5 Chayraykum yupaychasqan Tayta Dios qoykurqa Aram nacionpa reyninman.

Aram nacionniyoq runakuna venceruspankum achka-achkata presocharurqaku hinaspam Damasco llaqtaman pusarqaku.

Tayta Diosqa qoykurqataqmi Israel nacionpa reyninmanpas hinaptinmi paypas pasaypaqta vencerurqa.

6 Remaliaspa churin Rey Pekapa tropankunamá Juda nacionpi huk punchawlla wañurachirqaku pachak iskay chunkan waranqa valeroso soldadokunata,

chaynaqa pasakurqa abuelonkupa yupaychasqan Tayta Diosta qepanchakurusqankuraykum.

7 Efrain casta Zicri sutiyoq valeroso runapas wañurachirqam reypa churin Maasiasta,

palaciopi mayordomo Azricam sutiyoq runata,

wañurachirqataqmi reypa rantinpi ruraq Elcana sutiyoq runatapas.

8 Israel nacionniyoq tropakunaqa Juda nacionniyoq ayllunkutapas presotam pusarqaku,

chay pusasqankum karqa iskay pachak waranqa runakuna,

presomá rirqaku warmikunapas,

qari warmakunapas chaynataq warmi warmakunapas.

Saqueasqankutapas achka-achkatam aparqaku Samaria llaqtaman.

9 Samaria llaqtapim karqa Tayta Diosmanta willakuq Obed sutiyoq runa,

paymi chaskinanpaq lloqsiykurqa Samaria llaqtaman soldadokuna yaykumuchkaptinku hinaspam nirqa:

—Abuelonchikkunapa yupaychasqan Tayta Diosmi Juda nacionpa contranpi piñakuspan paykunata makikichikman churaykun ichaqa paykunataqa piñakuyllawanñam wañurachinkichik,

chayna rurasqaykichiktaqa Tayta Diospas yacharunmi.

10 Kunanpas tanteanakurunkichikmi Juda nacionniyoq runakunawan Jerusalen llaqtayoq runakuna qaripas-warmipas sirvientekunaña kanankupaq,

aswanqa ¿manachu qamkunapas huchallikurunkichik yupaychasqaykichik Tayta Diospa contranpi?

11 Kunan uyariykuwaspaykichikyá kutichiychik preso pusamusqa aylluykichikkunata,

Tayta Diosmi qamkunapa contraykichikpi piñasqallaña kachkan —nispa.

12 Hinaptinmi Efrainpa mirayninkunamanta wakin jefekuna hatarirqaku chay guerramanta kutimuqkunapa contranpi.

Paykunam karqa Johananpa churin Azarias,

Mesilemotpa churin Berequias,

Salumpa churin Ezequias hinaspa Adlaipa churin Amasa.

13 Paykunam nirqaku:

—Chay presokunataqa amayá yaykuchimuychikchu kaymanqa,

Tayta Diospa contranpi huchallikusqaykichikmi ñoqaykupa hawaykupi karunman.

Hatu-hatun culpayoq hinaspa huchasapa kachkaptiykupas aswan yapaytaraqmi munachkankichik,

Diospa piñakuyninqa nina hinam kachkan Israel nacionpa contranpi —nispa.

14 Jefekunapa hinaspa huñunasqa runakunapa qayllanpim chay soldadokuna kachaykurqa chay presokunata,

paykunapa qayllanpitaqmi churaykurqaku qechumusqanku kaqkunatapas.

15 Chay presokunapa favorninpi rimaqkunam paykunata chaskiykuspa pachachirqaku soldadokunapa qechumusqan pachakunawan,

mana pachayoq kaqkunata pachaykachispankum hinaspa usutaykachispankum mikuykachirqaku hinaspa tomaykachirqaku,

hampiykurqakutaqmi onqoqkunatapas.

Llapallankuta kutichispam mana kallpayoq kaqkunatapas asnopi sillaykachispa aparqaku Jerico llaqtakama otaq “Palmerallaña” llaqtakama,

chaypi ayllunkuman saqeykuspam Samaria llaqtaman kutikamurqaku.

16 Chay tiempopim yanapachikunanpaq Rey Acaz kacharqa Asiria nacionpa reyninman.

17 Paymanqa kacharqa Edom nacionniyoq runakuna hamuruspa Juda nacionpi kaqkunata vencerusqanraykum chaynataq presokunatapas pusarusqanraykum.

18 Filistea runakunapas yaykuruspam dueñochakururqaku waqtakunapi llaqtakunatawan Neguev lawpi llaqtakunatapas.

Chay llaqtakunam karqa Bet-semes llaqta,

Ajalon llaqta hinaspa Gederot llaqta.

Dueñochakururqakutaqmi Soco llaqtatapas,

Timna llaqtatapas chaynataq Gimzo llaqtatapas llaqtachantintakama.

Chay llaqtakunapiqa Filistea runakunañam yachakurqaku.

19 Tayta Diosmi humillachirqa Juda nacionta Israel castapi Rey Acazpa huchanmanta,

nacionpi runakuna munasqankuta ruraptinmi mana harkakurqachu.

Chaynapim Tayta Diosta traicionarurqa.

20 Asiria nacionpa reynin Tiglat-pileser hamuruspanmi mana yanapaspan Rey Acazta ñakarichirqa.

21 Rey Acazmi Tayta Diospa templonmanta,

reypa palacionmanta hinaspa jefekunapa wasinmanta horqomurqa valorniyoq kaqkunata,

Asiria nacionpa reyninman chaykunata qoptinpas manam imapaqpas servirqachu.

22 Rey Acazqa chay ñakariy tiempokunapi kachkaspanpas aswanraqmi traicionarqa Tayta Diosta.

23 Guerrapi venceqnin Damasco llaqtapi taytachakunapaq animalkunata wañuchispanmi nirqa:

—Aram nacion reykunapa taytachankunaqa yanapanmi paykunata,

chaynaqa ñoqapas paykunapaqmi animalkunata wañuchipusaq yanapawananpaq —nispa.

Ichaqa chaykuna rurasqanraykum wichiykurqa,

wichiykurqataqmi Israel casta llapallan runakunapas.

24 Rey Acaz Diospa templonmanta serviciokunata horqoruspanmi pakiparurqa,

wichqarurqataqmi Tayta Diospa templontapas hinaspam Jerusalen llaqtapa llapallan esquinankunapi rurachirqa altarkunata.

25 Juda nacionpi kaq llapallan llaqtakunapa orqonkunapipas rurachirqataqmi capillakunata,

chaykunataqa rurachirqa taytachakunapaq inciensota kañananpaqmi chay rurasqanwanmi piñachirqa abuelonkunapa yupaychasqan Tayta Diosta.

26 Qallariyninmanta tukuyninkama Rey Acazpa wakin rurasqankunaqa chaynataq imaynam kawsasqanqa qellqasqa kachkan Israel nacion hinaspa Juda nacion reykunapa vidanmanta willakuq libropim.

27 Rey Acaz abuelonkuna hina wañukuptinmi pamparurqaku Jerusalen llaqtapi ichaqa pamparqakuqa manam Israel casta reykunapa pampakunan sepulturapichu.

Paypa rantinpim churin Ezequiasña gobiernarqa.