—Diospaq sapaqchasqa kaq baultayá churaychik Israel nacionpa reynin Davidpa churin Salomonpa rurachisqan temploman chaynapi amaña hombronaykichikpaq.

Kunanqa yupaychasqanchik Tayta Diostayá serviychik,

serviychiktaqyá paypa runan Israel casta runakunatapas.

4 Alistakuychikyá abueloykichikkunapa castankunaman hina muyuyninpi ruranaykichikpaq,

chaynataqa rurankichik Israel nacionpa reynin Davidpapas chaynataq churin Salomonpapas qellqaspa kamachikusqankuman hinayá.

5 Israel castamasikichikpaqyá Leviy castamanta kaqkuna wakiqnikichik santuariopi kaychik.

6 Paykunapaqyá wañuchipuychik Pascua Fiestapi wañuchina carnerokunata.

Chuyanchakuspataqyá alistaychik Israel castamasikichikpaq,

chaynataqa rurankichik Moisesman Tayta Diospa kamachisqanpi hina ruranankupaqmi —nispa.

7 Rey Josiaspas kikinpa animalninkunamantam qorqataq ovejakunata,

malta carnerokunata hinaspa malta chivatokunata,

chaykunataqa Pascua Fiestapaqmi qorqa llapallan chaypi kaqkunaman.

Chay animalkunam karqa kimsa chunka waranqa taksa animalkuna hinaspa kimsa waranqa bueyeskuna.

8 Jefekunapas voluntadninkumantam qorqaku runakunaman,

sacerdotekunaman hinaspa Leviy casta runakunaman.

Diospa templonpi kamachikuq Hilciaspas,

Zacariaspas hinaspa Jehielpas qorqam sacerdotekunaman iskay waranqa soqta pachaknin carnerokunata Pascua Fiestapi wañuchinankupaq,

qorqakutaqmi kimsa pachak bueyeskunatapas.

9 Leviy casta jefe Conaniaspas,

Semaiaspas,

wawqen Natanaelpas,

Hasabaiaspas,

Jehielpas hinaspa Josabadpas qorqataqmi Leviy castamasin runakunaman pichqa waranqa taksa animalkunata hinaspa pichqa pachak bueyeskunata,

chaykunataqa qorqa Pascua Fiestapaqmi.

10 Fiestapaq chayna alistasqa karuptinmi sacerdotekuna maymi kanankuman churakurqaku,

Leviy casta runakunapas muyuyninpi ruranankupaqmi churakurqaku reypa kamachisqanman hina.

11 Chaynapim wañuchirqaku Pascua Fiestapaq wañuchina animalkunata hinaptinmi sacerdotekunañataq challarqaku Leviy casta runakunapa haywasqan yawarta,

Leviy casta runakunañataqmi animalkunapa qarankunata chusturqaku.

12 Hina paykunataqmi rakinarqa lliw kañanapaq kaq animalkunatapas,

rakinarqakuqa familiankuman hina Israel casta runakunaman qonankupaqmi chaynapi Moisespa libronpi qellqasqaman hina ofrecenankupaq,

hina chaynallatam rurarqaku bueyeskunawanpas.

13 Reglamentoman hinam kankarqaku Pascua carnero aychata,

Diospaq sapaqchasqa kaqkunatañataqmi yanurqaku mankakunapi,

perolkunapi hinaspa sartenkunapi,

chaynata ruraspankum apurawllamanña aypurqaku llapallan runakunaman.

14 Leviy casta runakunaqa prepararqakutaqmi kikinkupaqpas chaynataq sacerdotekunapaqpas,

chaynataqa rurarqaku Aaronpa miraynin sacerdotekuna tutaykuqkama lliw kañanapaq kaqkunatawan wirakunata kañaypi kasqankuraykum.

15 Asafpa miraynin takiqkunapas maymi kasqankupim karqaku Davidpa,

Asafpa,

Hemanpa hinaspa Jedutunpa kamachisqanman hina,

Jedutunqa karqa Rey Davidpaq Diosta tapuqmi.

Punkukunawan cuentallikuqkunapas sapakamam punkupi karqaku,

manam puestonkutaqa saqeqkuchu imapaqpas,

Leviy castamasinkunam paykunapaqqa preparamurqa.

16 Chay punchawpi Tayta Diospaq Pascua Fiestata ruranankupaqmi chaynata alistarqaku,

alistarqakutaqmi Tayta Diospa altarninpi lliw kañana kaqkunata kañanankupaqpas,

chaynataqa rurarqaku Rey Josiaspa kamachikusqanman hinam.

17 Chaypi kaq Israelpa mirayninkunam tiempollanpi Pascua Fiestata rurarqaku,

qanchis punchawmi rurarqaku mana Qonchoyoq Tanta Hatun Fiestataqa.

18 Diosmanta willakuq Samuelpa tiemponmantaraqmi Israelpa miraynin runakunaqa mana rurarqakuchu chayna Pascua Fiestataqa.

Manataqmi Israel nacionpa mayqan reyninpas rurarqachu Rey Josiaspa rurasqan Pascua Fiestata hinaqa.

Paymá rurarqa sacerdotekunawan,

Leviy casta runakunawan,

chaypi kaq Israel nacionniyoq runakunawan hinaspa Jerusalen llaqtapi yachaqkunawan.

19 Chay Pascua Fiestataqa rurarqaku chunka pusaqniyoq watamanña Rey Josias gobiernachkaptinmi.

20 Tayta Diospa templonta Rey Josias allicharachisqanpa qepantañam Egipto nacionpa reynin Necao hamururqa guerrawan,

payqa hamururqa Eufrates Mayupa hichpan Carquemes llaqtapi peleananpaqmi.

Paywan peleaq Josias lloqsiptinmi.

21 Rey Necao runankunawan kaynata nichimurqa:

—Juda nacionpa reynin ¿imanachkaykitaq qamtaqa?

Ñoqaqa manam qampa contraykipichu hamuni aswanqa guerrawan hapiqniypa contranpim,

Diosmi niwarqa apurawman rinaypaq,

chaynaqa amayá yanapaqniy Diospa contranpiqa kaychu,

mana chayqa paymi chinkarachisunkiman —nispa.

22 Rey Josiasmi ichaqa mana asurispa pantarachikurqa paywan peleananpaq,

manamá kasukurqachu Rey Necaopa nisqanta,

paypa nisqanqa karqa Diosmantam.

Chaynapimá guerraman yaykurqa Meguido llaqtapa hichpan pampapi.

23 Flechawan peleaqkuna Rey Josiasta flecharuptinkum serviqninkunata nirqa:

—¡Horqowaychik kaymanta llumpay heridasqam kachkani!

—nispa.

24 Chaymi serviqninkuna chay carretamanta horqoruspanku hinaykurqaku huknin carretanmanña hinaspam aparurqaku Jerusalen llaqtaman hinaptinmi chaypiña wañukurqa.

Paytaqa pamparurqaku abuelonkunapa sepulturanpim.

Chaymi Juda nacionpi chaynataq Jerusalen llaqtapi llapallan kaqkuna llakikurqaku.

25 Rey Josiasmantam Jeremias qellqarqa aya takita chaymi llapallan takiqkuna qaripas-warmipas aya takiwan Josiasta yuyarinku kay libro qellqasqa kasqan tiempokama,

Israel nacionpimá costumbreña karqa.

Chaykunaqa qellqasqa kachkan aya-takikuna libropim.

26-27 Qallariyninmanta tukuyninkama Rey Josiaspa wakin rurasqankunaqa hinaspa Tayta Diospa yachachikuyninpi qellqasqaman hina allin rurasqankunaqa Juda nacionpi chaynataq Israel nacionpi reykunapa vidanmanta willakuq libropi qellqasqam kachka n.