3 Rey Oseaspa contranpim hamurqa Asiria nacionpa reynin Salmanasar.

Venceruptinmi Oseasqa paytaña servispan contribucionta pagarqa.

4 Aswanqa Rey Oseasmi Asiria nacion reypa contranpi hoqarikunanpaq Egiptopa reynin So sutiyoq runaman comisionta kacharqa,

Asiria nacionpa reyninman watan-watan paganan contribuciontapas manañam pagarqachu,

chaykunata Rey Salmanasar yacharuspanmi Rey Oseasta cadenawan carcelpi presocharurqa.

5 Asiria nacionpa reyninqa Israel nacionta tropankunawan venceruspanmi Samaria llaqtapa muyuriqninpi kimsa wata churakururqa.

6 Isqon watamanña Rey Oseas gobiernachkaptinmi Asiria nacionpa reyninqa Samaria llaqtata venceruspan Israel nacionniyoq runakunata presochasqata Asiria nacionman pusarqa,

chaypiña yachanankupaqmi churarqa Halah llaqtapi,

churarqataqmi Habor Mayupa patanpi kaq Gozan llaqtapipas chaynataq Media nacionpa llaqtankunapipas.

7 Israelpa yupaychasqan Tayta Diospa contranpim Israelpa mirayninkuna huchallikururqaku,

taytacha-mamachakunataña adoraspankumá Egipto nacionmanta horqomuqnin Diospa contranpi huchallikururqaku.

Paykunataqa horqomurqa Rey Faraonpa munaychakuyninmantam.

8 Paykunaqa qayllankumanta Tayta Diospa wischusqan nacionkunapa costumbrenkunatam rurarqaku,

rurarqakutaqmi Israel nacion reykunapa costumbrenkutapas.

9 Yupaychasqanku Tayta Diospa contranpim Israelpa mirayninkunaqa pakasqallapi mana allinkunata rurarqaku,

llapa llaqtakunapa moqonkunapim capillakunata rurarurqaku,

chaykunataqa rurarurqaku guardiakunapa qawanan torrekunapim chaynataq murallasqa llaqtakunapim.

10 Moqokunapipas hinaspa rapisapa sachakunapa ukupipas sayarachirqakum rumimanta pilarkunatawan Asera sutiyoq mamachakunata.

11 Paykunapa qayllanmanta Tayta Diospa qarqosqan nacionkuna hinam chay capillakunapi inciensota kañarqaku.

Tukuy mana allinkunata ruraspankum Tayta Diosta piñachirqaku.

12 “Qamkunaqa amam chaynakunataqa rurankichikchu” nispa Tayta Dios nichkaptinpas taytacha-mamachakunatam adorarqaku.

13 Chayraykum Tayta Diosqa paymanta willakuq llapallan runankunawan chaynataq revelacion qawachisqan runankunawan Israel naciontawan Juda nacionta anyaspa nichirqa:

—Qamkunaqa mana allin kawsasqaykichikmanta kutirikamuspayá kasukuychik kamachikuyniykunatawan decretoykunata.

Kasukuychikqa abueloykichikkunaman tukuy kamachisqay yachachikuyniykunatayá,

chaykunataqa willachirqaykichik ñoqamanta willakuq serviqniykunawanmi —nispa.

14 Paykunapa abuelonkum sonqonkuta rumiyaykachispa yupaychasqanku Tayta Diospi mana confiakurqakuchu,

chaynam paykunapas sonqonkuta rumiyaykachispa mana kasukurqakuchu.

15 Paykunaqa qepanchakurqakum Tayta Diospa decretonkunatapas chaynataq abuelonkunawan Tayta Diospa contrato rurasqantapas,

qepanchakurqakutaqmi abuelonkuman qosqan Chunkantin Kamachikuynintapas.

Taytacha-mamachakunataña adoraspankum muyuriqninkupi nacionkuna hina mana imapaqpas valeqña rikurirurqaku.

Chaynataraqmi rurarqaku:

“Amam rurankichikchu chay nacionkunapa rurasqantaqa” nispa Tayta Dios nichkaptinpas.

16 Yupaychasqanku Tayta Diospa llapallan kamachisqankunata saqeruspankum metalmanta fundisqa iskay toro taytachakunataña rurakururqaku,

rurakururqakutaqmi Asera sutiyoq mamachatapas.

Cielopi llapa lucerokunata adoraspankum Baal sutiyoq taytachataña adorarqaku.

17 Churinkunatam qaritapas-warmitapas taytachakunaman kañarqaku,

musyaqkunamanwan brujokunamanmi qokururqaku.

Tayta Diospa qayllanpi tukuy mana allin ruraykunaman qokuruspankum payta piñachirqaku.

18 Chayraykum Tayta Diosqa Israel nacionpa contranpi anchallataña piñakuruspan qayllanmanta chinkarachirqa chaymi Juda ayllullaña puchururqa.

19 Ichaqa Juda nacionpas manam kasukurqachu yupaychasqanku Tayta Diospa kamachikuyninkunataqa,

paykunaqa Israel nacionpa rurasqan costumbrekunaman hinaraqmi kawsarqaku.

20 Chayraykum Tayta Diosqa qepanchakururqa Israelpa llapallan mirayninkunata.

Ñakarichispanmi salteaqkunamanña qoykurqa qayllanmanta chinkarachinankama.

21 Israel nacionta Davidpa castanmanta Tayta Dios rakiruptinmi Israel casta runakunaqa Nabatpa churin Jeroboamtaña reyninkupaq churarurqaku.

Jeroboanmi Israel nacionta Tayta Diosmanta rakiruspan hatunta huchallichirqa.

22 Israel nacionniyoq runakunaqa hinallam rurarqaku Jeroboampa huchallikusqankunata.

23 Chaynatam Tayta Dios rurarqa paymanta willakuq llapallan serviqninkunawan willachisqanpi hina.

Israel nacionniyoq runakunam allpankumanta preso pusasqa karqaku Asiria nacionman,

chaypim kachkanku kay libro qellqasqa kasqan tiempokamapas.

24 Asiria nacionpa reyninmi runakunata pusachimurqa Babilonia lawmanta,

Cuta llaqtamanta,

Ava lawmanta,

Hamat llaqtamanta hinaspa Sefarvaim llaqtamanta,

Israel casta runakunapa rantinpim paykunataña Samaria law llaqtakunapi churaykurqa,

chay llaqtakunapiñam dueñochakuykuspa yachakurqaku.

25 Asiria nacionniyoq reypa chayllaraq chayachimusqan runakunam qallariyninpiqa Tayta Diosta mana respetarqakuchu,

paykunapa contranpi leonkunata Tayta Dios kachaykuptinmi wañuchiyta qallaykurqa.

26 Chayraykum Asiria nacionpa reyninta nirqaku:

—Samaria lawpi llaqtakunaman yachanankupaq pusachisqayki runakunaqa manam yachankuchu chay nacion diospa reglamentonkunata,

chay diosmi kachaykamun leonkunata paykunata wañuchinanpaq,

manamá hukllapas kanchu chay reglamentokuna yachaqqa —nispa.

27 Hinaptinmi Asiria nacionpa reynin kamachirqa:

—Samaria llaqtamanta pusamusqaykichik huk kaqnin sacerdotetayá kutichiychik chaynapi chaypiña yachaspan chay Israel nacion diospa reglamentonkunata yachachinanpaq —nispa.

28 Samaria llaqtamanta preso pusasqanku huknin sacerdote kutiramuspanmi Betel llaqtapi yacharqa hinaspam yachachirqa imaynam Tayta Dios respetayta.

29 Chaywanpas sapa nacionmanta kaqkunam sapakama diosninkuta rurakuspanku maymi yachasqankupi churarqaku,

chaykunataqa churarqaku Samaria moqokunapi runakunapa rurasqan capillakunapim.

30 Babilonia lawmanta kaqkunam rurarqaku Sucot-benot sutiyoq taytachankuta,

Cuta llaqtamanta kaqkunam rurarqaku Nergal sutiyoq taytachankuta,

Hamat llaqtamanta kaqkunañataqmi rurarqaku Asima sutiyoq taytachankuta.

31 Ava lawmanta kaqkunam rurarqaku Nibhaz sutiyoq taytachankutawan Tartac sutiyoq taytachankuta.

Sefarvaim llaqtamanta kaqkunañataqmi Adramelec sutiyoq taytachankutawan Anamelec sutiyoq taytachankuta adoranankupaq churinkuta kañaqku.

32 Tayta Diosta respetachkaspapas paykuna ukumanta sacerdotekunata akllaruspankum moqokunapi adorananku capillakunapi servikunankupaq churarurqaku.

33 Tayta Diosta respetachkaspankupas diosninkutaqa hinallam serviqku,

chaytaqa ruraqku punta yachasqanku nacionpi costumbrenkuman hinam.

34 Kay libro qellqasqa kasqan tiempokamapas ñawpaq costumbrekunataraqmi rurachkanku.

Hinapi yachaq runakunaqa manam Tayta Diostaqa respetankuchu,

manataqmi rurachkankupas paypa reglamentonkunaman hinachu hinaspa decretonkunaman hinachu,

Jacobpa mirayninkunaman qosqan yachachikuykunatapas hinaspa kamachikuykunatapas manam kasukunkuchu.

Jacobtam Tayta Dios suticharqa Israelwan.

35 Jacobpa mirayninkunawan Tayta Dios contratota ruraspanmi kamachirqa:

—Taytacha-mamachakunataqa amam respetankichikchu,

ñawpaqninpipas amam qonqorakunkichikchu,

amam adorankichikchu,

chaykunapaqqa amataqmi animalkunatapas kañapunkichikchu,

36 qamkunaqa ñoqa Tayta Diosllatam respetawankichik,

qamkunataqa atiyniypiwan hatun castigokunawanmi Egipto nacionmanta horqomurqaykichik.

Ñoqallata adorawaspamá ñoqallapaqtaq animalkunatapas kañapuwankichik.

37 Tukuy tiempoyá kasukuychik qellqaspa qosqay decretokunata,

reglamentokunata,

yachachikuykunata chaynataq kamachikuykunatapas,

taytacha-mamachakunataqa amamá adorankichikchu.

38 Qamkunawan contrato rurasqaytaqa amam qonqarunkichikchu nitaqmi taytacha-mamachakunatapas adorankichikchu.

39 Yupaychasqaykichik ñoqa Tayta Diosllata respetawaptikichikqa enemigoykichikmantapas librasqaykichikmi —nispa.

40 Chaywanpas paykunaqa manam kasukurqakuchu,

ñawpaq costumbrenkuman hinallam rurarqaku.

41 Asiria nacion reypa pusachimusqan runakunaqa Tayta Diosta adorachkaspapas serviqkum kikinkupa taytacha-mamachankutapas.

Churinkupas,

willkankupas abuelonkupa rurasqanta hinallam rurarqaku kay libro qellqasqa kasqan tiempokama.