Rey Ezequiaspa onqosqanmanta
20
Chay punchawkunapim Rey Ezequias onqorurqa wañuy patanpiña kanankama.
Amozpa churin Diosmanta willakuq Isaias watukuqnin rispanmi payta nirqa:
—Yaw Ezequias,
Tayta Diosmi nisunki:
“Qamqa wañukunkiñam,
chaynaqa imaykikunatapas allichakuyñayá” nispa.
2 Chaymi Ezequiasqa perqa lawman uyanta muyurirachispa Tayta Diosta mañakurqa:
3 —Dios Taytalláy,
ruegakuykim qayllaykipi cheqap sonqowan kawsasqayta hinaspa qampa munasqaykiman hina rurasqaytapas yuyarinaykipaq —nispa.
Chaynata niruspanmi Ezequiasqa llumpayllataña waqarqa.
4 Chay palaciopi kaq patiota manaraq Isaias pasaruchkaptinmi Tayta Dios payta niykurqa:
5 —Runaykuna kamachiq Ezequiasman kutirispayá nimuy kaynata:
“Abueloyki Davidpa yupaychasqan Tayta Diosmi nin:
‘Uyariykuykim mañakuwasqaykita,
rikurqaykitaqmi waqasqaykitapas,
sanoyarachiptiymi kimsa punchawmanta temployman rinki.
6 Wataykikunamanmi yapasaq chunka pichqayoq watataraq,
qamtapas hinaspa kay Jerusalen llaqtatapas Asiria nacionpa reyninmantam librasaq.
Kikiyraykum chaynataq serviqniy Davidraykum kay Jerusalen llaqtataqa waqaychasaq’ nispa.”
7 Chaynata niruspanmi Isaias kamachirqa:
—Llapisqa higosta apamuychik —nispa.
Aparamuptinkum Ezequiaspa chupunman laqarurqaku hinaptinmi chaywan sanoyarurqa.
8 Chaymi Rey Ezequias tapurqa Isaiasta:
—¿Imataq señal kanqa Tayta Dios sanoyaykachiwaptin kimsa punchawmanta templomanpas rinaypaqqa?
—nispa.
9 Isaiasmi nirqa:
—Tayta Diospa nisusqayki cumplikunanta yachanaykipaqmi señalta hina qosunaykipaq kayta nisunki:
“¿Chunka gradasta inti ñawparunantachu munanki?
¿Icha chunka gradasta inti kutirirunantachu munanki?
¿Mayqantataq munanki?”
nispa.
10 Chaymi Ezequiasñataq nirqa:
—Facilqa kanman intipa llantuynin chunka gradasta ñawparuyninmi.
Munaymanqa chunka gradasta llantuy kutirirunantam —nispa.
11 Chayna kananpaqmi Diosmanta willakuq Isaias mañakurqa.
Llantuyta Tayta Dios kutirirachirqa Acazpa gradasninpi chunka gradasta.
Babilonia nacionmanta hamuqkunata Rey Ezequias chaskisqanmanta
12 Chay tiempopim Babilonia nacionpa reynin Berodac-baladan otaq Baladanpa churin apachimurqa Rey Ezequiasman cartakunatawan regalota,
chaykunataqa apachimurqa onqorusqanta yacharuspanmi.
13 Comisionpa nisqanta Ezequias uyariykuspanmi paykunaman qawachirqa palacionpi llapa imanta:
qori-qollqeta,
especeriakunata,
miski asnaq aceiteta,
armakuna waqaychananta,
qawachirqataqmi wasinpi tukuy imakuna waqaychasqantapas.
Mana imatapas pakaykuspanmi paykunaman qawachirqa palacionpi kaqkunata chaynataq gobiernasqan nacionpi tukuy kapuqninkunatapas.
14 Hinaptinmi Diosmanta willakuq Isaias Rey Ezequiasman hamuspan tapurqa:
—Chay runakunaqa ¿imaninkutaq?
¿Maylawmantataqsi hamunku?
—nispa.
Chaymi Rey Ezequiasñataq nirqa:
—Paykunaqa hamurqaku karu-karu Babilonia nacionmantaraqmi —nispa.
15 Nirqataqmi Isaias:
—¿Imakunatataq palacioykipiqa rikurqaku?
—nispa.
Hinaptinmi Ezequiasñataq nirqa:
—Palacioypim tukuy imayta qawarqaku,
waqaychana wasipi imaykunatapas mana pakaspaymi paykunaman qawachirqani —nispa.
16 Chaymi Isaias nirqa Rey Ezequiasta:
—Uyariy Tayta Diospa nisqanta:
17 Hamuchkanmi tiempo palacioykipi llapa imaykikunatawan,
abueloykikunapa kunankama tukuy huñusqanta mana puchuykuspa Babilonia nacionman apanankupaq.
18 Miraynikikunatam pusanqaku Babilonia nacion reypa palacionpi servikuqkuna kanankupaq.
19 Chaymi Rey Ezequias nirqa Isaiasta:
—Tayta Diospa nisqanmanta willawasqaykiqa allinpunim,
kawsanaykamaqa luegochiki hawkalla hinaspa allinlla kawsasaq —nispa.
Rey Ezequiaspa wañukusqanmanta
20 Rey Ezequiaspa wakin rurasqankunaqa,
mana manchakuspa rurasqankunaqa chaynataq yarqatawan estanqueta rurachispan llaqtaman yaku pusaykusqanqa Juda nacionpi reykunapa wakin rurasqanmanta willakuq libropi qellqasqam kachkan.
21 Ezequias abuelonkuna hina wañukuptinmi paypa rantinpiqa gobiernarqa churin Manasesña.