3 Taytan Amasiaspa tukuy ima rurasqanta hinam Tayta Diospa qayllanpi allin kaqkunata rurarqa.

4 Chaywanpas moqokunapi capillakunaqa hinallam karqa chayraykum runakunapas animalkunata hinalla chaypi wañuchispa kañaqku,

kañaqkutaqmi inciensotapas.

5 Chayna allinkunata rurachkaptinpas Tayta Diosmi lepra onqoywan castigarurqa hinaptinmi wañunan punchawkama sapaq wasipi chaywan onqorqa.

Chayna kaptinmi palacionpiqa churin Jotamña quejakunata arreglaq.

6 Rey Azariaspa wakin rurasqankunaqa Juda nacion reykunapa wakin rurasqanmanta willakuq libropim qellqasqa kachkan.

7 Abuelonkuna hina Rey Azarias wañukuptinmi,

“Davidpa Llaqtan” sutiyoq barriopi pamparqaku.

Paypa rantinpim churin Jotamña gobiernarqa.

8 Juda nacionpa reynin Azarias kimsa chunka pusaqniyoq watamanña gobiernachkaptinmi Jeroboampa churin Zacarias Israel nacionpi gobiernayta qallarirqa,

soqta killam Samaria llaqtapi gobiernarqa.

9 Abuelonkuna hinam mana allinkunata Tayta Diospa qayllanpi rurarqa.

Israel nacion huchallichiq Nabatpa churin Jeroboam hinam huchallikurqa.

10 Zacariaspa contranpim Jabespa churin Salum hoqarikururqa.

Runakunapa qayllanpi atacaruspanmi wañurachirqa hinaspam paypa rantinpi gobiernarqa.

11 Zacariaspa wakin rurasqankunaqa Israel nacion reykunapa wakin rurasqanmanta willakuq libropim qellqasqa kachkan.

12 Tayta Diosmi nirqa Rey Jehuman:

—Churikikunam Israel nacionpi gobiernanqa willkaykipa willkankama —nispa.

Hinaptinmi chayna karqa.

13 Juda nacionpa reynin Uzias kimsa chunka isqonniyoq wataña gobiernachkaptinmi Jabespa churin Salum gobiernayta qallaykurqa.

Paymi gobiernarqa huk killalla Samaria llaqtapi.

14 Gadipa churin Manahem sutiyoq runam Tirsa llaqtamanta Samaria llaqtaman rispan Jabespa churin Salumta wañurachirqa hinaspam paypa rantinpi gobiernarqa.

15 Salumpa wakin rurasqankunawan Zacariaspa contranpi hoqarikuruspa imam rurasqankunaqa Israel nacion reykunapa wakin rurasqanmanta willakuq libropim qellqasqa kachkan.

16 Chaymantañataqmi chay Manahem sutiyoq runaqa Tirsa llaqtamanta qallaykuspa atacarqa Tifsa llaqtata chaynataq muyuriqninpi llaqtakunatapas,

chay llaqtakunata saqueaspanmi llapallan wiksayoq warmikunapa wiksantapas kuchururqa.

Tifsa llaqtapa punkunkunata chaypi yachaqkuna mana kichasqanraykum chaynataqa rurarqa.

17 Juda nacionpa reynin Azarias kimsa chunka isqonniyoq watamanña gobiernachkaptinmi Gadipa churin Manahem Israel nacion gobiernayta qallarirqa hinaspam Samaria llaqtapi gobiernarqa chunka wata.

18 Tayta Diospa qayllanpim mana allinkunata rurarqa.

Israel nacion huchallichiq Nabatpa churin Jeroboam hinam huchallikurqa kawsanan punchawkama.

19 Asiria nacionpa reynin ^aPul sutiyoq runam hamurqa Israel nacionta atacananpaq,

paymanmi Rey Manahem qorqa kimsa chunka kimsayoq waranqa kilo qollqeta chaynapi Manahempa favorninpi kaspan gobiernonta astawan takyachinanpaq.

20 Chay qollqetam Manahem mañarqa Israel nacionpi kapuqniyoq apukunamanta,

chay apu runakunam sapakama qorqa parte kilo masnin qollqeta chaynapi Asiria nacionpa reyninman qonankupaq.

Chayraykum Asiria nacionpa reyninqa Israel nacionpi mana unaspan kutikurqa.

21 Rey Manahempa wakin rurasqankunaqa Israel nacion reykunapa wakin rurasqanmanta willakuq libropim qellqasqa kachkan.

22 Rey Manahenmi abuelonkuna hina wañukurqa,

paypa rantinpim Pekaia sutiyoq churinña gobiernarqa.

23 Rey Azarias pichqa chunka watamanña Juda nacionpi gobiernachkaptinmi Manahempa churin Pekaia Israel nacion gobiernayta qallarirqa hinaspam iskay wata Samaria llaqtapi gobiernarqa.

24 Tayta Diospa qayllanpim mana allinkunata rurarqa.

Israel nacion huchallichiq Nabatpa churin Jeroboam hinam huchallikurqa.

25 Pekaiapa contranpim hoqarikururqa Remaliaspa churin Peka.

Pekaqa karqa hina Pekaiapa capitanninmi.

Chay Pekam Argob sutiyoq runawan hinaspa Arie sutiyoq runawan Galaad lawmanta pichqa chunka runakunapiwan yanapachikuspa Rey Pekaiata wañurachirqaku,

paytaqa wañurachirqaku Samaria llaqtapi reypa palacionpa uku kaq wasinpim,

chaynapim Peka sutiyoq runaña paypa rantinpi gobiernarqa.

26 Pekaiapa wakin rurasqankunaqa Israel nacion reykunapa wakin rurasqanmanta willakuq libropim qellqasqa kachkan.

27 Rey Azarias pichqa chunka iskayniyoq watamanña Juda nacionpi gobiernachkaptinmi Remaliaspa churin Peka Israel nacion gobiernayta qallarirqa.

Paymi gobiernarqa iskay chunka wata Samaria llaqtapi.

28 Tayta Diospa qayllanpim mana allinkunata rurarqa.

Israel nacion huchallichiq Nabatpa churin Jeroboam hinam huchallikurqa.

29 Israelpa reynin Peka gobiernachkaptinmi Asiria nacionpa reynin Tiglat-pileser hamururqa,

atacaspanmi vencerurqa Ijon llaqtata,

Abel-bet-maaca llaqtata,

Janoa llaqtata,

Cedes llaqtata hinaspa Hazor llaqtata.

Galaad lawpi,

Galilea lawpi chaynataq Neftaliy allpapi llapallan yachaqkunatapas venceruspanmi presochasqata Asiria nacionman pusarqa.

30 Elapa churin Oseasñataqmi Remaliaspa churin Pekapa contranpi hoqarikuruspan wañurachirqa,

chaynapim Oseasqa Pekapa rantinpi gobiernayta qallarirqa,

payqa qallarirqa Uziaspa churin Rey Jotam iskay chunka watamanña gobiernachkaptinmi.

31 Pekapa wakin rurasqankunaqa Israel nacion reykunapa wakin rurasqanmanta willakuq libropim qellqasqa kachkan.

32 Israel nacionpi iskay watamanña Remaliaspa churin Peka gobiernachkaptinmi Uziaspa churin Jotam Juda nacionpi gobiernayta qallaykurqa.

33 Iskay chunka pichqayoq watanpim karqa gobiernayta qallaykuspanqa.

Payqa Jerusalen llaqtapim gobiernarqa chunka soqtayoq wata.

Paypa mamanqa karqa Sadocpa churin Jerusa sutiyoq warmim.

34 Jotanmi Tayta Diospa qayllanpi tukuy imakunatapas allinta rurarqa taytan Uziaspa tukuy rurasqanman hina.

35 Chaywanpas moqokunapi capillakunaqa hinallam karqa,

chayraykum runakunapas chaykunapi animalta wañuchispa hinalla kañaqku,

hinallataqmi kañaqku inciensotapas.

Hina Rey Jotanmi hatarichirqa Tayta Diospa templonpa altonpi kaq punkutapas.

36 Jotampa wakin rurasqankunaqa Israel nacion reykunapa wakin rurasqanmanta willakuq libropim qellqasqa kachkan.

37 Tayta Diosmi chay punchawkunapi Juda nacionpa contranpi kachayta qallarirqa Aram nacionpa reynin Rezintawan Remaliaspa churin Pekata.

38 Abuelonkuna hina Jotam wañukuptinmi abuelonkupa pampakusqan sitiopi otaq “Davidpa Llaqtan” sutiyoq barriopi pamparurqaku.

Paypa rantinpim churin Acazña gobiernarqa.