Diospa contratonta kasukunankupaq huktawan prometekusqankumanta
23
Rey Josiasmi huñurachimurqa Juda nacionpi chaynataq Jerusalen llaqtapi llapallan ancianokunata.
2 Reymi Tayta Diospa templonman rirqa Juda nacionniyoq taksapas-hatunpas llapallan runakunapiwan,
Jerusalen llaqtapi llapallan yachaqkunapiwan,
sacerdotekunapiwan hinaspa Diosmanta willakuqkunapiwan.
Llapallanku uyarichkaptinmi templopi tarisqanku contrato librota rey leerqa.
3 Reymi pilarpa waqtanpi sayaykuspan Tayta Diospa qayllanpi contratota rurarqa.
Chayman hinam prometekurqa Tayta Diosta qatinanpaq,
prometekurqataqmi kamachisqankunatapas,
Chunkantin Kamachikuyninkunatapas,
decretonkunatapas tukuy sonqonwan hinaspa tukuy vidanwan kasukunanpaq,
prometekurqataqmi chay libropi Dioswan contrato rurasqan palabrakunata cumplinanpaqpas.
Chaypi kaq llapallan runakunapas reypa contrato rurasqantam chaskirqaku.
Taytachakunata Rey Josias ñutusqanmanta
4 Chaymantam rey kamachirqa sacerdotekunapa jefen Hilciasta,
wakin sacerdotekunata hinaspa punkukunawan cuentallikuqkunata temploman yaykuspanku Baalta,
Aserata hinaspa cielopi llapallan lucerokunata servinankupaq kaqkunata horqomunankupaq.
Jerusalen llaqtamanta horqoramuptinkum Cedron nisqanku chunniq pampapi kañachirqa,
uchpantapas Betel llaqtakamam aparachirqa.
5 Juda nacionpa llaqtankunapi chaynataq Jerusalen llaqtapa muyuriqnin moqokunapa capillankunapi incienso kañanankupaq Juda nacion reykunapa churasqan sacerdotekunatam qarqorurqa.
Qarqorurqataqmi Baalman,
intiman,
killaman,
figuraman rikchakuq lucerokunaman hinaspa cielopi llapallan lucerokunaman incienso kañanankupaq churasqanku sacerdotekunatapas.
6 Tayta Diospa templonpi kaq Asera sutiyoq mamachatapas Jerusalen llaqtamanta hawaman horqorachispanmi Cedron sutiyoq wayqoman wischurachirqa,
chaypim kañarurqaku uchpayanankama.
Uchpantañataqmi wakchakunapa sepulturanman maqchiparurqaku.
7 Tuñichirqataqmi templopa pationpi mariconkunapa cuartonkunatapas chay cuartokunapim warmikunapas Asera sutiyoq mamachapaq pachakunata awaqku.
8 Juda nacion llaqtakunapi llapallan sacerdotekunata huñurachimuspanmi,
chay sacerdotekunapa incienso kañananku moqokunapi capillakunatapas millakuypaqta rurarqa.
Chaynataqa rurarqa Geba llaqtamanta Beerseba llaqtakamam.
Tuñichirqataqmi llaqtapa gobernadornin Josueypa punkunpi capillakunatapas.
Chay punkuqa karqa llaqtapa zaguan punkunpa ichoq lawninpim.
9 Moqokunapi incienso kañaq sacerdotekunaqa manam seqaqkuchu Jerusalen llaqtapi kaq Tayta Diospa altarninmanqa.
Chaywanpas sacerdotemasinkunawan kuskam mana qonchuyoq tantata mikuqku.
10 “Ben-Hinom” sutiyoq wayqopi churinku kañananku Tofet sutiyoq sitiotapas millakuypaqtam rurarurqa chaynapi manaña pipas churinta Moloc sutiyoq taytachaman kañananpaq.
11 Juda nacion reykunapa intiman qosqanku caballokunatapas chinkarachirqam.
Chay caballokunaqa karqa rey serviq Natan-melecpa cuartonpa hichpan punkupim otaq templopa pationpim.
Kañarurqataqmi intita adoranankupaq carretakunatapas.
12 Rey Josiasqa tuñirachirqataqmi Acazpa wasinpa qatanpi kaq altarkunatapas,
chaykunataqa Juda nacionpa reyninkunam hatarichirqa.
Tuñichirqataqmi templopa iskaynin pationkunapi Rey Manasespa hatarichisqan altarkunatapas.
Chaypi ñutuparuspanmi allpantapas Cedron sutiyoq wayqoman wischurachimurqa.
13 Jerusalen llaqtapa chimpan moqokunapi otaq Olivos Moqopa surlawninpi capillakunatapas reyqa millakuypaqtam rurarurqa.
Chaykunatam Israel nacionpa reynin Salomon hatarichirqa Sidon llaqta runakunapa Astarte sutiyoq cheqnipay mamachankupaq,
hatarichirqataqmi Moab casta runakunapa Quemos sutiyoq cheqnipay taytachankupaqpas chaynataq Amonpa mirayninkunapa Milcom sutiyoq millakuypaq taytachankupaqpas.
14 Ñutuparurqam adorananku rumi pilarkunatapas,
kuchuparurqataqmi Asera sutiyoq mamachakunatapas,
chaykuna horqosqanku sitiomanpas runakunapa tullunkunawanmi huntarachirqa.
15 Tuñichirqataqmi Betel llaqtapa moqonpi altartapas chaynataq Israel nacion huchallichiq Nabatpa churin Jeroboampa hatarichisqan moqopi capillatapas,
chaykunataqa kañarurqa uchpayanankamam.
Asera sutiyoq mamachatapas hina paytaqmi kañarurqa.
16 Chay sitiopi Rey Josias qawarispanmi rikururqa waqtakunapi sepulturakunata chaymi runakunata kachaspan tullukunata horqorachimurqa hinaspam altarkunapa hawanpi kañarurqa millakuypaqña kananpaq,
chaynapim Tayta Diospa nisqan cumplikurqa runanwan willachisqanpi hina.
17 Rey Josiasmi tapukurqa:
—¿Pipa sepulturantataq wakpiqa qawachkani?
—nispa.
Llaqta runakunañataqmi nirqa:
—Wakqa Juda nacionmanta hamuq Diospa runanpa sepulturanmi.
Kay Betel llaqtapa altarninpi kunan rurasqaykikunatam payqa rimarqaña —nispa.
18 Rey Josiasmi nirqa:
—Amayá pipas paypa tullunkunataqa kuyuchichunchu —nispa.
Chaynapim paypa tullunkunawan Samaria llaqtamanta hamuq Diosmanta willakuqpa tullunkunapas hinalla karqa.
19 Tayta Diosta piñachinankupaq Israel nacion reykunapa Samaria llaqtakunapa muyuriqnin moqokunapi hatarichisqan capillakunatapas,
Betel llaqtapi rurasqanta hinam Rey Josiasqa lliwta chinkarachirqa.
20 Moqo capillakunapi kaq llapallan sacerdotenkunatapas hina chay altarkunapa hawallanpim wañurachirqa,
chaypitaqmi kañarurqa runakunapa tullunkunatapas hinaspam Jerusalen llaqtaman kutikurqa.
Pascua Fiestata Rey Josias rurasqanmanta
21 Rey Josiasmi llapallan runakunata kamachispan nirqa:
—Kay contrato libropi qellqasqaman hinayá yupaychasqanchik Tayta Diospaq Pascua Fiestata ruraychik —nispa.
22 Pascua Fiestataqa manañam rurarqakuñachu Israel nacionta jefekuna gobiernasqan watamantaraq,
manataqmi rurarqakuchu Israel nacion reykunapa tiemponpipas nitaq Juda nacion reykunapa tiemponpipas.
23 Chunka pusaqniyoq watamanña Rey Josias gobiernachkaptinmi Jerusalen llaqtapi Pascua Fiestata rurarqaku.
Juda nacionpa contranpi hinallaraq Tayta Diospa piñakusqanmanta
24 Rey Josiasqa chinkarachirqataqmi espiritistakunatapas,
espiritu qayaqkunatapas,
wasi taytacha-mamachakunatapas chaynataq wakin taytacha-mamachakunatapas.
Chinkarachirqataqmi Juda nacionpi chaynataq Jerusalen llaqtapi adoranankupaq llapa cheqniypay qawasqankutapas.
Chaykunataqa rurarqa templopi sacerdote Hilciaspa tarisqan libropi Diospa yachachikuyninta cumplinanpaqmi.
25 Manam huk reypas karqachu Tayta Diosman kutirikuq Rey Josias hinaqa,
payqa tukuy sonqonwanmi,
tukuy vidanwanmi hinaspa tukuy kallpanwanmi Moisespa qellqasqan llapa yachachikuykunaman hina kawsarqa.
Pay hinaqa manamá huk reypas karqachu paypa ñawpaqnintapas nitaq paypa qepantapas.
26 Chaywanpas Manasespa tukuy rabiachisqanraykum Tayta Diospa piñakuyninqa karqa ratarichkaq nina hina chaymi Juda nacionpa contranpi piñakuyninqa hinalla karqa.
27 Chayraykum Tayta Diosqa nirqa:
—Israel nacion wischusqayta hinam Juda naciontapas qayllaymanta wischusaq.
Kay akllasqay Jerusalen llaqtatapas qepanchakurusaqñam,
qepanchakurusaqtaqmi “Sutiytam chaypi churasaq” nisqay templotapas —nispa.
Rey Josiaspa wañukusqanmanta
28 Josiaspa wakin rurasqankunaqa Juda nacion reykunapa wakin rurasqanmanta willakuq libropim qellqasqa kachkan.
29 Chay tiempopim Egipto nacionpa reynin Faraon Necao rirqa Eufrates Mayukama chaynapi Asiria nacionpa reyninta yanapananpaq.
Rey Josiasñataqmi Rey Necaopa contranpi rirqa,
ichaqa Rey Necaomi Meguido llaqta lawpi Rey Josiasta rikuruspan wañurachirqa.
30 Hinaptinmi runakuna carretaman wañusqataña churkuruspanku Meguido llaqtamanta Jerusalen llaqtaman aparqaku hinaspam kikinpa sepulturanpi pamparurqaku.
Llaqta runakunañataqmi Josiaspa churin Joacazta pusaramuspanku aceitewan umaman tallispa taytanpa rantinpi rey kananpaq churarurqaku.
Juda nacionpi Joacazpa gobiernasqanmanta
31 Rey Joacazqa iskay chunka kimsayoq watanpim gobiernayta qallaykurqa.
Kimsa killallam gobiernarqa Jerusalen llaqtapi.
Mamanmi karqa Libna llaqtayoq Jeremiaspa churin Hamutal.
32 Chay Rey Joacazpas Tayta Diospa qayllanpim mana allinkunata rurarqa abuelonkunapa rurasqankunata hina.
33 Chay Rey Joacaz Jerusalen llaqtapi mana gobiernananpaqmi payta Faraon Necao cadenawan presocharurqa Hamat nacionpi kaq Ribla llaqtapi.
Juda nacionniyoq runakunatapas multarurqam kimsa waranqa kimsa pachaknin kilo qollqewan hinaspa kimsa chunka kimsayoq kilo qoriwan.
34 Faraon Necaoqa gobiernananpaqmi churarqa Eliaquim sutiyoq Rey Josiaspa huknin churintaña chaynapi taytanpa rantinpi gobiernananpaq.
Chay Rey Eliaquimpa sutintam tikrarurqa Joacinmanña.
Joacazta Egipto nacionman pusaruptinmi chaypiña wañukurqa.
35 Rey Joacinmi Faraonman pagarqa qori-qollqeta.
Ichaqa Faraon Necaopa kamachisqanta hina payman qonanpaqmi Juda nacionniyoq runakunata kamachirqa kapuqniyoq kasqankuman hina contribucionta qonankupaq.
Juda nacionpi Rey Joacim gobiernasqanmanta
36 Rey Joacimqa iskay chunka pichqayoq watanpim gobiernayta qallaykurqa,
chunka hukniyoq watam Jerusalen llaqtapi gobiernarqa.
Paypa mamanmi karqa Zebuda sutiyoq warmi,
chay mamanqa karqa Ruma llaqtayoq Pedaiaspa churinmi.
37 Rey Joacimqa Tayta Diospa qayllanpim mana allinkunata rurarqa abuelonkunapa rurasqanman hina.