Juda nacionpa contranpi Rey Senaquerib hamusqanmanta
32
Diospa munasqanman hina cumplispa Rey Ezequiaspa tukuy chay rurasqankunapa qepantam hamururqa Asiria nacionpa reynin Senaquerib hinaspam guerrawan yaykururqa Juda nacionman,
murallasqa llaqtakunata vencenanpaqmi chaypi campamentonta churarurqa.
2 Jerusalen llaqtata atacananpaq Rey Senaqueribpa hamurusqanta Rey Ezequias qawaykuspanmi
3 tanteanakurqaku runankunapa jefenkunawan hinaspa valeroso runakunawan chaynapi llaqtapa hawa lawninpi kaq pukyukunata taparunankupaq chaymi paykuna yanaparqaku.
4 Achkallaña runakuna huñunakuruspankum taparurqaku llapallan pukyukunatawan chay lawnin pasaq mayuchata,
chaykunataqa taparurqaku Asiria nacionpa reyninkuna hamuspa mana achka yaku tarinankupaqmi.
5 Rey Ezequiasqa kallpanchakuspanmi perqapachirqa llapa tuñisqa murallakunata,
chaypa hawanpipas hoqarichirqam aswan hatunraq torrekunata,
rurachirqataqmi ñawpaq murallapa hawa lawninpi huk murallatapas.
Perqachirqataqmi “Davidpa Llaqtan” sutiyoq barriopa muyuriqninpi muralla hapiq perqakunatapas,
rurachirqataqmi achkallaña lanzakunatapas chaynataq harkachikuna armakunatapas.
6 Guerrapi peleanankupaqmi churarqa runakunapa jefenkunata,
paykunata llaqtapa zaguannin plazapi huñuruspanmi kallpancharqa kaynata:
7 —Kallpanchakuspayá qarinchakuychik,
amayá manchakuychikchu Asiria nacionpa reynintaqa nitaq paywan hamuq achka-achka tropakunatapas,
paywan kaqkunamantapas aswan achkaqa kachkan ñoqanchikwan kaqkunam.
8 Paywanqa kachkan runakunapa kallpallanmi,
ñoqanchikwanmi ichaqa kachkan yupaychasqanchik Tayta Dios,
peleaptinchikqa paymi yanapawasunchik —nispa.
Hinaptinmi runakuna kallpanchakururqaku Juda nacion Rey Ezequiaspa nisqanwan.
9 Asiria nacionpa reynin Senaqueribmi llapallan tropankunawan atacachkarqa Laquis llaqtata,
chaypi kachkaspanmi serviqninkunata kacharqa Jerusalen llaqtaman,
paykunataqa kacharqa Juda nacionpa reynin Ezequiasman hinaspa Jerusalen llaqtapi yachaq Juda casta llapallan runakunaman kaynata nimunankupaqmi:
10 —Asiria nacionpa reynin Senaqueribmi kaynata nin:
“Muyurusqaña Jerusalen llaqta kachkaptinqa ¿pimantaq qamkunaqa hapipakunkichik?
11 ¿Manachu Ezequiasqa engañasuchkankichik:
‘Yupaychasqanchik Tayta Diosmi librawasunchik Asiria nacionpa reyninmantaqa’ nispa?
12 ¿Manachu moqokunapi chay Diospa capillankunatawan altarninkunataqa lliwta Ezequias chinkarachirqa?
Payqa Juda nacionpi kaqkunatawan Jerusalen llaqtapi kaqkunatam nichkan:
‘Kay chullalla altarpa ñawpaqninpi adoraspan chaypa hawallanpitaq inciensotapas kañankichik’ nispa.
13 ¿Manachu yachankichik tukuy chay allpakunapi kaq runakunawan ñoqapa rurasqaytawan abueloykunapa imam rurasqanta?
Chay nacionkunapa diosninkunaqa manam mayqanpas atirqachu ñoqamanta librayta.
14 Chaynaqa ¿imaynatataq diosnikichikqa librasunkichikman ñoqamantaqa?
15 Amañayá Ezequiaswanqa engañachikuychikchu nitaq pantaymanqa pusachikuychikchu,
amayá paytaqa creeychikchu.
Chay llapallan nacionkunapiqa chaynataq chay llapallan gobiernokunapiqa manam mayqan diospas ñoqamantaqa runankunata librayta atirqachu,
manataqmi librarqachu abueloykunamantapas.
¿Chaychus diosnikichikñataq librasunkichikman ñoqamanta?”
nispa.
16 Rey Senaqueribpa serviqninkunaqa chaykunamantapas mastaraqmi rimarqaku Tayta Diospa hinaspa serviqnin Ezequiaspa contranpi.
17 Chaywanpas Rey Senaqueribqa Israelpa yupaychasqan Tayta Diospa contranpim qellqarqaraq cartakunata,
chay cartakunapim kaynata nirqa:
Wakin nacionkunapi dioskunam ñoqamanta mana librayta atirqachu runankunata,
Ezequiaspa diosninpas ñoqamantaqa manam runankuna librayta atinqachu.
18 Rey Senaqueribpa serviqninkunam judiokunapa rimayninpi hatun vozpi qayakurqaku,
chaynataqa rurarqaku Jerusalen murallapa hawanpi kaq runakunata mancharichinankupaqmi hinaspa hukmanyasqa kachkaptinku chay llaqtata vencerunankupaqmi.
19 Jerusalen llaqtapi yachaq runakunapa diosninpa contranpim rimarqaku,
paykunaqa rimarqaku wakin nacionniyoq runakunapa diosninkupa contranpi rimasqankupi hinam.
Chay dioskunaqa karqa runakunapa rurasqallanmi.
20 Rey Ezequiasmi Diosmanta willakuq Isaiaswan yanapakuyta mañakurqaku hanaq pachamanta,
Isaiasqa karqa Amozpa churinmi.
21 Hinaptinmi Tayta Dios kachamurqa huk angelta,
paymi Asiria nacion reypa campamentonpi wañurachirqa llapallan valeroso soldadokunata,
jefekunata hinaspa capitankunata.
Chaynapim Rey Senaqueribqa nacionninman kutikurqa penqakuyllawanña.
Diosninpa templonman yaykuruptinmi kikinpa churillankuna espadawan chaypi wañurachirqa.
22 Chaynatamá Tayta Diosqa libraykurqa Ezequiastawan Jerusalen llaqtapi yachaqkunata,
paykunataqa libraykurqa Asiria nacionpa reynin Senaqueribmantam chaynataq llapallan enemigonkunamantam hinaspam qorqa hawkayayta muyuriqninpi kaqkunawan.
23 Chaymi Jerusalen llaqtaman achkallaña runakuna apamurqaku Tayta Diospaq ofrendakunata,
Juda nacionpa reynin Ezequiasmanpas apamurqakutaqmi suma-sumaq regalokunata,
chay tiempomantam Ezequiasqa hatunchasqa karqa llapallan nacionkunapa qayllanpi.
Rey Ezequiaspa onqosqanmanta
24 Chay punchawkunapim Rey Ezequias onqorurqa wañuypa patanpiña kanankama chaymi Tayta Diosta mañakuptin huk señalta qorqa.
25 Allinkunata chaskichkaspanpas Rey Ezequiasqa manam allintachu kutichirqa,
hatun tukuq rikuriruptinmi Dios piñakururqa paypa contranpi,
Juda nacionpa contranpi hinaspa Jerusalen llaqtapa contranpi.
26 Ichaqa hatun tukuq kachkaspanpas Rey Ezequiasqa humillakuykurqam,
humillakuykurqataqmi Jerusalen llaqtapi yachaqkunapas,
Ezequias kawsanankamaqa Diospa piñakuyninqa manam paykunaman hamurqachu.
Rey Ezequiaspa apuyasqanmanta
27 Rey Ezequiasmi karqa apullaña hinaspa ancha-ancha reqsisqa.
Huñukururqam qori-qollqeta,
alhaja rumikunata,
perfumekunata,
harkachikuna armakunata hinaspa tukuy rikchaq kuyayllapaq kaqkunata.
28 Rurachirqataqmi almacenkunatapas,
chaykunapim waqaycharqa trigota,
vinota hinaspa aceiteta.
Rurachirqataqmi establokunatapas tukuy rikchaq hatun animalkunapaq,
rurachirqataqmi taksa animalkunapaq kanchakunatapas.
29 Payqa rurachirqataqmi llaqtakunatapas.
Achkallañam kapurqa taksa animalkunapas chaynataq hatun animalkunapas,
chayna achka-achkataqa Diosmi qoykurqa.
30 Rey Ezequiasqa taparachirqataqmi hanay lawpi kaq Gihon sutiyoq pukyupa punkuntapas hinaspam chay yakuta pusachirqa “Davidpa Llaqtan” sutiyoq barriopa intipa seqaykunan lawman.
Chaynapimá Rey Ezequiasqa bendecisqa karqa tukuy ima rurasqankunapi.
Babilonia nacionmanta hamuqkunata Rey Ezequias chaskisqanmanta
31 Babilonia lawpi autoridadkunam runakunata kachamurqa Juda nacionpi milagro rikurisqanmanta yachanankupaq.
Ezequiaspa sonqonpi tukuy ima kaqkunata pruebananpaqmi Dios paymanta karunchakururqa.
Rey Ezequiaspa wañukusqanmanta
32 Rey Ezequiaspa wakin rurasqankunaqa chaynataq allinkuna rurasqankunaqa llapallanmi qellqasqa kachkan Diosmanta willakuq Isaiaspa willakusqan libropi,
Isaiasqa Amozpa churinmi karqa,
qellqasqataqmi kachkan Juda nacion reykunapa hinaspa Israel nacion reykunapa vidanmanta willakuq libronpipas.
33 Abuelonkuna hina Rey Ezequias wañukuptinmi pamparurqaku Davidpa mirayninkunapa pampakusqan hanayninpi.
Ezequias wañukuptinmi honrarqaku Juda nacionpi kaqkunapiwan Jerusalen llaqtapi llapallan kaqkuna,
paypa rantinpiñataqmi gobiernarqa churin Manasesña.