Rey Joacazpa gobiernasqanmanta
13
Ocoziaspa churin Joas iskay chunka kimsayoq watamanña Juda nacionpi gobiernachkaptinmi Jehupa churin Joacaz gobiernayta qallaykurqa Samaria llaqtapi.
Joacasqa gobiernarqa chunka qanchisniyoq watam.
2 Tayta Diospa qayllanpim mana allinkunata rurarqa hinaspanmi Israel nacion huchallichiq Nabatpa churin Jeroboam hina huchallikurqa,
chayna ruraytaqa manam saqerqachu.
3 Chayraykum Israel nacionpa contranpi Tayta Dios anchallataña piñakuruspan Aram nacionpa reynin Hazaelman hinaspa paypa churin Ben-adadman unay wata munaychakunanpaq qoykurqa.
4 Tayta Diosta Joacaz ruegakuptinmi Israel nacionniyoq runakunapa ñakarisqanta qawaspan Joacazpa mañakusqanta uyariykurqa,
paykunataqariki Aram nacionpa reyninmi ñakarichirqa.
5 Israel nacionman libraqninta Tayta Dios qoykuptinmi Israelpa mirayninkunaqa Aram nacionmanta librakuruspanku ñawpaqta hina wasinkupiña hawka yachakurqaku.
6 Chaywanpas manam saqerqachu Israel nacion huchallichiq Jeroboam casta runakunapa huchallikusqantaqa.
Paykunaqa hinallamá huchallikurqaku.
Asera sutiyoq mamachapas hinallam karqa Samaria llaqtapi.
7 Rey Joacazpa soldadonkunamanta puchuqkunam karqa caballopi sillakuq pichqa chunka runakuna,
guerrapaq chunka carretakuna,
chaki-puri chunka waranqa soldadokuna.
Aram nacionpa reyninmi paykunataqa chinkarachirqa hinaspataqmi ñutu allpata hinaña saruparurqa.
8 Joacazpa wakin rurasqankunaqa chaynataq mana manchakuspa rurasqankunaqa Israel nacion reykunapa wakin rurasqanmanta willakuq libropi qellqasqam kachkan.
9 Joacaz abuelonkuna hina wañuruptinmi Samaria llaqtapi pamparurqaku,
paypa rantinpim churin Joasña gobiernarqa.
Israel nacionta Rey Joas gobiernasqanmanta
10 Rey Joas kimsa chunka qanchisniyoq watamanña Juda nacionpi gobiernachkaptinmi,
Joacazpa churin Joas Israel nacion gobiernayta qallaykurqa,
paymi Samaria llaqtapi gobiernarqa chunka soqtayoq wata.
11 Tayta Diospa qayllanpim mana allinkunata rurarqa.
Israel nacion huchallichiq Nabatpa churin Jeroboam hinam huchallikurqa,
chayna ruraytaqa manamá saqerqachu.
12 Joaspa wakin rurasqankunaqa chaynataq mana manchakuspa Juda nacion Rey Amasiaspa contranpi peleasqanqa Israel nacion reykunapa wakin rurasqanmanta willakuq libropim qellqasqa kachkan.
13 Abuelonkuna hina Joas wañukuptinmi Jeroboamña rantinpi gobiernarqa.
Israel nacion reykunapa pampakusqan Samaria llaqtapim Joasta pamparqaku.
Eliseopa wañukusqanmanta
14 Wañukunanpaqña Eliseo onqochkaptinmi Eliseota watukunanpaq Israel nacionpa reynin Joas rirqa.
Eliseopa qayllanpi waqaspanmi nirqa:
—Taytáy,
taytáy,
qamqa Israel nacionpaqmi carretakunawan caballopi sillada tropakuna hina karqanki —nispa.
15 Eliseom payta nirqa:
—Flechana arcotawan flechakunata hapiy —nispa.
—Kunanñataqyá flechanaykipaq hinaña churakuy —nispa.
—Intipa qespimunan lawpi kaq ventanata kichaykuy —nispa.
Kichaykuptinmi Eliseo nirqa:
—Flecharuy hawaman —nispa.
Flecharuptinmi Eliseo rimarirqa:
—Salvananpaq kaq Tayta Diospa flechanmi wak flechaqa,
wak flechaqa Aram nacionpa contranpi venceq flecham.
Afec llaqta lawpim Aram soldadokunata tukunaykikama wañuchinki —nispa.
18 Yapamantam Eliseo kamachirqa:
—Flechakunata hapiy —nispa.
Flechakunata Israel nacionpa reynin hapiykuptinmi Eliseo nirqa:
—Pampata waqtay flechawan —nispa.
Kimsakama waqtaruspanmi sayarurqa.
19 Chaymi Diospa runan Eliseoñataq reypaq piñakuspan payta nirqa:
—Pichqa kutikama otaq soqta kutikama waqtaruspaqa Aram nacionniyoq runakunatam manaña chullallapas puchunankama wañuchiwaq karqa.
Chaynaqa kimsa kutikamallam Aram nacionta vencenki —nispa.
20 Eliseo wañukuptinmi pamparurqaku.
Watan-watanmi Moab nacionmanta salteaq tropakuna Israel nacionman hamurqaku.
21 Huk punchawmi runakuna wañukuqpa ayanta pampachkarqaku hinaptinmi qonqaymanta rikururqaku huk salteaq tropata chaymi ayata Eliseopa sepulturanman wischuykuspa ayqekurqaku.
Eliseopa tullunkunaman chay wañukuqpa ayan tuparuspanmi kawsarirurqa hinaspam sayarirurqa.
22 Aram nacionpa reynin Hazaelmi Israel nacionniyoq runakunata ñakarichirqa tukuy tiempo Rey Joacazpa gobiernasqan watakama.
23 Aswanqa Tayta Diosmi paykunata kuyapayaspan paykunamanta llakipayarikurqa hinaspa favorecerqa,
chaynataqa rurarqa Abrahanwan,
Isaacwan hinaspa Jacobwan contratota rurasqanraykum.
Chayraykum Diosqa mana munarqachu paykuna chinkarachiytapas nitaq qayllanmanta wischuruytapas kay libro qellqasqa kasqan punchawkama.
24 Aram nacionpa reynin Hazael wañuruptinmi churin Ben-adad sutiyoq runaña rantinpi gobiernarqa.
25 Hazaelmi guerrata ruraspan Rey Joaspa taytan Joacazmanta llaqtakunata qechurqa,
chay llaqtakunatam Rey Joas kaqllamanta dueñochakurqa.
Kimsakama Ben-adadta Rey Joas venceruspanmi Israelman llaqtakunata kutiykachirqa.