Rey Ezequiaspa gobiernasqanmanta
29
Rey Ezequiasqa iskay chunka pichqayoq watanpim gobiernayta qallaykurqa.
Jerusalen llaqtapim gobiernarqa iskay chunka isqonniyoq wata.
Paypa mamanqa karqa Zacariaspa churin Abi sutiyoq warmim.
2 Tayta Diospa qayllanpim allinta rurarqa ñawpa abuelon Davidpa tukuy rurasqankunata hinaraq.
3 Gobiernasqan punta kaq watapa punta kaq killanpim Tayta Diospa templonta kicharqa hinaspam allichachirqa.
4 Chaymantam pusachimurqa sacerdotekunatawan Leviy casta runakunata,
intipa qespimunan law plazapi huñuchispanmi
5 nirqa:
—Uyariwaychik Leviy casta runakuna:
Diospaq kunan sapaqchakuspayá abuelonchikkunapa yupaychasqan Tayta Diospa templonta chuyanchaychik hinaspayá santuariomantapas horqoychik millakuypaq kaqkunata.
6 Abuelonchikkunam yupaychasqanchik Tayta Diosta traicionaruspanku paypa qayllanpi mana allinkunata rurarqaku,
Tayta Diosta qepanchakuruspankum santuariontapas mana qawayta munarqakuchu,
chaynapimá paykunaqa payta qepanchakururqaku.
7 —Wichqarurqakum corredorpa punkunkunatapas,
wañurachirqakum mecherokunatapas,
manataqmi kañarqakuchu inciensotapas chaynataq lliw kañana ofrendakunatapas,
Israelpa Diosninmanqa manañam ofrecerqakuchu santuarionpiqa.
8 Chayraykum Tayta Diospa piñakuynin hamurqa Juda nacionpa hinaspa Jerusalen llaqtapa hawanman chaymi paykunataqa qamkunapa qawasqaykichikpi hinapas qoykurqa manchakuypaq purmachisqa hinaspa despreciasqa kanankupaq.
9 Chayraykum tayta-mamanchikpas espadawan wañuchisqa karqaku,
preso pusasqataqmi karqaku qari churinchikkunapas,
warmi churinchikkunapas chaynataq warminchikkunapas.
10 Kunanmi ñoqa contratota rurasaq Israelpa yupaychasqan Tayta Dioswan chaynapi ñoqanchikpa hawanchikmanta piñakuynin suchurichinanpaq.
11 Chaynaqa churillaykuna,
amayá mana umayoqqa kaychikchu,
Tayta Diosmi akllasurqankichik qayllanpi kaspa servinaykichikpaq hinaspa serviqninkuna kaspa inciensota kañapunaykichikpaq —nispa.
12 Chaypunilla llamkaq Leviy casta qarikunam kaykuna:
Coatpa mirayninmantam karqa Amasaipa churin Mahatwan Azariaspa churin Joel.
Meraripa mirayninmantañataqmi karqa Abdipa churin Ciswan Jehaleelpa churin Azarias.
Gersonpa mirayninmantañataqmi karqa Zimapa churin Joawan Joapa churin Eden.
13 Elizafanpa mirayninmantañataqmi karqa Zimripiwan Jeiel.
Asafpa mirayninmantañataqmi karqa Zacariaspiwan Matanias.
14 Hemanpa mirayninmantañataqmi karqa Jehielpiwan Simei.
Jedutunpa mirayninmantañataqmi karqa Semaiaspiwan Uziel.
15 Paykunam ayllunkunata huñuruspa chuyanchakurqaku hinaspam Tayta Diospa templonman yaykurqaku chuyanchanankupaq,
chaynataqa rurarqaku reypa kamachisqanman hinam chaynataq Tayta Diospa palabranman hinam.
16 Sacerdotekunam yaykurqaku Tayta Diospa templonta chuyanchanankupaq,
chaymantam horqoramurqaku tukuy ima millakuypaq kaqkunata,
chaykunataqa horqomurqaku Tayta Diospa templonpa pationmanmi hinaptinmi Leviypa castankuna aparurqaku Cedron wayqoman.
17 Punta kaq killapa qallariynin punchawpim chuyanchayta qallarirqaku hinaspam chay killapa pusaq punchawninmanqa yaykururqakuña Tayta Diospa corredorninman.
Tayta Diospa kikin templontaqa chuyancharqaku pusaq punchawpim.
Chaynaqa chay chuyanchaytamá tukurqaku punta kaq killapa chunka soqtayoq punchawninpi.
18 Rey Ezequiasman hamuspankum nirqaku:
—Tayta Diospa templontaqa ñam chuyancharamunikuña,
chuyancharamunikutaqmi animalkunata wañuchispa kañana altartapas lliw serviciontinta chaynataq Diospa tantan churana mesatapas lliw serviciontinta.
19 Rey Acazpa qepanchakurusqan serviciokunatapas allichaspam Diosllapaqña sapaqcharamuniku,
chay serviciokunataqa Rey Acaz gobiernaspanmi Tayta Diosta traicionaruspa qepanchakururqa.
Kunanqa chay serviciokunaqa kachkan Tayta Diospa altarninpa ñawpaqninpiñam —nispa.
20 Rey Ezequias tutapayta hatariruspanmi huñururqa chay llaqtapi jefekunata hinaspam rirqa Tayta Diospa templonman.
21 Chay jefekunam pusamurqa qanchis malta torokunata,
qanchis carnerokunata,
qanchis malta carnerokunata hinaspa qanchis chivatokunata.
Chaykunataqa pusamurqaku reypa gobiernonpi kaqkunapa huchan pampachasqa kananpaqmi chaynataq santuariopas chuyanchasqa kananpaqmi hinaspa Juda nacionniyoq runakunapas huchanmanta pampachasqa kanankupaqmi.
Reymi kamachirqa Aaronpa miraynin sacerdotekunata animalkunata wañuchispa Tayta Diospa altarninpi lliwta kañanankupaq.
22 Sacerdotekuna torokunata wañuchispankum chaskirqaku yawarninta hinaspam chaywan altarman challarqaku,
malta carnerokunatapas wañuchispankum chaypa yawarninwan altarman challarqaku.
23 Chivatokunatam reypa qayllanmanwan huñunasqa runakunapa qayllanman asuykachirqaku chaynapi huchanku pampachasqa kananpaq hinaptinmi makinkuta churaykurqaku chay chivatokunapa hawanman.
24 Chaykunata sacerdotekuna wañurachispankum yawarninta altarman challarqaku ofrendapi hina,
chaytaqa rurarqaku Israel casta llapallan runakunapa huchan pampachasqa kananpaqmi,
reymi kamachikurqa Israel llapallan casta runakunapaq lliw kañana animalkunata kañanankupaq,
ofrecechirqataqmi paykunapa huchan pampachasqa kananpaqpas.
25 Rey Ezequiasqa churarqataqmi Leviy casta runakunatapas,
paykunataqa churarqa Tayta Diospa templonpim platillontinta,
hatun arpantinta hinaspa taksa arpantinta.
Chaynataqa rurarqa Davidpa hinaspa Diosmanta willakuq Gadpa chaynataq Diosmanta willakuq Natanpa kamachikusqanman hinam.
Tayta Diosmi chaykunata willachirqa paymanta willakuqkunawan.
26 Leviy casta runakunam sayachkarqaku Davidpa qosqan tocanantinkama,
sacerdotekunañataqmi sayachkarqaku cornetillantinkama.
27 Hinaptinmi Rey Ezequias kamachirqa lliw kañana ofrendakunata altarpi kañanankupaq.
Lliw kañana ofrendakunata kañayta qallariptinkum Tayta Diospaq takiyta qallarirqaku cornetillakunawan hinaspa Israel nacionpa reynin Davidpa qosqan tocanankunawan.
28 Chaynatam llapa huñunasqa runakuna adorarqaku,
takiqkuna takiptinmi cornetilla tocaqkunapas cornetillankuta tocarqaku.
Tukuy chaytaqa rurarqaku lliw kañana ofrenda kañasqanku tukunankamam.
29 Tukuy chaykunata ofreceyta tukuruptinkum reywan llapallan compañaqninkuna qonqorakuykuspanku adorarqaku.
30 Rey Ezequiaswan jefekunam Leviy casta runakunata kamachirqaku Davidpa takisqankunawan chaynataq Diosmanta willakuq Asafpa takisqankunawan Tayta Diosta alabanankupaq chaymi hatun kusikuywan alabaspanku adoranankupaq kumuykurqaku.
31 Rey Ezequiasmi runakunata nirqa:
—Kunanqa Diospaq sapaqchasqañam kachkankichik,
chaynaqa Tayta Diosmanyá asuykamuychik,
Tayta Diospa templonpiyá ofreceychik animalkunatawan graciasta qonaykichik ofrendakunata —nispa.
Hinaptinmi lliw huñunasqa runakuna ofrecerqaku animalkunatawan graciasta qonanku ofrendakunata.
Allin sonqoyoq llapallan runakunapas apamurqakum lliw kañana animalkunata.
32 Lliw huñunakuqkunapa apamusqan kañanapaq kaqkunam karqa qanchis chunka torokuna,
pachak carnerokuna hinaspa iskay pachak malta carnerokuna.
Tukuy chaykunaqa karqa Tayta Diospaq lliwta kañanankupaqmi.
33 Chaynaqa Diospaq sapaqchasqanku llapallan ofrendam karqa soqta pachak torokuna hinaspa kimsa waranqa ovejakunawan cabrakuna.
34 Ichaqa sacerdotekuna aslla kasqankuraykum mana kamakurqakuchu kañana animalkunapa qaran chustunankupaq,
chayraykum tukuysinankupaq ayllunku Leviy casta runakunaña yanaparqaku,
paykunaqa yanaparqa wakin sacerdotekuna chuyanchakunankukamam.
Leviy casta runakunaqa sacerdotekunamantapas aswantaraqmi chuyanchakuyta munarqaku.
35 Achkallañamá karqa lliw kañana ofrendakunapas chaynataq Dioswan allinlla kasqankumanta ofrenda animalkunapa wirankunapas.
Achkallañataqmi karqa lliw kañana ofrendaman tallinanku vinopas.