Juda nacionpi Rey Acazpa gobiernasqanmanta
16
Remaliaspa churin Peka chunka qanchisniyoq watamanña gobiernachkaptinmi Jotampa churin Acaz gobiernayta qallaykurqa Juda nacionpi.
2 Rey Acazqa iskay chunka watanpim gobiernayta qallaykurqa.
Payqa chunka soqtayoq watam Jerusalen llaqtapi gobiernarqa.
Ichaqa manam abuelon David hinachu yupaychasqan Tayta Diospa qayllanpi allinta rurarqa.
3 Aswanqa Israel nacion reykunapa kawsasqanta hinam kawsarqa.
Rurarqataqmi Israelpa mirayninkunapa qayllanmanta Tayta Diospa qarqosqan runakunapa millakuypaq rurasqankutapas.
Payqa churintapas chay runakuna hinam kañarqa.
4 Alto moqo capillakunapipas hinaspa rapisapa sachakunapa ukunpipas animalkunata wañuchispanmi kañarqa,
kañarqataqmi inciensokunatapas.
5 Aram nacionpa reynin Rezinmi Remaliaspa churin Pekawan otaq Israel nacionpa reyninwan rirqaku Jerusalen llaqtaman chaynapi Rey Acazpa contranpi peleanankupaq ichaqa manam venceyta atirqakuchu.
6 Chay tiempopim Aram nacionpa reynin Rezin kutichikurqa Elat llaqtata.
Juda nacionniyoq runakunatam Elat llaqtamanta qarqorurqa chaymi Edom nacionniyoq runakunaña chayman rispanku chaypi yacharqaku kay libro qellqasqa kasqan punchawkama.
7 Rey Acazmi kacharqa comisionta Asiria nacionpa reynin Tiglat-pileserman kaynata nispan:
Ñoqaqa kani churiki hina serviqnikim.
Hamuspaykiyá libraykuway Aram nacionpa hinaspa Israel nacionpa reyninmanta,
paykunam atacawachkanku.
8 Tayta Diospa templonmanta qollqeta,
qorita hinaspa reypa wasinpi qori-qollqeta horqoramuspanmi Asiria nacionpa reyninman regalota apachirqa.
9 Asiria nacionpa reynin chaskiruspanmi rirqa Damasco llaqtapa contranpi peleananpaq.
Venceruspanmi runankunata presochasqata pusarqa Kir lawman,
wañurachirqataqmi reyninku Rezintapas.
10 Chaymantam Rey Acazqa pasarqa Damasco llaqtaman Asiria nacionpa reynin Tiglat-pileserwan tupananpaq.
Damasco llaqtapi altarta Rey Acaz qawaykuspanmi chay altarpa dibujonta chaynataq imaynam rurasqankuta apachirqa sacerdote Uriasman.
11 Damasco llaqtamanta Rey Acazpa apachisqan dibujoman hinam sacerdote Urias altarta rurarqa Rey Acaz Damasco llaqtapi unamunankama.
12 Damasco llaqtamanta rey kutiruspanmi chay altarta qawaykurqa hinaspam chay altarman asuykuspa animalta kañarqa.
13 Diospaqmi wañuchisqan animalkunata kañarqa,
kañarqataqmi kawsaykunamanta ofrendatapas hinaspam tallirqataq vino ofrendatapas.
Dioswan allinlla kasqanmanta wañuchisqan animalpa yawarnintapas challarqam altarpa hawanman.
14 Tayta Diospa qayllanpi kaq broncemanta altartañataqmi templopa ñawpaqninmanta asurirachispan mosoq altarpa norte lawninpiña churarqa.
15 Rey Acazmi sacerdote Uriasta kamachirqa:
—Hatun kaq altarpim kañanki tempranonpi lliw kañana ofrendakunata,
kañankitaqmi tardekuqpi kañana kawsaykunamanta ofrendatapas,
reypa qosqan lliw kañana ofrendatapas chaynataq reypa qosqan kawsaykunamanta ofrendatapas.
Kañankitaqmi runakunapa lliw kañana ofrendankutapas chaynataq paykunapa kawsaykunamanta ofrendankutapas,
chaymanqa tallinkitaqmi paykunapa vino ofrendankutapas.
Chaymanqa challankitaqmi lliw kañana animalpa yawarnintapas chaynataq wakin wañuchisqa animalkunapa yawarnintapas.
Broncemanta altarmi ichaqa ñoqapaq kanqa Tayta Diosta consultanaypaq —nispa
16 Rey Acazpa kamachisqanta hinamá sacerdote Urias rurarqa.
17 Rey Acazmi horqorachirqa lavatoriokunapa tiyanan tablakunata,
horqorachirqataqmi broncemanta rurasqa torokunapa hawanpi tiyaq estanquetapas,
lozeta rumipa hawanpiñam estanquetaqa tiyarachirqa.
18 Templopi samana punchawpaq corredor hatarichisqankutapas chaynataq hawamanta reypa yaykunan punkutapas horqorachirqam chaynapi Asiria nacionpa reyninta agradananpaq.