Rey Joacazpa gobiernasqanmanta
36
Rey Josiaspa churin Joacaztam taytanpa rantinpi Jerusalen llaqtapi gobiernananpaq nacionpi runakuna churarurqaku.
2 Rey Joacazqa iskay chunka kimsayoq watanpim gobiernayta qallaykurqa.
Kimsa killallam gobiernarqa Jerusalen llaqtapi.
3 Ichaqa Egipto nacionpa reyninmi qarqorurqa Jerusalen llaqtapi rey kayninmanta hinaspam chay nacionta multaspa pagachikurqa kimsa waranqa kimsa pachaknin kilo qollqetawan kimsa chunka kimsayoq kilo qorita.
4 Chaywanpas Egipto nacionpa reyninqa Juda nacionpa chaynataq Jerusalen llaqtapa reynin kananpaqmi churarqa Joacazpa wawqen Eliaquimta.
Chay Rey Eliaquimpa sutintam tikrarurqa Joacinmanña.
Rey Necaoqa Joacimpa wawqen Joacaztapas pusarurqam Egipto nacionman.
Rey Joacimpa gobiernasqanmanta
5 Rey Joacimqa iskay chunka pichqayoq watanpim gobiernayta qallaykurqa,
chunka hukniyoq watam Jerusalen llaqtapi gobiernarqa.
Payqa yupaychasqan Tayta Diospa qayllanpim mana allinkunata rurarqa.
6 Babilonia nacionpa reynin Nabucodonosor paypa contranpi hamuruspanmi pusarurqa Babilonia llaqtaman bronce cadenakunawan watasqata.
7 Tayta Diospa templonpi serviciokunatapas aparuspanmi churaykurqa Babilonia llaqtapi templonman.
8 Rey Joacimpa wakin rurasqankunaqa,
millakuypaq kaqkuna rurasqankunaqa hinaspa paywan imapas pasaqkunaqa qellqasqa kachkan Juda nacionpa hinaspa Israel nacionpa reyninkunapa vidanmanta willakuq libropim.
Paypa rantinpim churin Joaquinña gobiernarqa.
Rey Joaquinwan ancianokuna Babilonia nacionman preso risqankumanta
9 Rey Joaquinqa chunka pusaqniyoq watanpim gobiernayta qallaykurqa.
Payqa Jerusalen llaqtapim gobiernarqa kimsa killa chunka punchawllan.
Chay reyqa Tayta Diospa qayllanpim mana allinkunata rurarqa.
10 Mosoq wata chayaramuptinmi Rey Nabucodonosor Babilonia llaqtaman pusachimurqa Rey Joaquinta,
paywan kuskatataqmi apachimurqa Tayta Diospa templonpi aswan valorniyoq kaqkunatapas,
Juda nacionpi hinaspa Jerusalen llaqtapi gobiernananpaqñataqmi churarqa Joaquinpa ayllun Sedequiasta.
Rey Sedequiaspa gobiernasqanmanta
11 Rey Sedequiasqa iskay chunka hukniyoq watanpim gobiernayta qallaykurqa.
Jerusalen llaqtapim gobiernarqa chunka hukniyoq wata.
12 Chay Rey Sedequiasqa Tayta Diospa qayllanpim mana allinkunata rurarqa.
Manataqmi humillakurqachu Tayta Diosmanta willakuq Jeremiaspa qayllanpipas.
13 Rey Nabucodonosormi Sedequiasta Diospa sutinpi jurachirqa payta kasukunanpaq ichaqa Sedequiasmi paypa contranpi hatarirurqa.
Sonqonta rumiyarachispanmi mana kutirikurqachu Israelpa yupaychasqan Tayta Diosman.
14 Llapallan sacerdotekunapa jefenkunapas llapallan runakunapiwanmi traicionayllapi karqaku.
Jerusalen llaqtapi Tayta Dios kikinpaq sapaqchasqan templontapas mana respetaspankum llapa nacionkunapa millakuypaq rurasqankuta hina rurarqaku.
15 Chaymi abuelonkunapa yupaychasqan Tayta Dios sapa kutilla kacharqa paymanta willakuqkunata,
chaynataqa rurarqa runankunatawan yachanan templota llakipayasqanraykum.
16 Paykunam ichaqa asikurqaku Diospa kachasqan runakunamanta,
paykunapa willakusqantapas mana uyariq tukuspankum Diosmanta willakuqkunatapas burlakurqaku.
Runankunapa contranpi Tayta Dios piñakuruptinmi manaña ima ruraytapas atirqakuchu.
Diospa templon tuñichisqa kasqanmanta
17 Paykunapa contranpim Tayta Dios kachamurqa Caldea lawpi reyta hinaptinmi pay espadawan templopi wañurachirqa mozokunata,
manam llakipayarqachu mozokunatapas,
doncellakunatapas,
yuyaqkunatapas nitaq eqoyasqakunatapas.
Llapallankutamá paypa makinman Tayta Dios churaykurqa.
18 Chay reyqa apachirqataqmi Diospa templonpi kaq hatunpas-taksapas llapallan serviciokunata,
apachirqataqmi Tayta Diospa templonpi qori-qollqetapas reypa qori-qollqetapas chaynataq jefekunapa qori-qollqentapas.
Llapallantamá apachirqa Babilonia lawman.
19 Diospa templontapas kañaykuspankum taqmarurqaku Jerusalen llaqtapa murallantapas.
Kañaykurqakutaqmi llaqtapa llapallan palacionkunatapas,
pakiparurqakutaqmi llapallan valorniyoq kaqkunatapas.
20 Wañuymanta wakin puchuqkunatañataqmi presota pusarurqaku Babilonia nacionman hinaptinmi reypa hinaspa churinkunapa sirvientenña karqaku,
chaynaqa karqaku Persia nacionpa reyninkuna Babilonia nacionpi gobiernayta qallarinankukamam.
21 Chaynapim Jeremiaswan Tayta Diospa willachisqankuna cumplikurqa.
Allpapas samarqataqmi preso pusasqa kasqanku tiempokama.
Purmarqamá qanchis chunka wata cumplikunankama.
Rey Ciropa decretonmanta
22 Persia nacionpi Rey Ciropa gobiernasqan punta kaq watapim Persia nacionpi Rey Cirota Tayta Dios sonqocharqa paymanta willakuq Jeremiaswan willachisqanman hina,
chaynataqa rurarqa Tayta Diospa willachisqan cumplikunanpaqmi.
Rey Cirom willachimurqa lliw gobiernasqanpi kaqkunaman simiwan hinaspa qellqasqawan kaynata:
23 Persia nacionpi ñoqa Rey Cirom kaynata nini:
Hanaq pachapi Tayta Diosmi qowarqa kay pachapi nacionkunata hinaspam kamachiwarqa Juda lawpi kaq Jerusalen llaqtapi templota hatarichipunaypaq.
Qamkuna ukupi kaq Tayta Diospa runankunatayá paypuni yanapachun hinaptinyá chaylawman richunku.