakunkim,

amam waknintaqa rinkichu,

Aram nacionniyoq soldadokunam chaymanqa rinqaku —nispa.

10 Israel nacionpa reyninmi Diospa runanpa willachisqan sitioman qawamunankupaq wateqaqkunata kacharqa,

chaynatam achka kutipi rurarqa cuidakunanpaq.

11 Aram nacionpa reyninñataqmi chaykuna pasakusqanwan rabiasqallaña kaspan tropakunapa capitanninkunata huñuruspan tapurqa:

—¿Mayqannikichiktaq imapas rimanakusqanchikta willachkan Israel nacionpa reyninman?

—nispa.

12 Chaymi huknin capitan nirqa:

—Reynillayku,

manam ñoqaykuchu willachkanikuqa aswanqa Israel nacionpim kachkan Diosmanta willakuq Eliseo.

Paymi Israel nacionpa reyninmanqa willachkan puñunayki cuartopi rimasqaykitapas —nispa.

13 Reymi kamachirqa:

—Rispaykichikyá qawaramuychik maypim chay runa kasqanta chaynapi runakunata kachaspay hapirachimunaypaq —nispa.

Chaymi willaykurqaku:

—Dotan llaqtapim payqa kachkan —nispa.

14 Hinaptinmi rey kacharqa silladakunata,

carretakunata hinaspa achkallaña soldadokunata,

tutallan chayaruspankum llaqtapa muyuriqninpi churakururqaku.

15 Paqarinnintintam Diospa runanta serviq runa tutapayta hatariruspan lloqsirurqa chaymi Aram nacionniyoq tropakuna,

caballopi silladakuna hinaspa carretakuna llaqtapa muyuriqninpi kachkasqa.

Chaymi chay mozo qaparirqa:

—Ay taytáy ¿imatataq ruraykullasunchik —nispa.

16 Chaymi Eliseoñataq nirqa:

—Ama manchakuychu,

paykunawan kaqkunamantapas aswan achkam kachkan ñoqanchikwan kaqkunaqa —nispa.

17 Chaymi Diosta Eliseo mañakuspan nirqa:

—Dios Taytalláy,

kay mozopa ñawintayá kichaykuy chaynapi rikunanpaq —nispa.

Chay mozopa ñawinta Tayta Dios kichaykuptinmi rikururqa orqopa hawanpi silladakunawan rupachkaq carretakuna Eliseopa muyuriqninpi kachkaqta.

18 Aram nacionniyoq tropakuna Eliseopa kasqan llaqtata atacayta qallariptinkum Tayta Diosta mañakuspan Eliseo nirqa:

—Ruegakuykim kay runakunata ñawsayarachinaykipaq —nispa.

Chaymi Eliseopa mañakusqanman hina runakunata ñawsayarachirqa.

19 Hinaptinmi Eliseo nirqa chay tropata:

—Kayqa manam ñanchu nitaqmi llaqtachu.

Qatiwaychik ñoqam pusasqaykichik chay maskasqaykichik runaman —nispa.

Chaymi Samaria llaqtaman pusarurqa.

20 Samaria llaqtaman chayarachispanmi Tayta Diosta mañakurqa:

—Dios Taytalláy,

kay runakunapa ñawinta kichaykuy qawarikunankupaq —nispa.

Paykunapa ñawinta Tayta Dios kichaykuptinmi qawakuykurqaku Samaria llaqtapiña kasqankuta.

21 Israel nacionpa reyninmi paykunata rikuruspan Eliseota tapuykurqa:

—Taytáy ¿kay runakunataqa wañurachisaqchu?

—nispa.

22 Hinaptinmi Eliseoñataq nirqa:

—Ama wañuchiychu.

¿Yaqachum wañuchiwaq espadaykiwan chaynataq flechaykiwan presochasqaykikunata?

Paykunamanqa qoykuy mikuytawan yakutayá chaynapi mikuykuspa hinaspa upyaykuspa reyninkuman kutikunankupaq.

23 Convidopaq hina mikuyta rey yanurachiptinmi mikurqaku hinaspa upyarqaku,

chayña paykunata kachaykuptinmi reyninkuman kutikurqaku.

Chaymantapunim Aram nacionniyoq tropakunaqa Israel nacionmanqa manaña kutirqakuchu.

24 Chaykunapa qepantam Aram nacionpa reynin Ben-adad llapa tropankunata huñuruspan muyuramurqa Samaria llaqtata.

25 Chayraykum Samaria llaqta ancha yarqaypi rikurirurqa chaymi asnopa umantapas rantikuqku yaqa huk kilo qollqepi,

palomapa ispaynin sutiyoq waytapa cuarto kilo papantapas rantikuqku parte kilo masnin qollqepim.

26 Israel nacionpa reynin murallapa hawanta richkaptinmi huk warmi qaparispan nirqa:

Reynilláy,

libraykullaway —nispa.

27 Reyñataqmi nirqa:

—Tayta Dios mana yanapasuptikiqa ¿imaynatataq ñoqaqa yanapaykiman?

¿Maymantataq horqomusaq trigota otaq vinota?

—nispa.

28 Chaymantam rey tapuykurqa:

—¿Imataq pasasunki?

—nispa.

Hinaptinmi chay warmiñataq nirqa:

—Kay warmim niwarqa:

“Wawaykita aparamuy kunan punchaw mikurunanchikpaq.

Paqarinñataqmi ñoqapa wawayta mikurusunchik” nispa.

29 Wawayta yanuruspaykumá mikururqaniku.

Paqarinnintinñataqmi payta nirqani:

“Kunanñataqyá wawaykita apamuy mikurunanchikpaq” nispa.

Ichaqa payñataqmi wawanta pakarun —nispa.

30 Warmipa chayna nisqanta rey uyariruspanmi pachanta llikiparqa,

muralla hawanta richkaptinmi runakuna rikururqaku luto pachawan ukunpi pachakusqanta.

31 Reymi jurarqa:

—Safatpa churin Eliseopa umanta kunanpuni mana kuchuruptiyqa Diosyá llumpa-llumpayta castigawachun —nispa.

32 Eliseo wasinpi ancianokunapiwan tiyachkaptinmi payman rey kacharqa.

Kachasqan runa manaraq Eliseopata chayachkaptinmi Eliseo nirqa ancianokunata:

—¿Manachum yachankichik runa wañuchiq rey umayta kuchunanpaq kachamusqanta?

Chaynaqa,

kachamusqan runa chayaramuptinmi punkuta wichqaruspaykichik ama yaykuchimunkichikchu.

Chay runapa qepantaqa uyarichkanchikñam reyninpa hamusqanta —nispa.

33 Ancianokunawan Eliseo parlachkaptinraqmi rey chayaruspan nirqa:

—Tukuy kay ñakariyqa Tayta Diosmantam.

¿Imapaqñataq paypiqa confiakuymanpas?

—nispa.