Pascua Fiestata Rey Ezequias rurasqanmanta
30
Rey Ezequiasmi willachimurqa Israel nacionniyoq llapallan runakunaman chaynataq Juda nacionniyoq runakunamanpas.
Cartakunatapas apachirqataqmi Efrain ayllu runakunamanwan Manases ayllu runakunaman,
paykunamanqa apachirqa Jerusalen llaqtapi Tayta Diospa templonman hamunankupaqmi hinaspa chaypi Israelpa yupaychasqan Tayta Diospaq Pascua Fiestata ruranankupaqmi.
2 Reymi autoridadkunapiwan hinaspa llapallan runakunapiwan tantearurqa Jerusalen llaqtapi iskay kaq killapi Pascua Fiestata ruranankupaq.
3 Achkaq sacerdotekuna Diosllapaqña mana sapaqchakusqankuraykum mana atirqakuchu tiempollanpi Pascua Fiesta rurayta,
manataqmi runakunapas huñunakuqkuchu Jerusalen llaqtapiqa.
4 Chay tiempopi ruray piensarusqankum allin rikchakapurqa reypaq chaynataq llapallan huñunasqa runakunapaqpas.
5 Chaymi Beerseba llaqtamanta qallarispa Dan llaqtakama willachirqaku Israel casta llapallan runakunaman,
willachirqakuqa Israelpa yupaychasqan Tayta Diospaq Pascua Fiestata ruraq Jerusalen llaqtaman hamunankupaqmi.
Ñawpaqtaqa qellqasqaman hinaqa manam rurarqakuchu achka runakunawanqa.
6 Reypa hinaspa autoridadkunapa cartan apaqkunam lloqsirqaku enteron Israel nacionmanwan Juda nacionman,
paykunaqa lloqsirqaku reypa kamachikusqanman hina kaynata niqmi:
Israelpa mirayninkuna,
qamkunaqa kutirikuychikyá Abrahampa,
Isaacpa hinaspa Israelpa yupaychasqan Tayta Diosman hinaptinqa Asiria nacionpa reyninkunamanta lluptiqkunamanmi paypas kutimusunkichik.
7 Qamkunaqa amayá kaychik abueloykichikkuna hinachu nitaq aylluykichikkuna hinachu.
Paykunam traicionarurqaku abuelonchikkunapa yupaychasqan Tayta Diosta hinaptinmi qawasqaykichikpi hinapas pay qoykurqa purmachisqa kanankupaq.
8 Amayá abueloykichikkuna hinaqa sonqoykichikta rumiyachiychikchu.
Tayta Diospa kamachikuyninkunatayá kasukuychik hinaspayá hamuychiktaq paypa wiñaypaq sapaqchasqan santuarionmanpas.
Yupaychasqanchik Tayta Diosta serviptikichikqa paypa piñakuyninmi qamkunamanta asurinqa.
9 Sichu Tayta Diosman kutirikuptikichikqa aylluykichikkunata hinaspa churikichikkunata preso pusaq enemigokunam llakipayarispa kay allpaman kutichimunqaku.
Yupaychasqanchik Tayta Diosqa llakipayakuqmi hinaspa kuyapayakuqmi,
payman kutirikuptikichikqa payqa manam saqesunkichikchu.
10 Carta apaqkunam llaqtan-llaqtan rirqaku Efrain lawman,
Manases lawman hinaspa Zabulon lawkama,
runakunam ichaqa asikuspanku burlakurqaku paykunamanta.
11 Chaywanpas Aser ayllumanta,
Manases ayllumanta hinaspa Zabulon ayllumanta wakin runakunaqa humillakuykuspam hamurqaku Jerusalen llaqtaman.
12 Juda nacionpi kaqkunatapas Dios sonqochaykuptinmi huk soqolla karqaku reypa hinaspa autoridadkunapa kamachikuyninta cumplinankupaq.
Chaynataqa rurarqaku Tayta Diospa nisqanman hinam.
13 Jerusalen llaqtapim huñunakururqaku achka-achka runakuna,
chaypiqa huñunakururqaku Mana Qonchuyoq Tanta Fiestata ruranankupaqmi,
chay fiestataqa rurarqaku iskay kaq killapim.
14 Chay fiesta qallarinankupaqmi tuñirachirqaku Jerusalen llaqtapi taytacha-mamachakunapaq rurasqanku altarkunatawan incienso kañana altarkunata,
chaykunatam wischumurqaku Cedron wayqoman.
15 Chaymantam wañuchirqaku Pascuapaq wañuchina animalta,
chaytaqa wañuchirqaku iskay kaq killapa chunka tawayoq punchawninpim.
Sacerdotekunapiwan Leviy casta runakunam humillakuspanku Diospaq sapaqchakurqaku hinaspam Tayta Diospa templonman apamurqaku lliw kañana ofrendakunata.
16 Costumbreman hinam sapakama imam ruranankuta rurarqaku Diospa runan Moisespa yachachikuyninman hina hinaptinmi sacerdotekunañataq yawarta challarqaku Leviy castakunamanta chaskispanku.
17 Chay huñunakuypiqa achkallañam karqaku Diospaq mana sapaqchakuq runakuna,
chayraykum Leviy casta runakunaña Pascua animalkunata paykunapaq wañuchipurqaku,
mana chaypaq hina kaq llapallan runakunapaqmá wañuchipurqaku.
18-19 Achka-achka runakunam Efrain ayllumanta,
Manases ayllumanta,
Isacar ayllumanta hinaspa Zabulon ayllumanta mana chuyanchasqachu karqaku,
chayna kachkaspankupas mikurqakum Pascua animalpa aychanta,
chaynataqa rurarqaku manam qellqaman hinachu.
Aswanqa Rey Ezequiasmi paykunapaq mañapurqa kaynata:
—Dios Taytalláy,
qamqa allinmi kanki,
qamqa pampachaykuyá tukuy sonqowan llapallan maskasuqniki runakunata.
Abueloykupa yupaychasqan Tayta Dios,
santuarioman yaykunankupaq mana chuyanchasqa kachkaptinkupas paykunataqa pampachaykuyá —nispa.
20 Chaymi Tayta Dios uyarirqa Ezequiaspa mañakusqanta hinaspam mana castigarqachu runakunata.
21 Chaynatam Jerusalen llaqtapi kaq Israelpa mirayninkuna Mana Qonchuyoq Tanta Fiestata qanchis punchawpuni rurarqaku hatu-hatun kusikuywan Tayta Diosta alabastin.
Sapa punchawmi Leviy casta runakunapiwan sacerdotekuna paytaqa alabarqaku tocana kaqkunatapas nisyullataña tocaspanku.
22 Chaymantam Rey Ezequias kallpancharqa Tayta Dios serviq allin yachayniyoq Leviy casta runakunata.
Paykunaqa qanchis punchawmi mikurqaku fiestapi wañuchisqanku animal tupaqninkuta,
wañuchirqakutaqmi Dioswan allinlla kasqankumanta ofrendakunatapas,
chaytaqa rurarqaku abuelonkupa yupaychasqan Tayta Diosman graciasta qospankum.
23 Llapallan huñunasqa runakunam tantearurqaku qanchis punchawtawanraq fiestata ruranankupaq,
chaytam kusikuyllawanña rurarqaku.
24 Juda nacionpa reynin Ezequiasmi huñunasqa runakunaman qoykurqa waranqa torokunatawan qanchis waranqa ovejakunata.
Autoridadkunapas qorqataqmi waranqa torokunatawan chunka waranqa ovejakunata.
Achkaq sacerdotekunam Diospaq sapaqchakurqaku.
25 Juda nacionniyoq huñunasqa llapallan runakunam kusikurqaku,
kusikurqakutaqmi sacerdotekunapas,
Leviy casta runakunapas,
Israel nacionmanta hamuq llapallan huñunasqa runakunapas chaynataq paykunawan hamuq llapallan forasterokunapas chaynataq Juda nacionpi forasterokunapas.
26 Hatu-hatun kusikuymá karqa Jerusalen llaqtapi,
chay llaqtapiqa Israel nacion Rey Davidpa churin Salomonpa tiemponkunamantaraqmi manaña karqachu chayna kusikuyqa.
27 Chaymantam Leviy casta sacerdotekuna sayarispanku runakunapaq mañakurqaku Diospa bendicionninta hinaptinmi Tayta Dios uyarirqa.
Sacerdotepa mañakusqanqa Tayta Diospa “Chuyay-chuyay” yachanan hanaq pachakamam chayarurqa.