Juda nacionpi Rey Manasespa gobiernasqanmanta
21
Chunka iskayniyoq watanpim Manasesqa gobiernayta qallaykurqa,
Jerusalen llaqtapim gobiernarqa pichqa chunka pichqayoq wata,
paypa mamanqa karqa Hepsiba sutiyoq warmim.
2 Tayta Diospa qayllanpim mana allinkunata rurarqa.
Israelpa mirayninkunapa qayllanmanta Tayta Diospa qarqosqan runakunapa millakuypaq rurasqankunatam rurarqa.
3 Taytan Ezequiaspa tuñichisqan moqokunapi capillakunatam kaqllamanta hatarichirqa hinaspam Baal sutiyoq taytachapaqña altarkunata rurarqa.
Israel nacionpa reynin Acab hinam rurarqa Asera sutiyoq mamachakunatapas.
Cielokunapi llapallan lucerokunaman qonqorakuspanmi chaykunata adorarqa.
4 “Ñoqam sutiyta Jerusalen llaqtapi churasaq” nispa Tayta Dios nichkaptinpas Manasesqa Tayta Diospa templonpim altarkunata hatarirachirqa.
5 Templopa iskaynin pationkunapipas cielokunapi kaq llapa lucerokunata adorananpaqmi altarkunata rurachirqa.
6 Churintapas taytachapaqraqmi kañapurqa.
Musyaqkunaman,
brujokunaman qokuruspanmi espiritistakunatawan espiritu qayaqkunata tapukurqa,
chay achka mana allinkunata Tayta Diospa qayllanpi ruraspanmi payta piñachirqa.
7 Asera sutiyoq mamacha rurachisqantam churarurqa Tayta Diospa templonman.
Chay templomantam Davidmanwan churin Salomonman Tayta Dios kaynata nirqa:
—Israel llapallan ayllukunamanta akllasqay Jerusalen llaqtapim hinaspa templopim sutiyta wiñaypaq churasaq.
8 Chaynataqa rurasaq tukuy kamachisqayta kasukuspanku serviqniy Moiseswan willachisqay yachachikuykunaman hina kawsaptinkum,
abuelonkuman qosqay allpamantam Israel casta runakunataqa manaña maylawmanpas yanqaqa purichisaqchu —nispa.
9 Ichaqa manamá paykunaqa kasukurqakuchu.
Rey Manasesqa paykunataqa astawanraqmi pantachirqa,
Israelpa mirayninkunapa qayllanmanta Tayta Diospa chinkachisqan runakunamantapas astawanraqmi mana allinkunata rurachirqa.
10 Chayraykum Tayta Dios paymanta willakuq serviqninwan nichirqa:
11 —Ñawpaq Amor casta runakunapa millakuypaq rurasqankumantapas aswan mana allinkunataraq Juda nacionpa reynin Manases rurasqanraykum chaynataq Juda nacion runakunatapas rurasqan taytachakunawan huchallichisqanraykum
12 Israelpa yupaychasqan Tayta Dios nin:
“Kunanmi apachimusaq Jerusalen llaqtamanwan Juda nacionpi yachaqkunaman hatunnin kaq castigota,
chayna castigomanta uyariqkunaqa muspaypi hinaraqmi rikurirunqaku.
13 Samaria llaqtatapas chaynataq Acabpa mirayninkunatapas castigasqayta hinam Jerusalen llaqtataqa castigasaq,
mayllasqa platota pakchachkaq hinam Jerusalen llaqtatapas mayllarusaq.
14 Wakin runaykunatapas qarqoruspaymi enemigonkunaman qoykusaq hinaptinmi llapa enemigonkunapa qechusqan hinaspa suwasqan kanqaku.
15 Paykunam qayllaypi mana allinkunata ruraspanku Egipto nacionmanta abuelonkupa lloqsimusqanku punchawkunamantaraq kunankama rabiachiwanku” nispa.
16 Chaymantapas Rey Manasesqa Jerusalen llaqtapim cantonmanta cantonkama mana huchayoq runakunata achkallataña wañurachirqa,
chaynataraqmi rurarqa huchallikusqanwan Juda nacionpi runakunata huchallichichkaspanpas chaynapi Tayta Diospa qayllanpi mana allinkunata ruranankupaq.
17 Rey Manasespa wakin rurasqankunaqa chaynataq huchallikusqankunaqa Juda nacion reykunapa wakin rurasqanmanta willakuq libropim qellqasqa kachkan.
18 Abuelonkuna hina Rey Manases wañukuptinmi palacionpi kaq huertapi otaq Uza sutiyoq runapa huertanpi pamparurqaku.
Paypa rantinpim churin Amonña gobiernarqa.
Juda nacionpi Rey Amonpa gobiernasqanmanta
19 Rey Amonqa iskay chunka iskayniyoq watanpim gobiernayta qallaykurqa.
Jerusalen llaqtapim gobiernarqa iskay wata.
Paypa mamanmi karqa Mesulemet sutiyoq warmi.
Chay mamanqa karqa Jotba llaqtayoq Haruzpa churinmi.
20 Taytan Manases hinam Rey Amonpas mana allinkunata rurarqa Tayta Diospa qayllanpi.
21 Taytanpa tukuy mana allin kawsasqanman hinam paypas kawsarqa.
Taytanpa adorasqan taytachakunatam paypas adorarqa hinaspam chaykunapa ñawpaqninpi qonqorakurqa.
22 Abuelonkunapa yupaychasqan Tayta Diosta saqeruspanmi paypa munasqanman hinaqa manaña kawsarqachu.
23 Rey Amonpa serviqninkunam paypa contranpi hoqarikuruspa hina palaciollanpi wañurachirqaku.
24 Aswanqa llaqta runakunam Rey Amonpa contranpi hoqariruq llapallan runakunata wañurachirqaku hinaspam churin Josiastaña rantinpi gobiernananpaq churarurqaku.