25
Isqon watamanña Rey Sedequias gobiernachkaptinmi chunka kaq killapa chunka kaq punchawninpi Babilonia nacionpa reynin Nabucodonosor llapa tropankunapiwan Jerusalen llaqtapa contranpi hamuruspan muyuriqninpi churakururqa.
Campamentonta sayarachispanmi llaqtapa contranpi hawa lawninpi perqata hatarirachirqa.
2 Chaynapimá Jerusalen llaqtaqa enemigopa chawpichasqan karqa Sedequiaspa gobiernasqan chunka hukniyoq watakama.
3 Killapa isqon punchawninpim llaqtapi runakuna puramente yarqaymanta karqaku mikunankupaq manaña imapas kaptin.
4 Llaqtapa murallanta Babilonia tropakuna toqoruptinkum Jerusalen llaqtapi llapa soldadokuna tutallan lluptirurqaku llaqtapa punkunmanta riq ñanninta.
Chay punkum karqa iskay perqapa chawpinpi otaq reypa huertanpa hichpanpi.
Paykunaqa ayqekurqaku Babilonia soldadokuna llaqtapa muyuriqninpi kachkaptinkum.
Reypas pasakurqamá Araba Qechwaman riq ñanninta.
5 Babilonia tropakunañataqmi qatipaspanku Rey Sedequiasta hapiramurqaku Jerico llaqtaman riq pampapi.
Sedequiaspa tropankunañataqmi sapallanta saqeruspanku cheqekururqaku.
6 Rey Sedequiasta presocharuspankum Babilonia nacionpa reyninman pusarqaku.
Paymi kachkarqa Ribla llaqtapi.
Chaypim Sedequiasta sentenciarqaku.
7 Chay Ribla llaqtapi Sedequias qawachkaptinmi churinkunata wañuchirqaku,
Rey Sedequiastañataqmi ñawinkunata horqoruspanku bronce cadenawan watasqata Babilonia llaqtaman pusarqaku.
Jerusalen llaqtapi templo tuñichisqankumanta
8 Babilonia nacionpa reynin Nabucodonosor chunka isqonniyoq watamanña gobiernachkaptinmi pichqa kaq killapa qanchis kaq punchawninpi Jerusalen llaqtaman chayaramurqa reyta waqaychaq soldadokunapa capitannin otaq reypa serviqnin Nabuzaradan.
9 Paymi kañaykachirqa Tayta Diospa templonta,
reypa palacionta,
Jerusalen llaqtapi llapallan wasikunata hinaspa kamachikuqkunapa llapallan wasinkunata.
10 Reyta waqaychaq soldadokunapa capitanninwan kaq Babilonia nacionniyoq llapallan soldadokunam Jerusalen llaqtapa muyuriqninpi murallata taqmarurqaku.
11 Reyta waqaychaq soldadokunapa capitannin Nabuzaradanmi presochasqata pusarqa Jerusalen llaqtapi puchuq runakunata,
Babilonia nacionpa reyninman qokuq runakunata chaynataq wakin comun runakunatapas.
12 Rey cuidaq soldadokunapa capitanninqa wakcha runakunallatañam chay nacionpiqa puchuykachirqa uvas huertakunatawan chakrakunata llamkanankupaq.
13 Tayta Diospa templonpi bronce pilarkunata,
tiyanankunata chaynataq templopi yaku churananku bronce estanqueta ñutuparuspankum chay llapa bronceta Babilonia lawman aparqaku.
14 Aparqakutaqmi mankakunatapas,
palakunatapas,
mechero limpianakunatapas,
wisllakunatapas,
servichikunanku broncemanta llapa serviciokunatapas,
15 incienso qontichinakunatapas,
tazonkunatapas.
Tukuy ima qorimanta kaqkunatapas chaynataq qollqemanta kaqkunatapas reyta waqaychaq soldadokunapa capitanninmi aparqa.
16 Templopi kananpaqmi broncemanta Salomon rurachirqa chay iskay pilarkunata,
rurachirqataqmi estanquetapas hinaspa estanquepa tiyanankunatapas,
chaykunapa llasayninqa manaña yupay atinam karqa.
17 Sapa pilarkunapa sayayninmi karqa pusaq metro masnin puntanpi broncemanta adornoyoq.
Sapa adornopa sayayninmi karqa iskay metro masnin,
chay adornopa muyuriqninmi karqa granadawan adornasqa broncemanta malla.
Iskaynin pilarkunam hina chaynalla karqa.
Juda nacion runakuna preso risqankumanta
18 Reyta waqaychaq soldadokunapa capitanninqa pusarqataqmi sacerdotekunapa jefen Seraiastapas,
payman qatiqnin sacerdote Sofoniastapas chaynataq punkukunawan cuentallikuq kimsa runakunatapas.
19 Llaqtapi runakunamantapas presocharqam soldadokunapa capitanninta,
presocharqataqmi Rey Sedequiaspa consejaqnin llaqtapi yachaq pichqa runakunatapas chaynataq tropakunapa capitanninpa secretariontapas,
payqa karqa guerrapaq runakuna huñumuqmi,
presocharqataqmi llaqtapi yachaq soqta chunka runakunatapas.
20 Paykunatamá pusarqa reyta waqaychaq soldadokunapa capitannin Nabuzaradan,
pusarqaqa Ribla llaqtapi kaq Babilonia nacionpa reyninmanmi.
21 Babilonia nacionpa reynin kamachiptinmi Hamat law Ribla llaqtapi paykunata wañurachirqaku.
Chaynatamá Juda nacionniyoq runakunaqa allpankumanta preso pusasqa karqaku.
Juda nacionpi puchuqkuna Egipto nacionman lluptisqankumanta
22 Juda nacionpi puchuq runakunapaqmi Babilonia nacionpa reynin Nabucodonosor prefectota churarqa Safanpa willkan otaq Ahicampa churin Gedaliasta.
23 Gedaliasta prefecto kananpaq Babilonia nacionpi rey churarusqanta tropakunapa jefenkuna yacharuspankum Mizpa llaqtaman hamurqaku,
hamurqakuqa tropankunapiwan kuskam.
Hamurqakutaqmi Netaniaspa churin Ismaelpas,
Careapa churin Johananpas,
Netofa llaqtayoq Tanhumetpa churin Seraiaspas chaynataq Maaca llaqtayoq runapa churin Jaazaniaspas,
paykunaqa hamurqaku runankunapiwanmi.
24 Prefecto Gedaliasmi paykunamanwan runankunaman juramentaspan nirqa:
—Babilonia nacion runakuna serviytaqa ama manchakuychikchu.
Hinapi yachaspayá Babilonia nacionpi reyta serviychik,
chaynata ruraspaqa hinaspaqa allinmi kankichik —nispa.
25 Qanchis killaman richkaptinñataqmi reykunapa castanmanta kaq Elisamapa willkan otaq Netaniaspa churin Ismael chunka runakunapiwan rispa Gedaliasta wañurachirqa.
Wañurachirqataqmi Juda nacionmanta kaq runakunatapas chaynataq Mizpa llaqtapi yachaq Babilonia runakunatapas.
26 Hinaptinmi Babilonia runakunata manchakuspanku llapa runakuna taksapas-hatunpas tropakunapa capitanninkunapiwan kuska Egipto nacionman lluptikurqaku.
Babilonia llaqtapi preso kachkaptin Rey Joaquinta kacharisqankumanta
27 Juda nacionpa reynin Joaquinta Babilonia nacionman preso pusasqankum richkarqa kimsa chunka qanchisniyoq watamanña,
chay watapa chunka iskayniyoq killanpim,
iskay chunka qanchisniyoq punchawninpi chay Rey Joaquinta carcelmanta horqorurqa.
Paytaqa horqorurqa Evil-merodac sutiyoq Babilonia nacionpa reyninmi,
horqorurqaqa gobiernayta qallarisqan watapim.
28 Kuyakuywan rimapayaspanmá chay llaqtapi wakin reykunamantapas aswan reqsisqataraq churarqa.
29 Carcelpi kasqan pachanta mudarachiptinmi reywan kuska mikurqa wañukunan punchawkama.
30 Kawsanan punchawkamam sapa punchaw mikunanpaq qoqku Babilonia nacion reypa qosqan mikuyta.