3 Chunka pusaqniyoq watamanña Rey Josias gobiernachkaspanmi Mesulampa willkan otaq Azaliaspa churin secretario Safanta Josias kacharqa Tayta Diospa templonman kaynata nispan:

4 —Sacerdotekunapa jefen Hilciaspatam rinki kayna nisqayta nimunaykipaq:

“Temploman runakunapa apamusqan qollqetayá otaq punkukunawan cuentallikuq runakunapa huñusqan qollqetayá huñuchiy

5 hinaspayá templo allichachiqkunaman qoykuy llamkaqkunaman paganankupaq.

6 Paganqakumá carpinterokunaman,

albañilkunaman hinaspa rumi labraqkunaman.

Chay qollqewantaqyá rantichunku qerukunatapas chaynataq labrasqa rumikunatapas,

chaykunawanyá templota allichachunku.

7 Llamkachiqkuna gastananpaq qollqe qosqankumantaqa amam cuentata mañanqakuchu,

paykunaqariki confianza runakunam” nispa.

8 Secretario Safan chayaruptinmi sacerdote Hilcias payta nirqa:

—Templopim tariruni Diospa yachachikuynin librota —nispa.

Chay librota Safanman Hilcias haywaykuptinmi pay leerqa.

9 Secretario Safanñataqmi reyman kutiruspan nirqa:

—Serviqnikikunaqa templopi huñusqanku qollqetaqa ñam qoykamunkuña templo allichachiqkunaman —nispa.

10 Chaymantam reyman niykurqa:

—Sacerdote Hilciasmi kay librota qoykuwan —nispa.

Reypa qayllanpim chay librota leerqa.

11 Yachachikuy libropi leesqanta uyariykuspanmi reyqa pachankunata llikiparqa.

12 Hinaspam sacerdote Hilciasta,

Safanpa churin Ahicamta,

Micaiaspa churin Acborta,

secretario Safanta hinaspa serviqnin Asaiasta kamachirqa:

13 —Tayta Diosta tapumuychik kay tarisqaykichik libropi imam willakusqanmanta.

Tapumuychiktaqyá ñoqapaqpas chaynataq Juda nacionpi yachaq lliw runakunapaqpas Tayta Diospa imam nisqanta.

Kay libroman hina abuelonchikkuna mana kasukusqanraykum Tayta Diospa piñakuyninqa contranchikpi mancharikuyllapaqña kachkan —nispa.

14 Hinaptinmi sacerdote Hilciasñataq,

Ahicampiwan,

Acborpiwan,

Safanpiwan hinaspa Asaiaspiwan rirqaku Diosmanta willakuq Hulda sutiyoq warmita tapukamunankupaq.

Payqa karqa Salumpa warminmi.

Chay qosan Salumqa karqa Ticvapa churinmi.

Ticvañataqmi karqa Harhaspa churin.

Harhasmi karqa templopi pachakunawan cuentallikuq.

Huldaqa Jerusalen llaqtapim yacharqa Mosoq Barriopi.

Chay runakuna chayaruspankumá paywan parlarqaku.

15-16 Chaymi Huldañataq paykunata nirqa:

—Israelpa yupaychasqan Tayta Diospa nisqantam kachamusuqnikichik runaman kaynata ninkichik:

“Juda nacion reypa leesqanman hinam kay llaqtapa contranpipas chaynataq kaypi yachaq runakunapa contranpipas apachimusaq chay libropi nisqay castigokunata.

17 Ñoqata saqeruwaspankum huk rikchaq taytachakunamanña inciensota kañarqaku chaykuna rurasqankuwan rabiachiwanankupaq.

Chayraykum piñakuyniyqa nina hina kay sitiopa contranpi ruparispan mana taninqachu.

18 Chaynaqa Israelpa yupaychasqan ñoqa Tayta Diosta tapuwanaykichikpaq kachamusuqnikichik Juda nacionpa reynintam kaynata nimunkichik:

Libropi kaqkunatam qamqa uyariykurqanki.

19 Kay llaqtapas chaynataq runankunapas mancharikuypaq ñakasqa kanankupaq contranpi rimasqaykunatam uyariykurqanki.

Sonqoykipi llakirikuspam ñoqapa qayllaypi humillakurqanki,

pachaykikunatapas qayllaypi llikipaspam waqarqanki,

chaykunataqa ñoqapas yachanim.

20 Chayraykum abueloykikuna hina wañukuspa hawka tiempollapi pampakunki.

Kay llaqtapa contranpi castigo apachimusqaytaqa manam rikunkichu” nispa.

Kutirispankum chaynata reyman willamurqaku.