3 Pusaq watamanña Rey Josias gobiernachkaspanmi mozollaraq kachkaspa qallarirqa abuelon Davidpa Diosnin mañakuyta.

Chunka iskayniyoq watamanña gobiernachkaspanmi Juda nacionmantawan Jerusalen llaqtamanta wischuyta qallarirqa moqokunapi kaq capillakunata.

Wischurqataqmi Asera sutiyoq mamachakunatapas chaynataq huk rikchaq taytacha-mamachakunatapas,

chaykunaqa karqa rumimanta labrasqam hinaspa fundisqam.

4 Josiaspa qayllanpim tuñichirqaku Baal sutiyoq taytachakunapa altarninkunata.

Paytaqmi pakipachirqa chay altarpa hawanpi kaq incienso kañanankutapas.

Pakiparachirqataqmi Asera sutiyoq mamachakunatapas chaynataq labrasqa hinaspa fundisqa taytacha-mamachakunatapas,

chaykunata ñutuparachispanmi maqchirachirqa chayna taytacha-mamachakunaman animalkuna ofreceq runakunapa sepulturanman.

5 Altarkunapitaqmi kañarurqa sacerdotekunapa tullunkunatapas,

chaynatam chuyancharqa Juda naciontawan Jerusalen llaqtata.

6 Manases law,

Efrain law,

Simeon law llaqtakunapipas hina chaynallatam rurarqa Neftaliy law llaqtakunakama,

maskaparqataqmi muyuriqnin sitiokunapipas.

7 Altarkunatawan Asera sutiyoq mamachakunatam tuñirachirqa,

ñuturachirqataqmi rumimanta labrasqa taytacha-mamachakunatapas.

Pakiparurqataqmi Israel allpapi kaq incienso kañana llapallan altarkunatapas.

Chaynata ruraruspanñam kutimurqa Jerusalen llaqtaman.

8 Chunka pusaqniyoq watamanña Rey Josias gobiernachkaspanmi millakuypaq kaqkunata qechururqa nacionmantawan templomanta hinaspam yupaychasqan Tayta Diospa templonta allichanankupaq kacharqa Azaliaspa churin Safanta,

llaqtapi alcalde Maasiasta hinaspa Joacazpa churin Joa sutiyoq runata,

Joam karqa reypa rurasqankunamanta qellqaq.

9 Paykuna rispankum sacerdotekunapa jefen Hilciasman qoykurqaku Tayta Diospa templonman apamusqanku qollqeta,

chay qollqetam chaskirqaku punkukunawan cuentallikuq Leviy casta runakuna,

paykunamá chaskirqaku Manases castamanta,

Efrain castamanta,

Israel casta wakin runakunamanta,

lliw Juda castamanta,

Benjamin castamanta hinaspa Jerusalen llaqtapi llapallan kaqkunamanta.

10 Chay qollqetam qorqaku Tayta Diospa templonpi churasqa llamkachiqkunaman.

Paykunañataqmi pagarqaku Tayta Diospa templonta allichaq llapallan llamkaqkunaman.

11 Qorqakutaqmi carpinterokunamanpas chaynataq maestrokunamanpas,

paykunamanqa qorqaku labrasqa rumikunatawan hapinaq qerukunata rantinankupaqmi.

Chay templopa qerunkunaqa utusqaña kachkaptinpas Juda nacionpa reyninkunataqa manam imapas qokurqachu.

12 Chay runakunam allinta llamkarqaku rurasqankuta.

Capatazkunam karqa Leviy casta Meraripa miraynin Jahatwan Abdias hinaspa Coatpa miraynin Zacariaswan Mesulam.

Sumaqllaña tocaq Leviy casta runakunam

13 imapas apaqkunata tukuy imapi llamkachirqaku.

Wakin Leviy casta runakunañataqmi karqaku secretariokuna,

kamachiqkuna hinaspa punkukunawan cuentallikuqkuna.

14 Tayta Diospa templonman apamusqanku qollqeta horqomuchkaptinkum sacerdote Hilcias tarirurqa Moisesnintakama Tayta Diospa qosqan yachachikuy librota.

15 Chaymi Hilcias willarqa secretario Safanman:

—Ñoqam tariruni yachachikuy librota Tayta Diospa templonpi —nispa.

Chay librota Safanman qoykuptinmi

16 payñataq aparqa reyman hinaspam willarqa chay asuntomanta kaynata:

—Serviqnikikunaqa rurachkanikum tukuy imam kamachiwasqaykikuta.

17 Horqorunikum Tayta Diospa templonpi tarisqayku qollqeta,

horqoruspam qoykamuniku llamkachiqkunamanwan llamkaqkunaman —nispa.

18 Chaymantam secretario Safanqa reyman willarqa:

—Sacerdote Hilciasmi kay librota qoykuwan —nispa.

Reypa qayllanpim chay librota leerqa.

19 Yachachikuy libropi leesqanta uyariykuspanmi reyqa pachankunata llikiparqa.

20 Hinaspam sacerdote Hilciasta,

Safanpa churin Ahicamta,

Micaiaspa churin Abdonta,

secretario Safanta hinaspa serviqnin Asaiasta kamachirqa:

21 —Tayta Diostayá tapumuychik ñoqapaq,

tapumuychiktaqyá Israel nacionpi hinaspa Juda nacionpi puchuq runakunapaqpas.

Kay libroman hina abuelonchikkuna mana kasukusqankuraykum Tayta Diospa piñakuyninqa contranchikpi mancharikuyllapaqña kachkan —nispa.

22 Hinaptinmi Hilciaswan reypa kachasqankuna rirqaku Diosmanta willakuq Hulda sutiyoq warmiman tapukamunankupaq.

Payqa karqa Salumpa warminmi.

Chay qosan Salumqa karqa Ticvapa churinmi.

Ticvañataqmi karqa Harhaspa churin.

Harhasmi karqa templopi pachakunawan cuentallikuq.

Huldaqa Jerusalen llaqtapim yacharqa mosoq Barriopi,

chay runakuna chayaruspankumá paywan parlarqaku.

23 Chaymi Huldañataq paykunata nirqa:

—Israelpa yupaychasqan Tayta Diospa nisqantam kachamusuqnikichik runaman kaynata ninkichik:

24 “Juda nacion reypa leesqanman hinam kay llaqtapa contranpipas chaynataq kaypi yachaq runakunapa contranpipas apachimusaq chay libropi nisqay castigokunata.

25 Ñoqata saqeruwaspankum huk rikchaq taytachakunamanña inciensota kañarqaku chaykuna rurasqankuwan rabiachiwanankupaq.

Chayraykum piñakuyniyqa nina hina kay sitiopa contranpi ruparispan mana taninqachu.

26 Chaynaqa Israelpa yupaychasqan Tayta Diosta tapuwanaykichikpaq kachamusuqnikichik Juda nacionpa reynintam kaynata nimunkichik:

Libropi kaqkunatam qamqa uyariykurqanki.

27 Kay llaqtapa hinaspa runankunapa contranpi rimasqaykunatam uyariykurqanki.

Sonqoykipi llakirikuspam ñoqapa qayllaypi humillakurqanki,

pachaykikunatapas qayllaypi llikipaspam waqarqanki,

chaykunataqa ñoqapas yachanim.

28 Chayraykum abueloykikuna hina wañukuspa hawka tiempollapi pampakunki.

Kay llaqtapa chaynataq yachaqkunapa contranpi castigo apachimusqaytaqa manam rikunkichu” nispa.

Kutirispankum chaynata reyman willamurqaku.

29 Rey Josiasmi huñurachimurqa Juda nacionpi chaynataq Jerusalen llaqtapi llapallan ancianokunata.

30 Reymi Tayta Diospa templonman rirqa Juda nacionniyoq taksapas-hatunpas runakunapiwan,

Jerusalen llaqtapi llapallan yachaqkunapiwan,

sacerdotekunapiwan hinaspa Leviy casta runakunapiwan.

Llapallanku uyarichkaptinmi templopi tarisqanku contrato librota rey leerqa.

31 Reymi pilarpa waqtanpi sayaykuspan Tayta Diospa qayllanpi contratota rurarqa.

Chayman hinam prometekurqa Tayta Diosta qatinanpaq,

prometekurqataqmi kamachisqankunatapas,

Chunkantin Kamachikuyninkunatapas,

decretonkunatapas tukuy sonqonwan hinaspa tukuy vidanwan kasukunanpaq,

prometekurqataqmi chay libropi Dioswan contrato rurasqan palabrakunata cumplinanpaqpas.

32 Chaymantam cumplinankupaq Rey prometechirqa Jerusalen llaqtapi kaqkunata chaynataq Benjamin casta kaqkunata hinaptinmi Jerusalen llaqtapi kaqkuna cumplirqaku abuelonkupa Diosninkuwan contrato rurasqankuman hina.

33 Rey Josiasmi chinkarachirqa lliw Israelpa miraynin runakunapa yachasqan allpapi kaq millakuypaq rurasqankuta hinaspam Israel nacionpi llapallan kaqkunata kamachirqa yupaychasqanku Tayta Diosta adoranankupaq chaymi Rey Josias kawsanankamaqa mana rakikurqakuchu abuelonkupa yupaychasqan Tayta Diosmanta.