2 Jotanmi Tayta Diospa qayllanpi tukuy imakunatapas allinta rurarqa taytan Uziaspa tukuy rurasqanman hina.

Ichaqa taytan hinaqa manam yaykurqachu Tayta Diospa templonmanqa,

runakunam ichaqa huchallikuyllapi karqaku.

3 Hina Rey Jotanmi hatarichirqa Tayta Diospa templonpa altonpi kaq punkutapas,

Ofel Moqopi kaq murallapa hawanpipas achkallatañam rurachirqa.

4 Juda law orqokunapipas rurachirqataqmi llaqtakunata.

Montekunapipas rurachirqataqmi mana yaykuy atina wasikunatawan torrekunata.

5 Guerrapipas pelearqam Amon runakunapa reyninwan chaymi vencerachikuspan chay watapi qorqa kimsa waranqa kimsa pachaknin kilo qollqeta hinaspa iskay waranqa iskay pachaknin tonelada trigotawan iskay waranqa iskay pachaknin tonelada cebadata.

Hina chaynallatam qorqaku iskay wata qatiqninpipas.

6 Chaynatamá Rey Jotamqa kallpanchakururqa yupaychasqan Tayta Diospa qayllanpi allinta kawsasqanrayku.

7 Jotampa wakin rurasqankunaqa,

guerrapi peleasqankunaqa chaynataq imaynam kawsasqanqa qellqasqa kachkan Juda nacionniyoq reykunapa chaynataq Israel nacionniyoq reykunapa vidanmanta willakuq libropim.

8 Rey Jotamqa iskay chunka pichqayoq watanpim gobiernayta qallaykurqa,

payqa Jerusalen llaqtapim gobiernarqa chunka soqtayoq wata.

9 Abuelonkuna hina Jotam wañukuptinmi pamparurqaku “Davidpa Llaqtan” sutiyoq barriopi.

Paypa rantinpim churin Acazña gobiernarqa.