Rey Ezequiaspa onqosqanmanta
38
Chay punchawkunapim Rey Ezequias onqorurqa wañuy patanpiña kanankama.
Amozpa churin Diosmanta willakuq Isaias watukuqnin rispanmi payta nirqa:
—Yaw Ezequias,
Tayta Diosmi nisunki:
“Qamqa wañukunkiñam,
chaynaqa imaykikunatapas allichakuyñayá” nispa.
2 Chaymi Ezequiasqa perqa lawman uyanta muyurirachispa Tayta Diosta mañakurqa:
3 —Dios Taytalláy,
ruegakuykim,
qayllaykipi cheqap sonqowan kawsasqayta hinaspa qampa munasqaykiman hina rurasqaytapas yuyarinaykipaq —nispa.
Chaynata niruspanmi Ezequiasqa llumpayllataña waqarqa.
4 Tayta Diosmi Isaiasta rimapayaspan nirqa:
5 —Ezequiasman kutirispayá nimuy kaynata:
“Abueloyki Davidpa yupaychasqan Tayta Diosmi nin:
‘Uyariykuykim mañakuwasqaykita,
rikurqaykitaqmi waqasqaykitapas,
kawsachisqaykim chunka pichqayoq watataraq,
6 qamtapas hinaspa kay Jerusalen llaqtatapas Asiria nacionpa reyninmantam librasaq.
Kay llaqtataqa kikiypunim waqaychasaq’ nispa.
7 Tayta Dios rimasqanta rurananpaqmi kay señalta pay qosunki:
8 Intipa llantuynintam qepaman kutichinqa chunka gradasta Acazpa gradasninpi” nispa.
Chaynapimá intipa llantuyninqa kutirurqa chunka gradasta
9 Juda nacionpi Rey Ezequiasmi kaynata qellqarqa onqosqanmanta sanoyaruspan:
10 Ñoqam nirqani:
Chawpi vidaypim wañukusaq.
Wañuqkunapa kasqanmanmi chayarusaq.
Puchuqraq wataykunamanqa hukñachu haypasaq.
11 Ñoqam nirqani:
Tayta Diostaqa manañam rikusaqñachu.
Manañachiki kay pachapi Tayta Diostaqa rikusaqñachu.
Pasaruqlla kay pachapi yachaq runakunataqa manañachiki rikusaqñachu.
12 Yachanay karpatam paskarunki,
Dios Taytalláy.
Chay wasiytam qechuruwanki,
Dios Taytalláy.
Michiqpa karpanta hinam qechuruwanki,
Dios Taytalláy.
Awaqpa awasqan telata hinam wankuruni vidallayta.
Telarmanta kuchuruchkaq hinam tipiruwan vidallayta.
Tutaykuqmanta achikyaqkamallam tukurunki vidallayta.
13 Achikyaqkamam suyarqayki qamta.
Aswanqa leon hinam pakipakurunki tulluykunata.
Tutaykuymanta achikyaqkamallam tukurunki vidayta.
14 Wayanakuywan chiwaku hinaraqmi waqani.
Paloma hinaraqmi enqeni.
Ñawiykunam lliw pisiparun.
Cielokuna qawasqaywanmi lliw pisiparun.
Sasachakuypim kachkani,
Señorlláy.
Yanapaykullawayá,
Señorlláy.
15 ¿Imatataqsi atiyman rimayta?
Kikikimanta rimapayawaspaykim rurarqanki kayta.
Sonqoypi llakisqam kawsasaq.
Kawsanaykamam humillasqalla kawsasaq.
16 Señorlláy,
tukuy chaykunawanmi runakuna kawsanqa.
Ñoqapa espirituypas chaykunawanmi kawsanqa.
Qanmi ñoqata sanoyachiwarqanki.
Qamtaqmi kaqllamanta kawsachiwanki.
17 Chaynaqa kay llakikuyniymi tikrakururqa.
Hawkaña kanaypaqmi chaynaman tikrakururqa.
Qamqa kuyawaspaykim wañuchiqniy pozomanta harkaykuwarqanki.
Tukuy huchaykunatam qepanchaykunki.
18 Sepulturapi kaqkunaqa manañam graciasta qosunkichu.
Wañuqkunaqa manañam alabasunkichu.
Wañusqakunapa kasqanman uraykuqkunaqa manañam suyanmankuchu.
19 Ñoqapas kunanmi alabamuyki qamllaman.
Kawsaqkunallam qamtaqa alabasunkiman.
Confianapaq kaynikimantam yachachinku churinkuman.
20 Qam Tayta Diosmi kaypi kachkanki salvawanaykipaq.
Chaynaqa takikunatam arpawan tocasaqku qampaq.
Sapa punchawmi temploykipi tocasaqku qam Tayta Diospaq.
21 Chaynata niruptinmi Isaias kamachirqa:
—Llapisqa higosta apamuychik —nispa.
Aparamuptinkum Ezequiaspa chupunman laqarurqaku hinaptinmi chaywan sanoyarurqa.
22 Rey Ezequiasmi tapurqa:
—¿Ima señaltaq kanqa Tayta Diospa templonman rinaypaqqa?
—nispa.