Rey Manasespa gobiernasqanmanta
33
Chunka iskayniyoq watanpim Rey Manasesqa gobiernayta qallaykurqa,
Jerusalen llaqtapim gobiernarqa pichqa chunka pichqayoq wata.
2 Tayta Diospa qayllanpim mana allinkunata rurarqa.
Israelpa mirayninkunapa qayllanmanta Tayta Diospa qarqosqan runakunapa millakuypaq rurasqankunatam rurarqa.
3 Taytan Ezequiaspa tuñichisqan moqokunapi capillakunatam kaqllamanta hatarichirqa hinaspam Baal sutiyoq taytachapaqña altarkunata rurarqa,
rurachirqataqmi Asera sutiyoq mamachakunatapas.
Cielokunapi llapallan lucerokunaman qonqorakuspanmi chaykunata adorarqa.
4 “Ñoqam sutiyta wiñaypaq Jerusalen llaqtapi churasaq” nispa Tayta Dios nichkaptinpas Manasesqa Tayta Diospa templonpim altarkunata hatarichirqa.
5 Tayta Diospa templonpa iskaynin pationkunapipas cielokunapi llapa lucerokunata adorananpaqmi altarkunata rurachirqa.
6 Churinkunatapas taytachapaqraqmi kañapurqa Ben-hinom sutiyoq wayqopi.
Musyaqkunaman,
brujokunaman,
rastreaqkunaman qokuruspanmi espiritistakunatawan espiritu qayaqkunata tapukurqa,
chay achka mana allinkunata Tayta Diospa qayllanpi ruraspanmi payta piñachirqa.
7 Mamacha rurachisqantam churarurqa Diospa templonman.
Chay templomantam Davidmanwan churin Salomonman Tayta Dios kaynata nirqa:
—Israel llapallan ayllukunamanta akllasqay kay Jerusalen llaqtapim hinaspa kay templopim sutiyta wiñaypaq churasaq.
8 Chaynataqa rurasaq tukuy kamachisqayta kasukuspanku serviqniy Moiseswan willachisqay yachachikuykunaman hina,
decretokunaman hina hinaspa reglamentokunaman hina kawsaptinkum,
abuelonkuman qosqay allpamantam Israel casta runakunataqa manaña maylawmanpas yanqaqa purichisaqchu —nispa.
9 Manasesqa Juda nacionpi kaqkunatawan Jerusalen llaqtapi yachaqkunatam pantarachirqa,
Israelpa mirayninkunapa qayllanmanta Tayta Diospa chinkachisqan runakunamantapas astawanraqmi mana allinkunata rurachirqa.
10 Manasestawan runankunata Tayta Dios rimapayaptinmi paykunaqa mana uyarirqakuchu.
11 Chayraykum paykunapa contranpi Tayta Dios pusaramurqa Asiria nacion reypa tropankunapa kamachiqninkunata,
paykunam Rey Manasesta hapiruspanku cadenakunawan wataruspa Babilonia llaqtaman presota pusarqaku.
12 Chayna ñakariypi kaspanmi mañakurqa yupaychasqan Tayta Diosta,
abuelonkunapa Diosninpa qayllanpim pasaypaqta humillakuykurqa.
13 Chaynapim Diosqa mañakusqanta uyariykuspan contestamurqa,
paytaqa Jerusalen llaqtapi gobiernonmanmi kutichimurqa.
Chayraqmi Manasesqa reqsikuykurqa Tayta Diosqa cheqap Dios kasqanta.
14 Rey Manasesmi rurachirqa “Davidpa Llaqtan” sutiyoq barriopa hawa lawninpi murallakunata,
chaytaqa rurachirqa Gihon Pukyupa intipa seqaykunan law wayqopim,
chay murallam wayqonta chutarikuspan chayarqa Challwa Punkukama.
Murallachirqataqmi Ofel Moqotapas,
chay murallataqa hoqarirachirqa alto-altosutam.
Juda nacionpi kaq murallasqa llapallan llaqtakunapipas churarqam tropakunapa kamachiqninkunata.
15 Tayta Diospa templonmantapas horqorachirqataqmi forasterokunapa taytachankunatawan chaypi kaq mamachakunata.
Horqorachirqataqmi Tayta Diospa templonpa kasqan moqopi rurachisqan llapallan altarkunatapas chaynataq Jerusalen llaqtapi kaqkunatapas,
tukuy chaykunataqa wikaparachirqa llaqtapa hawa lawninmanmi.
16 Tayta Diospa altarninta allichachispanmi chaypi kañapurqa Dioswan allinlla kasqanmanta ofrendatawan Diosman gracias qonan ofrendata,
Juda nacionpi runakunatapas kamachirqataqmi Israelpa yupaychasqan Tayta Diosta adoranankupaq.
17 Chaywanpas runakunaqa hinallam kañarqaku moqokunapi kaq capillakunapi,
chaykunataqa rurarqaku yupaychasqanku Tayta Diospaqmi.
18 Rey Manasespa wakin rurasqankunaqa,
Diosninman mañakusqankunaqa hinaspa willakuqkunapa Israelpa yupaychasqan Tayta Diospa sutinpi payman rimapayasqankunaqa llapallanmi qellqasqa kachkan Israel nacionpa reyninkunapa vidanmanta willakuq libropi.
19 Diosmanta willakuqkunapa rimasqanpim qellqasqa kachkan paypa mañakusqankunapas uyarisqa kasqanpas,
manaraq humillakuchkaspa huchallikusqankunapas,
traicionasqankunapas,
maykunapim capillakuna rurachisqankunapas,
Asera sutiyoq mamacha rurachisqanpas chaynataq tukuy rikchaq taytacha-mamachakuna rurachisqankunapas.
20 Abuelonkuna hina Manases wañukuptinmi pamparurqaku palacionpi.
Paypa rantinpim churin Amonña gobiernarqa.
Juda nacionpi rey Amonpa gobiernasqanmanta
21 Rey Amonqa iskay chunka iskayniyoq watanpim gobiernayta qallaykurqa.
Jerusalen llaqtapim gobiernarqa iskay wata.
22 Taytan Manases hinam Rey Amonpas mana allinkunata rurarqa Tayta Diospa qayllanpi.
Animalkunata wañuchipuspanmi adorarqa taytan Manasespa rurasqan llapallan taytacha-mamachakunata.
23 Taytan Manases hinaqa manam humillakurqachu,
aswanraqmi payqa huchallikurqa.