Gedaliasta wañuchisqankumanta
41
Qanchis kaq killapim Elisamapa willkan otaq Netaniaspa churin Ismael chunka runakunapiwan rirqa Mizpa llaqtapi yachaq Ahicampa churin Gedaliasman.
Ismaelqa karqa reypa mirayninmanta kaqmi chaynataq reypa tropankunapa capitanninmi.
Chaypi mikuchkaptinkum
2 Netaniaspa churin Ismaelñataq chunkantin runankunapiwan hatariruspa Safanpa willkanta otaq Ahicampa churin Gedaliasta espadawan wañurachirqaku.
Gedaliastaqa Babilonia nacionpa reyninmi churarqa gobiernananpaq.
3 Wañurachirqakutaqmi Gedaliaswan kaq Juda casta runakunatapas chaynataq chaypi tarikuq Caldea soldadokunatapas.
4 Iskay punchawmanña Gedalias wañurachisqankuta manaraq pipas yacharuchkaptinmi
5 Siquem llaqtamanta,
Silo llaqtamanta chaynataq Samaria llaqtamanta chayaramurqaku pichqa chunka runakuna.
Paykunaqa chayarurqaku barbankupas afeitasqam,
pachanku llikipasqam chaynataq cuerponkupas kuchupasqam.
Paykunaqa apamurqakutaqmi kawsaykunamanta ofrendakunatapas chaynataq inciensotapas Tayta Diospa templonpi presentanankupaq.
6 Mizpa llaqtaman chayaykuchkaptinkuñam Netaniaspa churin Ismael paykunaman waqastin taripaykurqa hinaspam paykunata nirqa:
—Ahicampa churin Gedaliastayá qawaykamuychik —nispa.
7 Llaqtaman yaykuruptinkuñataqmi Netaniaspa churin Ismael runankunapiwan paykunata wañurachispa pozoman wischuykurqaku.
8 Ichaqa paykunamanta chunka runakunam Ismaelta ruegakuspa nirqaku:
—Amayá wañurachiwaykuchu.
Ñoqaykupam kachkan chakrapi pakasqa achkallaña trigoyku,
cebadayku,
aceiteyku chaynataq mielniykupas —nispa.
Chayraykum paykunataqa mana wañuchirqakuchu riqmasinkunatawan kuskataqa.
9 Gedaliastawan kuskata llapallan wañuchisqanku runakunapa ayankunatam Ismael wischuykurqa pozoman.
Chay pozotaqa Rey Asaraqmi rurachirqa Israel nacionpa reynin Baasa atacaptin.
Chay pozotamá Netaniaspa churin Ismael ayakunawan huntarachirqa.
10 Chaymantañataqmi presocharurqa Mizpa llaqtapi puchoq runakunata,
reypa warmi churinkunata chaynataq reyta cuidaq soldadokunapa jefen Nabuzaradanpa saqesqankunatapas,
paykunatam gobiernachirqa Ahicampa churin Gedaliaswan.
Presokunata pusarikuspamá Netaniaspa churin Ismaelqa pasarqa Amonpa mirayninkunapa allpanman.
11 Careapa churin Johananmi tropakunapa capitanninkunapiwan Netaniaspa churin Ismaelpa tukuy mana allinkuna rurasqanta yacharurqaku.
12 Hinaspam llapallan tropankunata huñuruspanku Ismaelpa contranpi peleaq pasaspanku hayparurqaku Gabaon llaqtapi kaq hatun estanquepa hichpanpi.
13 Chaymi Careapa churin Johanantawan tropakunapa capitanninkunata Ismaelpa pusasqan llapallan runakuna qawaspa kusikurqaku.
14 Mizpa llaqtamanta Ismaelpa preso pusasqan runakuna kutimuspankum Careapa churin Johananman hukllawakuykurqaku.
15 Netaniaspa churin Ismaelñataqmi pusaq runankunapiwan lluptiruspanku Amonpa mirayninkunapa allpanman pasakurqaku.
16 Ahicampa churin Gedaliasta wañurachispan Mizpa llaqtamanta Ismaelpa preso pusasqan runakunatam Careapa churin Johanan tropankunapa capitanninkunapiwan Gabaon llaqtamanta kutirichirqaku,
kutichirqakumá puchuq soldadokunatapas,
warmikunatapas,
warmakunatapas chaynataq reypa palacionpi serviqkunatapas.
17 Paykunaqa pasarqaku Belen llaqtapa hichpanpi kaq Gerut-quimam sitiokamam.
Chaypim samarirqaku Egipto nacionman lluptinankurayku.
18 Ahicampa churin Gedaliasta Netaniaspa churin Ismael wañurachisqanraykum Caldea runakunata manchakurqaku.
Chay Gedaliastam Babilonia nacionpa reynin churarqa chaylaw allpapi gobiernananpaq.