Juda nacionpi Rey Ezequiaspa gobiernasqanmanta
18
Elapa churin Oseas kimsa watamanña Israel nacionpi gobiernachkaptinmi Juda nacionpa reynin Acazpa churin Ezequias Juda nacionpi gobiernayta qallaykurqa.
2 Rey Ezequiasqa iskay chunka pichqayoq watanpim Juda nacionpi gobiernayta qallaykurqa.
Jerusalen llaqtapim gobiernarqa iskay chunka isqonniyoq wata.
Paypa mamanqa karqa Zacariaspa churin Abi sutiyoq warmim.
3 Tayta Diospa qayllanpim allinta rurarqa ñawpa abuelon Davidpa tukuy rurasqankunata hinaraq.
4 Moqokunapi capillakunata tuñichispanmi adorananku rumi pilarkunatapas pakirurqa,
Asera sutiyoq mamachakunatapas kuchururqam.
Moisespa rurachisqan broncemanta culebratam ñutuparurqa.
Chay punchawkamam Nehustan sutiyoq chay culebraman Israelpa mirayninkuna inciensota kañaqku.
5 Israelpa yupaychasqan Tayta Diospim Ezequias confiakurqa,
Juda nacionpi reykunamantaqa manam pipas Ezequias hinaqa karqachu paypa ñawpaqnintapas nitaq qepantapas.
6 Tayta Diosman confiakuykuspanmi paymanta mana rakikurqachu,
payqa Moisesman Tayta Diospa qosqan kamachikuykunatam kasukurqa.
7 Payta Tayta Dios yanapasqanraykum tukuy rurasqan allin lloqsiq.
Asiria nacion reypa contranpi hoqarikuruspanmi manaña payta servirqachu.
8 Filistea runakunatapas enteron allpankupim vencerurqa Gaza llaqtakama,
vencerurqaqa guardiakunapa qawanan torrekunamantam murallasqa llaqtakunakama.
Samaria llaqtata vencesqankumanta
9 Rey Ezequias tawa watamanña gobiernachkaptinmi chaynataq Elapa churin Oseas qanchis watamanña Israel nacionpi gobiernachkaptinmi Asiria nacionpa reynin Salmanasar Samaria llaqtapa contranpi hamuruspan llaqtapa muyuriqninpi tropankunawan churakururqa.
10 Kimsa watamantañam vencerurqa.
Rey Ezequias soqta watamanña gobiernachkaptinmi chaynataq Rey Oseaspas isqon watamanña Israel nacionpi gobiernachkaptinmi Asiria nacionpa reynin Samaria llaqtata dueñochakururqa.
11 Asiria nacionpa reynin Salmanasarmi Israel runakunata presochasqata Asiria nacionman pusarqa,
chaypiña yachanankupaqmi churarqa Halah llaqtapi,
churarqataqmi Habor Mayupa patanpi kaq Gozan llaqtapipas chaynataq Media nacionpa llaqtankunapipas.
12 Chaykunaqa pasakurqa yupaychasqanku Tayta Diospa nisqanta mana kasukusqankuraykum chaynataq contrato rurasqantapas mana cumplisqankuraykum.
Tayta Diospa serviqnin Moisespa tukuy kamachisqankunatam mana kasukurqakuchu hinaspa mana cumplirqakuchu.
Juda nacionpa contranpi Rey Senaquerib hamusqanmanta
13 Rey Ezequias chunka tawayoq watamanña gobiernachkaptinmi Asiria nacionpa reynin Senaquerib Juda nacionpi llapa murallasqa llaqtakunapa contranpi hamururqa hinaspam vencerurqa.
14 Juda nacionpa reynin Ezequiasmi Asiria nacionpa reyninta Laquis llaqtapi kachkaptin nichimurqa:
—Arí,
ñoqaqariki pantaruykim ichaqa nacionniymantayá asurikuyña,
tukuy mañawasqaykitam qosqayki —nispa.
Chaymi Asiria nacionpa reynin obligarqa Juda nacionpa reynin Ezequiasta isqon waranqa isqon pachaknin kilo qollqetawan isqon pachak isqon chunkan kilo qorita.
15 Rey Ezequiasmá qoykurqa Tayta Diospa templonpi chaynataq palacionpi waqaychasqanku qollqeta.
16 Rey Ezequiasmi chaypunilla horqorachirqa Tayta Diospa templopa punkunkunapi qarachasqan qoritawan pilarkunapi qarachasqan qorita.
Chaykunatam Asiria nacionpa reyninman qoykurqa.
17 Chaymantam Asiria nacionpa reyninqa Laquis llaqtamanta Jerusalen llaqtaman kacharqa llapallan tropankunapa kamachiqninta,
kacharqataqmi huk hatun kamachikuqtapas chaynataq peleanankupaq kamachikuq runatapas,
achkallaña tropayoqtam kacharqa Rey Ezequiaswan tupanankupaq.
Jerusalen llaqtaman chayaruspankum sayarurqaku hanay law estanqueman hamuq yarqapa hichpanpi.
Chay estanqueqa kachkan “Taqsaq Runapa Chakran” sutiyoq sitioman riq ñanpa hichpanpim.
18 Rey Ezequiasta qayaptinkum llaqtamanta lloqsimurqa Hilciaspa churin reypa mayordomon Eliaquim,
lloqsimurqataqmi secretario Sebnapas chaynataq Asafpa churin Joa sutiyoq runapas,
payqa karqa reypa rurasqankunamanta qellqaqmi.
19 Paykunatam Rey Ezequiasman nimunankupaq Asiria nacionpa tropankuna kamachiq nirqa:
—Asiria nacionpa ancha reqsisqa reyninmi nin:
“¿Imaman hapipakuspaykitaq qamqa confiakuchkanki?
20 Qanmi nichkanki:
‘Ñoqapaqa kachkanmi consejaqniykunapas chaynataq guerrapaq valeroso soldadoykunapas’ nispa ichaqa yanqam chayqa.
¿Piman confiakuspaykitaq contraypiqa hoqarikurunki?
21 ¿Pakisqa soqos tawna hina Egipto nacionpichum confiakuchkanki?
Chay soqos tawnaqa tawnapakuqninpa makintapas pakipakuruspanmi uchkurun.
Chay pakipasqa soqos hinallam Egipto nacionpa reynin Faraonqa paypi confiakuqninkunapaqqa.
22 Ichapas niwankichikman:
‘Ñoqaykuqa yupaychasqayku Tayta Diospim confiakuniku’ nispa.
¿Manachum moqokunapi chay Diospa capillankunatawan altarninkunataqa lliwta Ezequias chinkarachirqa?
Payqa Juda nacionpi kaqkunatawan Jerusalen llaqtapi kaqkunatam nichkan:
‘Kay Jerusalen llaqtapi kaq altarpa ñawpaqllanpiñam adorankichik’ nispa.
23 Kunanyá Asiria nacion reyniywan apuestay hinaptinqa ñoqapas qosqaykim iskay waranqa caballokunata,
qosqaykiqa partekimanta sillakuqkunata qoptikim.
24 Egipto nacionpa carretankunapiña hinaspa sillada tropankunapiña confiakuspapas ¿imaynataq atiwaq reyniypa serviqnin capitanninkunamanta eqoneq kaqllawanpas peleayta?
25 Kay llaqtata tuñichiq hamunaypaqqa ¿manachum Tayta Dios kamachimuwarqa:
‘Chay nacionman rispayki tuñichimuy’ nispa?”
26 Hinaptinmi Hilciaspa churin Eliaquimñataq,
Sebnapiwan hinaspa Joapiwan chay kamachiqta nirqaku:
—Ruegakuykikum,
muralla hawanpi runakuna uyarichkaptinqa amayá rimapayawaykuchu Juda nacionniyoq runakunapa rimayninpiqa,
Aram nacionniyoq runakunapa rimayninpiyá rimapayawaykuqa,
kay serviqnikikunaqa entiendesaqkum —nispa.
27 Chay kamachikuqmi paykunata nirqa:
—Reyniyqa manam kachamuwarqa reynillaykichikman nitaq qamkunallaman willanaypaqchu,
kachamuwarqaqa muralla hawanpi kaq runakunapaqwanmi,
paykunapas uyarinankupunim,
paykunaqa qamkunawan kuskam hatun ispayninkuta mikunqaku chaynataqmi yaku ispayninkutapas tomanqaku —nispa.
28 Chaynata niruspanmi chay kamachikuq runaqa sayaykuspan Juda nacion runakunapa rimayninpi qaparispan nirqa:
—Asiria nacion ancha reqsisqa reypa kayna nisqantayá uyariychik
29 “Rey Ezequiaswanqa amayá engañachikuychikchu,
manam ñoqamantaqa librasunkichikmanchu.
30 Tayta Diospi confiakunaykichikpaqmi Ezequiasqa nisunkichikman:
‘Cheqaptapunipas Tayta Diosqa librawasunchikmi,
manam kay llaqtaqa Asiria nacionpa reyninmanqa qosqachu kanqa’ nispa.
31 Ezequiaspa chayna nisqantaqa amayá kasuychikchu,
Asiria nacionpa reyninmi kaynata nin:
‘Ñoqawan contratota ruraspayá ñoqamanña humillakuychik.
Chaynata ruraspaqa sapakamam uvas huertaykichikpi kaqkunatawan higos huertaykichikpi kaqkunata mikunkichik,
sapakamataqmi posoykichikpi yakutapas tomankichik.
32 Kikiypuni hamuspaymi pusasqaykichik kay yachasqaykichik allpaman hina kawsaypapas,
vinopapas kasqan allpaman,
mikuypapas,
uvas huertapapas kasqan allpaman,
aceitunas sachapa chaynataq mielpapas kasqan allpaman,
chaypi kawsaspaykichikqa manam wañunkichikchu.
Ezequiastaqa amayá kasuychikchu,
payqa llullakususpaykichikmi nisuchkankichik:
Tayta Diosmi librawasunchik,
nispa.
33 Wakin nacionkunapa diosninkupas ¿mayqallanpas yaqachum nacionnin librayta atirqa Asiria nacionpa reyninmanta?
34 ¿Maypimá kachkan Hamat llaqtapa diosninpas,
Arfad llaqtapa diosninpas,
Sefarvain llaqtapa diosninpas,
Hena llaqtapa diosninpas chaynataq Iva llaqtapa diosninpas?
¿Chay dioskunaqa Samaria llaqta librayta atirqakuchu ñoqamanta?
35 Chay nacionkunapa llapallan diosninkunamantaqa ¿mayqannintaq ñoqamanta nacionnin librayta atirqa?
Chaynaqa amayá piensaychikchu Tayta Diospas Jerusalen llaqtata ñoqamanta librananta’ ” nispa.
36 Uyariqnin runakunañataqmi upallalla kaspanku mana imatapas nirqakuchu.
Reymi kamachirqa paykunata:
—Amam imatapas rimarinkichikchu —nispa.
37 Hinaptinmi Hilciaspa churin mayordomo Eliaquimñataq Sebna sutiyoq secretariopiwan hinaspa Asafpa churin Joapiwan pachankuta llikiparqaku hinaspam Rey Ezequiasman kutirispanku chay kamachikuqpa rimasqankunata willarqaku.
Chay Joa sutiyoq runaqa karqa reypa rurasqankunamanta qellqaqmi.