Rey Amasiaspa gobiernasqanmanta
14
Joacazpa churin Joas iskay watamanña Israel nacionpi gobiernachkaptinmi Juda nacionpa reynin Joaspa churin Amasias gobiernayta qallaykurqa.
2 Iskay chunka pichqayoq watanpi kachkaspanmi Amasiasqa gobiernayta qallaykurqa.
Payqa iskay chunka isqonniyoq watam Jerusalen llaqtapi gobiernarqa.
Paypa mamanqa karqa Jerusalen llaqtayoq Joadan sutiyoq warmim.
3 Rey Amasiasqa Tayta Diospa qayllanpim allinkunata rurarqa ichaqa manañam ñawpaq abuelon David hinañachu,
taytan Joaspa rurasqankunata hinam tukuyta rurarqa.
4 Chaywanpas moqokunapi capillakunaqa hinallam karqa chayraykum runakunapas animalkunata hinalla chaypi wañuchispa kañaqku,
kañaqkutaqmi inciensotapas.
5 Gobiernonpi allintaña takyaruspanmi wañurachirqa taytanta wañuchiq serviqninkunata.
6 Wañuchisqan runakunapa churinkunataqa manam wañuchirqachu Moisespa qellqasqan yachachikuy libropi Tayta Diospa kamachisqanpi hina.
Tayta Diosmi nirqa:
—Churi-wawankupa huchallikusqanmantaqa amam tayta-mamantaqa wañuchinkichikchu nitaqmi tayta-mamanpa huchanmantapas churi-wawankutaqa wañuchinkichikchu.
Ichaqa Huchallikusqankumantaqa sapakamatam wañuchinkichik —nispa.
7 Amasiasmi Edom casta chunka waranqa soldadokunata wañurachirqa “Kachi Qechwawan” sutichasqa sitiopi.
Guerrapi venceruspanmi Sela llaqtata dueñochakururqa hinaspam Jocteelwan suticharurqa kay libro qellqasqa kasqan punchawkama.
8 Chaymantam Amasias comisionta kacharqa Joacazpa churin otaq Jehupa willkan Israel nacionpa reynin Joaspata,
paytam nichimurqa:
—Hamuy qanwanñataq qawanakuykunaypaq —nispa.
9 Hinaptinmi Israel nacionpa reynin Joasñataq Juda nacionpa reynin Amasiasta nichimurqa:
—Libano montepi wiñaq cardo qoram Libano montepi kaq cedro sachata nichimurqa:
“Warmi churikita qari churiywan casarachiy” nispa.
Ichaqa Libano monte animalmi chayninta pasaspan cardo qorata saruparurqa.
10 Edom nacionniyoq runakunata venceruspaykim hatun tukuqllaña rikurirunki.
Chaynaqa chaywan alabakuspaykiyá hawkalla wasikipi kakuy.
¿Imanasqataq peleayta munanki qampas chaynataq Juda nacionpi kaqkunapas llakillapi rikurinaykichikpaq?
—nispa.
11 Amasias mana kasukuyta munaptinmi Israel nacionpa reynin Joasqa tupanakurqa Juda nacionpa reynin Amasiaswan Bet-semes llaqtapi,
chay llaqtaqa kachkan Juda nacionpim.
12 Juda nacionniyoq soldadokunata Israel nacion soldadokuna venceruptinmi sapakama wasinkuman lluptikurqaku.
13 Bet-semes llaqtapimá Israel nacionpa reynin Joas presocharurqa Joaspa churin Juda nacionpa reynin Amasiasta hinaspam pusarqa Jerusalen llaqtaman.
Amasiasqa karqa Joaspa churinmi otaq Ocoziaspa willkanmi.
Rey Joasmi Jerusalen llaqtapa murallanta taqmarurqa pachak pusaq chunkan metro largoyoqta Efrain sutiyoq zaguan punkumanta esquinapi zaguan punkukama.
14 Paymi apakurqa Tayta Diospa templonpi kaq llapa qori-qollqetawan llapa serviciokunata hinaspa reypa wasinpi tarisqan llapa qori-qollqeta.
Allin reqsisqa wakin runakunata garantiapaq hina Rey Joas pusaspanmi Samaria llaqtaman kutikurqa.
15 Rey Joaspa wakin rurasqankunaqa chaynataq Juda nacionpa reynin Amasiaswan mana manchakuspa imaynam peleasqanqa Israel nacion reykunapa wakin rurasqanmanta willakuq libropim qellqasqa kachkan.
16 Rey Joas abuelonkuna hina wañuruptinmi Israel nacion reykunapa pampakusqan Samaria llaqtapi pamparqaku,
rantinpim churin Jeroboamña gobiernarqa.
17 Israel nacionpa reynin Joacazpa churin Joas wañukusqanmantam Juda nacionpa reynin Joaspa churin Amasiasqa kawsarqa chunka pichqayoq watataraq.
18 Amasiaspa wakin rurasqankunaqa qellqasqa kachkan Juda nacion reykunapa wakin rurasqanmanta willakuq libropim
19 Jerusalen llaqtapi kaqkunam Rey Amasiaspa contranpi hoqarikururqaku chaymi Amasiasqa Laquis llaqtaman lluptikurqa,
aswanqa Laquis llaqtakama qatispankum chaypi wañurachimurqaku.
20 Paypa ayanta Jerusalen llaqtaman caballokunapi apamuspankum “Davidpa Llaqtan” sutiyoq barriopi abuelonkunapa pampakusqan sitiopi pamparqaku.
21 Juda nacionpi kaq llapallan runakunam Azariasta rey kananpaq churarurqaku taytan Amasiaspa rantinpi,
payqa kachkarqa chunka soqtayoq watayoqllaraqmi.
22 Abuelonkuna hina Amasias wañukuptillanmi churin Azarias Elat llaqtata kutirachikurqa Juda nacionpaq hinaspam mosoqmanta hatarichirqa.
Joaspa churin Rey Jeroboam Israel nacionpi gobiernasqanmanta
23 Juda nacionpa reynin Joaspa churin Amasias chunka pichqayoq watamanña gobiernachkaptinmi,
Israel nacionpa reynin Joaspa churin Jeroboam Samaria llaqtapi gobiernayta qallaykurqa.
Jeroboanmi gobiernarqa tawa chunka hukniyoq wata.
24 Tayta Diospa qayllanpim mana allinkunata rurarqa.
Israel nacion huchallichiq Nabatpa churin Jeroboam hinam huchallikurqa.
25 Joaspa churin Jeroboanmi Israel nacionpa linderonkunata kutirachikurqa Hamat lawman yaykuna qasamanta Araba law qochakama.
Chaytaqa rurarqa Israelpa yupaychasqan Tayta Diospa nisqanman hinam.
Tayta Diosmi rimarqa paymanta willakuq Jonaswan.
Jonasmi karqa Amitaipa churin Gat-hefer llaqtapi yachaq.
26 Hatun ñakariypi Israel nacionniyoq runakuna kawsasqankuraykum Tayta Dios paykunata qawarirqa.
Manañam pipas yanaparqañachu Israel naciontaqa chaymi libre kaqpas hinaspa sirviente kaqpas llapallanku ñakarirqaku.
27 Kay pachamanta Israelpa sutin chinkarachiyta Tayta Dios manaraq munaspanmi Joaspa churin Jeroboanwan Israel nacionta salvarurqa.
28 Jeroboampa wakin rurasqankunaqa,
mana manchakuspan rurasqankunaqa,
guerrapi llapa peleasqankunaqa chaynataq Juda nacionpa munaychakusqan Damasco llaqtata hinaspa Hamat llaqtata Israel nacionpaq imaynam kutichikusqanqa Israel nacion reykunapa wakin rurasqanmanta willakuq libropim qellqasqa kachkan.
29 Israel nacionpi gobiernaq abuelonkuna hinam Jeroboam wañukurqa.
Paypa rantinpiñataqmi churin Zacariasña gobiernarqa.