4 Sacerdotekunatam Rey Joas nirqa:

—Temploman apamusqanku Diospaq sapaqchasqa llapa qollqetayá sapa runapa contribucion qosqantawan chaynataq voluntadmanta qosqanku qollqetawan

5 sacerdotekuna chaskimuychik,

chaykunataqa sapakamam chaskimunkichik reqsisqaykichik runakunamanta,

chaykunawanyá Tayta Diospa templonpi kaq raqrakunata allichachiychik —nispa.

6 Chaywanpas iskay chunka kimsayoq watamanña Joas gobiernachkaptinmi,

sacerdotekunaqa manaraq allichachirqakuchu templopi raqrasqa uchkukunataqa.

7 Chayraykum Rey Joas sacerdote Joiadatawan wakin sacerdotekunata qayachimuspan nirqa:

—¿Imanasqataq templopi raqrasqa uchkukunataqa manaraq allichachinkichikchu?

Kunanmantaqa manam qamkunañachu qollqetaqa chaskinkichik reqsisqaykichik runakunamantaqa,

chay qollqetaqa qochinkichik allichaq runakunamanñam chaynapi paykunaña Tayta Diospa templonpi kaq raqrakunata allichanankupaq —nispa.

8 Chaymi sacerdotekunaqa kasukuspanku manaña qollqetaqa chaskirqakuñachu nitaqmi templopi raqrasqa uchkukunatapas allichachirqakuñachu.

9 Sacerdote Joiadam rurarachirqa baulta tapanpi uchkuyoqta hinaspam churarurqa altarpa hichpanpi otaq temploman yaykuqkunapa alleq lawninpi.

Punku waqaychaq sacerdotekunam temploman apasqanku llapa qollqeta chay baulman hinaqku.

10 Baulpi achkallaña qollqe karuptinmi reypa secretarionwan sacerdotekunapa jefen rispanku qollqeta yupaspanku wayqakunaman churaspa templopi waqaychaqku.

11 Chay qollqeta pesaruspam qoqku templowan cuentallikuqkunaman,

paykunañataqmi pagaqku carpinterokunaman,

templo allichaqkunaman,

12 albañilkunaman hinaspa rumi labraqkunaman.

Chay qollqewanmi rantiqku qerukunatawan labrasqa rumikunata chaynapi Tayta Diospa templonpi raqrasqa uchkukunata allichanankupaq.

Templopa tukuy imankuna allichaypimá qollqeta gastarqaku.

13 Tayta Diospa templonman apamusqanku chay qollqemantaqa manam ruraqkuchu medianokunata,

mecha limpianakunata,

tazonkunata nitaq cornetillakunatapas.

Templopaqqa manam qollqemanta nitaq qorimanta ima servicionkunatapas rurarqakuchu.

14 Aswanqa templota allichaspa llamkaqkunallamanmi pagaqku.

15 Llamkaqkunaman paganankupaq qollqe hatalliq runakunamantaqa manam cuentata mañaqkuchu confianza runakuna kasqankurayku.

16 Culparayku hinaspa hucharayku ofrenda qollqetaqa manam Tayta Diospa templonmanqa apaqkuchu,

chay qollqeqa sacerdotekunapaqmi karqa.

17 Aram nacionpa reynin Hazaelmi Gat llaqtapa contranpi peleananpaq rirqa,

venceruspanñataqmi Jerusalen llaqtapa contranpiña pasarqa.

18 Chayraykum Juda nacionpa reynin Joas kikinpa sapaqchasqan ofrendakunata qoykurqa Aram nacionpa reynin Hazaelman,

qoykurqataqmi Juda nacionpa reynin Josafatpa,

Jorampa,

Ocoziaspa otaq abuelonkunapa sapaqchasqan ofrendakunatapas chaynataq templopi hinaspa reypa palacionpi churasqanku qoritapas hinaptinmi chay Rey Hazaelqa Jerusalen llaqtamanta kutikurqa.

19 Joaspa wakin rurasqankunaqa Juda nacion reykunapa wakin rurasqanmanta willakuq libropim qellqasqa kachkan.

20 Serviqnin jefekunam Joaspa contranpi hoqarikuruspanku Sila llaqtaman riq Bet-milo sutiyoq sitiopi wañurachirqaku.

21 Chaynaqa Rey Joastamá wañurachirqaku Simeat sutiyoq warmipa wawan Isacarwan Somerpa wawan Josabad,

paykunaqa karqa serviqninkunam.

Joastam pamparurqaku Jerusalen llaqtapi abuelonkunapa pampakusqan sitiopi otaq “Davidpa Llaqtan” sutiyoq barriopi.

Paypa rantinpim gobiernarqa churin Amasias.