4 Chaykuna pasaruptinmi Joasqa piensarqa Tayta Diospa templon allichachiyta.

5 Sacerdotekunatawan Leviy casta runakunata huñurachispanmi nirqa:

—Juda nacionpi llaqtakunaman lloqsispayá Israel casta llapallan runakunamanta qollqeta mañamuychik,

chaytaqa huñumunkichik sapa wata Diosninchikpa templon allichachinanchikpaqmi.

Chaytaqa apurawmanyá ruramuychik —nispa.

Leviy casta runakunaqa manam apurawmanchu ruramurqaku chay kamachisqantaqa.

6 Chayraykum sacerdotekunapa jefen Joiadata rey qayachimuspan nirqa:

—¿Imanasqataq Leviy casta runakunataqa mana hikutarqankichu Juda nacionmantawan Jerusalen llaqtamanta impuestokunata apamunankupaq?

¿Manachu chaykunataqa Tayta Diospa serviqnin Moiseswan Israel casta huñunasqa runakuna kamachirqaku Chunkantin Kamachikuynin waqaychana karpapaq?

—nispa.

7 Mana allin ruraq Ataliam wawankunapiwan porfiakuspa yaykururqaku Diospa templonman hinaspam Baal sutiyoq taytachakunata adorarqaku Tayta Diospaq sapaqchasqa serviciokunawan servichikuspa.

8 Huk baultaña ruranankupaq rey kamachikuptinmi chay baulta churarqaku Tayta Diospa templonpa zaguan punkunman.

9 Reymi willachimurqa Juda nacionpiwan Jerusalen llaqtapi kaqkuna Tayta Diosman impuestota apamunankupaq.

Chaynata ruranankupaqmi Diospa serviqnin Moises chunniqpi kachkaptinku kamachirqa Israel casta runakunata.

10 Hinaptinmi llapallan jefekunapiwan llapallan runakuna kusikuywan apamurqaku impuestota,

chaykunataqa baulmanmi churarqaku huntanankama.

11 Leviy casta runakunam aparqaku baulta reypa churasqan cuentallikuqkunaman,

achka qollqe kasqanta chay runakuna qawaykuptinñataqmi reypa secretarion hamuq,

paywantaqmi hamuq sacerdotekunapa jefenpa churasqan runakunapas,

paykunam baulpi qollqeta talliramuspa maymi kasqanman kaqlla churamuqku,

sapa kutilla chaynata ruraspam achka-achka qollqeta huñururqaku.

12 Reypiwan Joiadañataqmi chay qollqeta qoqku Tayta Diospa templonpi llamkaqkunaman,

paykunañataqmi Tayta Diospa templonta allichanankupaq contratarqaku rumi labraqkunatawan carpinterokunata.

Contratarqakutaqmi fierropi hinaspa broncepi llamkaqkunatapas Tayta Diospa templonta allichanankupaq.

13 Llamkachiqkuna allinta llamkachispankum allinta allicharqaku,

Diospa templonmá sumaq allichasqa karqa imaynam ñawpaq tiempopi kasqanman hinaraq.

14 Allichayta tukuruspankuñataqmi reymanwan Joiadaman apamurqaku qollqe puchuqkunata hinaptinmi paykunañataq chaykunamanta rurachirqaku Tayta Diospa templonpi servikuq lliw kañana ofrendapaq kaq serviciokunata hinaspa wisllakunata,

rurachirqakutaqmi qorimantawan qollqemanta wakin serviciokunatapas.

Joiada kawsanankamaqa mana tukuytam Tayta Diospa templonpi wañuchirqaku lliw kañana ofrendakunata.

15 Machuyaruspanmi Joiada wañukurqa,

payqa yuyaq kayninpiñam pachak kimsa chunkan watanpi wañukurqa.

16 Hinaptinmi pamparurqaku “Davidpa Llaqtan” sutiyoq barriopi kaq reykunapa pampakusqanpi,

chaypiqa pamparurqaku Israel casta runakunapaqpas,

Diospaqpas chaynataq templonpaqpas allinkuna rurasqanraykum.

17 Joiada wañukuptinmi hamurqaku Juda nacionpi jefekuna,

reypa qayllanpi qonqorakuptinkum rey kasukurqa paykunapa consejasqanta.

18 Abuelonkupa yupaychasqan Tayta Diospa templonta qepanchakuruspankum adorarqaku Asera sutiyoq mamachakunataña chaynataq huk rikchaq taytachakunataña,

chay hucharaykum Dios piñakururqa Juda nacionniyoq runakunapa contranpi chaynataq Jerusalen llaqtayoq runakunapa contranpipas.

19 Chaywanpas Tayta Diosmi kacharqa paymanta willakuqkunata chaynapi paykuna rimapayaptin Diosman kutirikunankupaq ichaqa chay willakuqkuna anyachkaptinkupas paykunaqa manam kasukurqakuchu.

20 Hinaptinmi Diospa Espiritun huntaykurqa sacerdote Joiadapa churin Zacariasman chaymi altoneqman seqaruspan Diospa nisqanta nirqa:

—¿Imanasqataq ñoqa Tayta Diospa kamachisqaykunata mana kasukunkichikchu?

Chayraykum mana allinkuna hamusunkichik —nispa.

21 Aswanqa Zacariaspa contranpi hatariruspankum reypa kamachisqanman hina rumiwan chamqaparurqaku,

paytaqa wañurachirqaku Tayta Diospa templonpa pationpim.

22 Rey Joasmi Zacariasta wañurachirqa Zacariaspa taytan Joiadapa ñawpaq tiempopi kuyapayakuynintapas mana kaqpaqpas hapispa.

Zacariasmi wañuykuchkaspanña nirqa:

—Tayta Diosyá kayta qawachun hinaspayá cuentata mañachun —nispa.

23 Tarpuy tiempopim Aram nacionniyoq tropakuna hamururqaku Rey Joaspa contranpi,

Juda nacionmanwan Jerusalen llaqtaman yaykuruspankum wañurachirqaku llapallan runakunapa jefenkunata hinaspam tukuy imata qechuruspanku apachirqaku Damasco llaqtapi kaq reyman.

24 Aram nacionmanta hamuq tropakunaqa asllam hamurqaku ichaqa Tayta Diosmi paykunapa makinman churaykurqa Juda nacionniyoq achka-achka tropakunata,

chaynataqa qoykurqa abuelonkunapa yupaychasqan Tayta Diosta qepanchakurusqankuraykum.

Chaynatamá Aram nacionniyoq tropakuna Rey Joasta castigarqaku.

25 Aram nacionniyoq runakuna kutikuspankum Rey Joasta saqerurqaku anchallaña nanaypi hinaptinmi serviqninkuna hatarirurqaku paypa contranpi.

Sacerdote Joiadapa churinta wañurachisqanraykum wañurachirqaku camallanpi,

chaymantam pamparurqaku “Davidpa Llaqtan” sutiyoq barriopi,

paytaqa pamparurqaku manam reykunapa pampakunanpichu.

26 Rey Joaspa contranpi hatariqkunam karqa Simeatpa wawan Zabad sutiyoq Amon casta runa hinaspa Simritpa wawan Jozabad.

27 Rey Joaspa churinkunamantaqa qellqasqa kachkan reykunapa vidanmanta willakuq libropim,

chaypitaqmi qellqasqa kachkan paypa contranpi Diospa willachisqankunapas chaynataq Diospa templon allichachisqanpas.

Paypa rantinpim gobiernarqa churin Amasias.