Rey Senaqueribmanta Juda nacion librasqa kasqanmanta
37
Rey Ezequias chayta uyariruspanmi pachanta llikiparurqa hinaspam lutu pachawan churakuruspan temploman yaykurqa.
2 Chaymantam kacharqa luto pachawan pachasqata mayordomo Eliaquimta,
secretario Sebnata hinaspa yuyaq sacerdotekunata.
Paykunatam kacharqa Diosmanta willakuq Isaiasman,
Isaiasqa karqa Amozpa churinmi.
3 Paymanmi Rey Ezequiaspa nisqanta kaynata nirqaku:
—Llakisqa,
qaqchasqa,
insultasqa kasqanchik punchawmi kunan punchawqa.
Wachakunanpaq kachkaspan manaña kallpayoq warmi hinam kachkanchik.
4 Icharaqpas yupaychasqanchik Tayta Dios uyarinman chay kamachikuqpa rimasqankunata.
Paytam Asiria nacionpa reynin kachamurqa kawsaq Diosta insultananpaq,
allinchá kanman chay uyarisqanmanta yupaychasqanchik Tayta Dios paytapas qaqchaptinqa.
Chaynaqa Diostayá mañakuy wakin puchuqkunapa favorninpi —nispa.
—Reynikichiktam Tayta Diospa nisqanta kaynata nimunkichik:
“Asiria nacion reypa serviqninkunapa insultawasqantaqa amayá manchakuychu.
7 Kunanmi Asiria nacionpa reyninta noticiawan umacharusaq hinaptinmi nacionninman kutinqa.
Chaypiñam huk kaqninpa wañuchisqan kanqa” nispa.
8 Chay tropakuna kamachikuqmi uyarirurqa Asiria nacionpa reyninqa Laquis llaqtamanta asurikusqanta.
Kutirispanmi reyta tarirurqa Libna llaqtapa contranpi peleachkaqta.
9 Rey Senaqueribpa contranpi peleananpaq Cus nacionpa reynin Tirhaca hamusqanta yacharuspanmi chay Rey Senaquerib kaqllamanta comisionta kacharqa.
10 Juda nacionpa reynin Ezequiasman kaynata ninankupaq:
—Qampa confiakusqayki Diosnikis nisunki:
“Asiria nacionpa reyninmanqa manam Jerusalen llaqtaqa qosqachu kanqa” nispa.
Chay nisusqaykiwanqa amayá engañachikuychu.
11 Qamqa uyarirqankim Asiria nacion reykunapa llapallan nacionkuna tuñichisqantaqa ¿Chaychus qamñataq librakuwaq?
12 Abueloykunapa tuñichisqan Gozan llaqtataqa,
Haran llaqtataqa,
Resefta llaqtataqa chaynataq Telasar llaqtapi yachaq Eden castan runakunataqa ¿yaqachum diosninku librarqa?
13 ¿Maypitaq kachkan Hamat llaqtapa reyninqa,
Arfad llaqtapa reyninqa,
Sefarvaim llaqtapa reyninqa,
Hena llaqtapa reyninqa chaynataq Iva llaqtapa reyninqa?
—nispa.
14 Comisionmanta Rey Ezequias cartata chaskiruspanmi leeruspan Tayta Diospa templonman apaykurqa hinaspanmi Diospa qayllanpi kicharayachkaqta churaykurqa.
15 Tayta Diospa qayllanpi mañakuspanmi nirqa:
16 —Querubin sutiyoq angelkunapa chawpinpi yachaq Israelpa yupaychasqan Llapallan Kamachiq Tayta Dios,
kay pachapi llapallan nacionkunapi munaychakuq Diosqa qamllam kanki.
Qanmi rurarqanki cielotapas hinaspa kay pachatapas.
17 Dios Taytalláy,
atiendeykullawaspaykiyá uyariykullaway,
ñawillaykikunata kichaykuspayá qawariykuy kay asuntota,
uyariykuytaqyá qam Kawsaq Dios insultaq Rey Senaqueribpa rimasqankunatapas.
18 Dios Taytalláy,
cheqaptapunipas Asiria nacion reykunaqa llapallan nacionkunatam allpantinta purmachirqa.
19 Taytachankutapas ninamanmi wischuykurqaku chaykunaqa mana cheqap kasqankurayku,
kullumanta otaq rumimanta runakunapa rurasqan kasqanraykum chaykunataqa chinkarachirqaku.
20 Yupaychasqayku Dios Taytalláy,
qamllatam ruegakullayki,
qamlla Dios kasqaykita kay pachapi llapallan nacionkuna yachanankupaqyá Rey Senaqueribmanta salvaykullawayku —nispa.
21 Hinaptinmi Israelpa yupaychasqan Tayta Diospa nisqanta Amozpa churin Isaiasqa Rey Ezequiasman kaynata nichimurqa:
—Asiria nacionpa reynin Senaqueribmanta mañakuwasqaykitaqa uyariykuykim.
22 —Chaymi Asiria nacion reypa contranpi ñoqa Tayta Dios kaynata nini:
Yaw Rey Senaquerib,
Sion llaqtaqa doncella hinam
qamta despreciaspa burlakuchkan.
Jerusalen llaqtaqa
qepaykipim umanta aywichkan.
23 ¿Pitataq insultarqanki?
¿Pitataq ñakarqanki?
¿Pipa contranpitaq qaparirqanki?
¿Pitataq hatunchakuspa qawarqanki?
¡Israel nacion Chuya Diospa contranpim
chaykunataqa rurarqanki!
24 Jefekuna kachasqaykiwanmi
Señorta insultarqanki
hinaspataqmi nirqanki:
“Nana-nanaq carretaykunawanmi
orqopa puntanman qespirqani.
Mana yaykuy atina Libano
Orqomanmi chayarqani.
Mana yaykuy atina qatakunamanmi rirqani.
Hatun cedro sachakunatam kuchurqani.
Sumaq cipres sachakunatam kuchurqani.
Karu-karu sitiokunamanmi chayarqani.
Huerta hina montekunamanmi hayparqani.
25 Huklaw nacionpiraq pozokunatapas
toqospaymi yakunta upyarqani” nispa.
“Saruspaymi Egipto nacion yarqakunatapas
chakichirqani” nispa.
26 ¿Manachum haykapipas uyarirqanki
ñawpaqmantaraq ñoqa Tayta Diospa rurasqayta?
¿wiñaymantaraq ñoqapa tanteasqayta?
Kunanqa ruraruniñamiki.
Chaymi murallasqa llaqtakunata tuñichichkanki.
Montorayaq rumikunata hinallañam rurachkanki.
27 Chaypi yachaq runakunaqa
pisi kallpayoqllañam rikurirunku.
Hukmanyasqallañam karunku.
Penqachisqallañam karunku.
Campopi qorakuna hinallañam karunku.
Chakrapi yakukuna hinallañam karunku.
Wasi hawanpi wiñaq qewakuna hinam karunku.
Chay qewakunam manaraq poqochkaspa chakirunku.
Chaynam paykunapas chinkarunku.
28 Yachanim tukuy ima rurasqaykitapas
chaynataq mayman risqaykitapas
chaynataq contraypi piñakusqaykitapas.
29 Uyarinim ñoqapa contraypi piñakusqaykita.
Uyarinim orgulloso kaynikiwan rimasqaykita,
chayraykum anzueloyta senqaykiman churasaq,
chayraykum bridaytapas simikiman churasaq.
Kutichisqaykim hamusqayki ñanninta —nispa.
30 Isaiasmi Rey Ezequiasman nirqa:
Kaymi qampaq señal kanqa,
kunan watam chakrapi
kikinmanta wiñaqta mikunkichik.
Hamuq watapiñataqmi
mana yapusqa allpamanta
wiñaqta mikunkichik.
Kimsa kaq watapiñataqmi tarpuspa cosechankichik.
Uvastapas plantaspam rurunta mikunkichik.
31 Juda castamanta puchuqkunam
tarpusqa muhu hina kanqaku.
Sapichakuspankum allin planta hina rurunqaku.
32 Puchuqkunam Jerusalen llaqtamanta miranqaku.
Lluptiqkunapas Sion Moqomantam miranqaku.
Llapallan Kamachiq Tayta Diosmi chaynata ruranqa.
Anchata kuyaspanmi chaynata ruranqa.
33 Chaynaqa Asiria nacion reymantam Tayta Dios nin:
“Kay llaqtamanqa manam yaykumunqachu.
Flechankunataqa manam flechanqachu.
Harkachikunan armantapas manam hapinqachu.
Allpatapas murallapa qepanmanqa manam montochinqachu.
34 Hamusqan ñannillantam kutikunqa.
Manam yaykumunqachu kay llaqtamanqa.
Ñoqa Tayta Diosmi nini chaynataqa.
35 Ñoqam kay llaqtata amparaspay salvasaq.
Kikiyraykum chaynataqa rurasaq.
Serviqniy Davidraykum chaynataqa rurasaq” nispa.
36 Tayta Diospa angelnin lloqsiramuspanmi Asiria soldadokunapa campamentonpi wañurachirqa pachak pusaq chunkan pichqayoq waranqa runakunata.
Achikyaruptinñataqmi wañusqaña llapallanku kachkasqaku.
37 Hinaptinmi Asiria nacionpa reynin Senaquerib puchuq tropankunawan Ninive llaqtaman kutikuspan chaypi yacharqa.
38 Huk punchawmi chaypiña kachkaspan Nisroc taytachanta templopi adorachkarqa hinaptinmi churin Adramelecwan churin Sarezer espadawan payta wañurachirqaku hinaspam Ararat lawman lluptikurqaku.
Rey Senaqueribpa rantinpim Esarhadon sutiyoq churiña gobiernarqa.