Chaypimá Joiada nirqa:

—Kaypim kachkan reypa churin,

paymi Davidpa miraynin kasqanrayku Tayta Diospa prometesqanpi hina gobiernanqa.

4 Chaynaqa kaynatam rurankichik:

Sacerdotekunamanta hinaspa Leviy casta runakunamanta kimsaman rakikuruspaykichikmi samana punchawpi temploman yaykuq huknin parteñataq waqaychankichik templopa punkunkunata.

5 Huknin parteñataqmi waqaychankichik reypa palacionta,

huknin parteñataqmi waqaychankichik “Cimiento Punku” sutiyoq punkuta,

llapallan runakunañataqmi kanqa Tayta Diospa templonpa pationkunapi.

6 Amam pipas yaykunqachu Tayta Diospa templonmanqa,

yaykuspaqa-yaykunqaku sacerdotekunawan Leviy casta runakunallam imam ruranankuta ruranankupaq chaypaq sapaqchasqa kasqankurayku,

llapallan runakunañataqmi ruranqaku Tayta Diospa kamachisqanta.

7 Leviy casta runakuna reyta chawpicharuspankum makinpi armayoqkama kanqaku,

pipas temploman yaykuqqa wañunqam.

Qamkunamá reyta waqaychankichik maylawman riptinpas —nispa.

8 Leviy castakunawan llapallan Juda nacionpi kaqkunamá rurarqaku sacerdote Joiadapa kamachisqanta hina.

Sapakama jefekunam kamachirqaku samana punchawpi yaykuqkunatawan samana punchawpi lloqsiqkunata,

sacerdote Joiadaqa manam kacharirqachu rurananta tukuruq runatapas.

9 Sacerdote Joiadaqa capitankunamanpas qoykurqam Rey Davidpa lanzankunatawan hatunpas taksapas harkachikuna armankunata,

chay armakunaqa Diospa templonpim waqaychasqa karqa.

10 Llapallan runakunatam seqellataña churarurqa armayoqtakama,

paykunataqa churarurqa templopa alleq kuchunmanta ichoq law kuchunkamam,

altarñataqmi karqa paykunapa chawpinpi,

llapan lawmantam reytaqa waqaycharqaku.

11 Sacerdote Joiadam churinkunapiwan horqoramurqaku Rey Ocoziaspa churin Joasta hinaspam umanman coronata churarqaku,

hapichirqataqmi Chunkantin Kamachikuykunatapas,

aceiteta rey kananpaq umanman tallispankum nirqaku:

—¡Kawsachun reyninchik!

—nispa.

12 Runakunapa kallpasqankutawan “Kawsachun reyninchik” nisqankuta Atalia uyariruspanmi Tayta Diospa templonpi runakunapa kasqanman yaykurqa.

13 Chaypim reyta rikururqa temploman yaykuna pilarpa waqtanpi,

rikururqataqmi jefekunatapas chaynataq cornetilla tocaqkunatapas reypa waqtanpi sayachkaqta.

Llapallan runakunañataqmi kusikuyllawanña tocarqaku cornetillakunata.

Takiqkunapas tocanankuwanmi alabachkarqaku,

chaykunata Atalia qawaykuspanmi pachantapas llikipakuspan nirqa:

—¡Traicionmi kayqa,

traicionmi kayqa!

—nispa.

14 Sacerdote Joiadam tropakunapa capitanninkunata lloqsirachispan nirqa:

—Kay chawpikichikmanta hawaman Ataliata horqoruychik.

Pitapas payta qatimuqtaqa wañurachiychikyá,

Tayta Diospa templonpiqa amam paytaqa wañuchinkichikchu —nispa.

15 Ataliata lloqsirachispankum reypa palacionman riq “Caballokunapa Punkun” sutiyoq punkupi wañurachirqaku.

16 Sacerdote Joiadam contratota rurarqa reywan hinaspa llapallan runakunawan chaynapi Tayta Diospa runankunaña kanankupaq.

17 Llapallan runakuna Baalpa templonman yaykuruspankum tuñirachirqaku altarninkunatawan taytachankunata,

pasaypaqta ñuturuspankum Matan sutiyoq Baalpa sacerdotentapas altarkunapa ñawpaqninpi wañurachirqaku.

18 Joiadaqa guardiakunatapas churarqam Tayta Diospa templonpi,

chay guardiakunataqa kamachirqa Leviy casta sacerdotekunam,

chay sacerdotekunataqa Rey Davidraqmi muyuyninpi llamkanankupaq churarqa,

chaynataqa churarqa Moisespa yachachikuyninpi qellqasqanman hina animalkunata wañuchispa kañanankupaqmi,

chaykunataqa kusikuywan takistinmi ruraqku Davidpa kamachisqanman hina.

19 Joiadaqa Tayta Diospa templonman yaykuna punkukunapipas churarqam punkukunawan cuentallikuqkunata,

chaypiqa churarqa mana chuyanchasqa kaqkuna mana yaykunankupaqmi.

20 Qayachirqataqmi capitankunatapas,

llapallan runakunapi allin reqsisqakunatapas,

runakunapi kamachikuqkunatapas chaynataq llapallan runakunatapas.

Chaymantam Tayta Diospa templonmanta reyta pusarqaku reypa palacionman,

hanay punkunta yaykuruspankumá reypa tiyananpi reyta tiyaykachirqaku.

21 Llaqtapi llapallan runakunam kusisqallaña karqaku.

Llaqtapas hawkañataqmi karqa Ataliata espadawan wañurachiptinku.