24
Rey Joacimpa tiemponpim Babilonia nacionpa reynin Nabucodonosor hamurqa Juda nacionpa contranpi peleananpaq.
Venceruptinmi Joacim servirqa kimsa wata,
ichaqa Nabucodonosorpa contranpi tantearuspanmi hoqarikururqa.
2 Aswanqa Tayta Diosmi kachamurqa Joacimpa contranpi Caldea law tropakunata,
Aram law tropakunata,
Moab casta tropakunata hinaspa Amon casta tropakunata.
Paykunatam Tayta Dios kachamurqa willakuq serviqninkunawan nisqanpi hina Juda nacionta chinkachinanpaq.
3 Cheqaptapunipas Manasespa huchankunamantawan tukuy mana allin rurasqankunamantam chay castigokunaqa hamurqa Juda nacionman.
Tayta Diosmi qayllanmanta chinkarachinanpaq chaynata kamachikurqa.
4 Chay castigoqa hamurqa Jerusalen llaqtapipas mana huchayoq runakunata achkallataña Manases wañurachisqanraykum,
chayraykum Tayta Diosqa mana pampachayta munarqachu.
5 Rey Joacimpa wakin rurasqankunaqa Juda nacion reykunapa wakin rurasqanmanta willakuq libropim qellqasqa kachkan.
6 Abuelonkuna hina Joacim wañukuptinmi paypa rantinpiqa churin Joaquinña gobiernarqa.
7 Egipto nacion reyqa manañam haykapipas llaqtanmantaqa lloqsirqañachu,
llapa allpankunatam Egipto Mayumantapuni Eufrates Mayukama Babilonia nacionpa reynin dueñochakururqa.
Rey Joaquinwan ancianokuna Babilonia nacionman preso risqankumanta
8 Rey Joaquinqa chunka pusaqniyoq watanpim gobiernayta qallaykurqa.
Kimsa killallam gobiernarqa Jerusalen llaqtapi.
Paypa mamanmi karqa Nehusta sutiyoq warmi.
Chay mamanqa karqa Jerusalen llaqtayoq Elnatanpa churinmi.
9 Chay Rey Joaquinqa Tayta Diospa qayllanpim mana allinkunata rurarqa taytanpa rurasqankunaman hina.
10 Chay tiempopim Babilonia nacionpa reynin Nabucodonosorpa capitanninkuna hamurqaku Jerusalen llaqtapa contranpi hinaspam atacanankupaq llaqtapa muyuriqninpi churakururqaku.
11 Llaqtata capitanninkuna muyuruptinkuñam kikin Nabucodonosor hamururqa.
12 Hinaptinmi Juda nacionpa reynin Joaquinqa mamanpiwan,
serviqninkunapiwan,
kamachikuqkunapiwan hinaspa palacionpi serviqkunapiwan Babilonia nacionpa reyninman qokurqaku,
Nabucodonosorqa presocharurqa pusaq watamanña Babilonia nacionpi gobiernachkaspanmi.
13 Rey Nabucodonosormi templopa lliw tesoronkunatawan Rey Joaquinpa palacionpi tesorokunata horqorurqa.
Israel nacionpa reynin Salomonmi rurachirqa qorimanta serviciokunata templopaq,
chaykunatapas lliwtam Nabucodonosorqa ñutuparurqa.
Chaykunataqa rurarqa Tayta Diospa nisqanman hinam.
14 Jerusalen llaqtapi yachaqkunatam llapallanta presochasqata pusarqa.
Pusarqamá llapallan capitankunatapas,
llapallan soldadokunatapas,
tukuy oficio yachaq llapallan runakunatapas chaynataq herrerokunatapas.
Lliwmi karqaku chunka waranqa runakuna.
Puchurqakuqa llaqtakunapi wakchakunallañam.
15 Rey Nabucodonosorqa Jerusalen llaqtamantam Babilonia llaqtaman presochasqata pusarqa Rey Joaquinta,
paypa warminkunata,
palacionpi serviqninkunata chaynataq llaqtakunapi ancha reqsisqa runakunatapas.
16 Pusarqataqmi guerrapi peleanankupaq hina valeroso qanchis waranqa soldadokunatapas.
Oficioyoq runakunatawan herrerokunatañataqmi pusarqa waranqa runakunata.
17 Babilonia nacionpa reyninmi Jerusalen llaqtapi rey kananpaq Joaquinpa rantinpi tion Mataniasta churarurqa.
Chay Mataniaspa sutintam tikrarurqa Sedequiasman.
Juda nacionpi Rey Sedequiaspa gobiernasqanmanta
18 Rey Sedequiasqa iskay chunka hukniyoq watanpim gobiernayta qallaykurqa.
Jerusalen llaqtapim gobiernarqa chunka hukniyoq wata.
Paypa mamanmi karqa Libna llaqtayoq Jeremiaspa churin Hamutal.
19 Chay Rey Sedequiasqa Tayta Diospa qayllanpim mana allinkunata rurarqa Rey Joacimpa tukuy rurasqanta hina.
20 Chayraykum Jerusalen llaqtapa chaynataq Juda nacionpa contranpi Tayta Dios piñakuruspan qayllanmanta wischururqa.
Jerusalen llaqta tuñichisqa kasqanmanta
Rey Sedequiastaqmi Babilonia nacion reypa contranpipas hoqarikururqa.