3 Uziasqa chunka soqtayoq watanpim gobiernayta qallaykurqa,

Jerusalen llaqtapim gobiernarqa pichqa chunka iskayniyoq wata.

Mamanmi karqa Jerusalen llaqtayoq Jecolias sutiyoq warmi.

4 Taytan Amasiaspa tukuy ima rurasqanta hinam Tayta Diospa qayllanpi allin kaqkunata rurarqa.

5 Zacarias kawsanankamaqa Uziasqa Diostam mañakurqa,

Dios respetayta Zacarias entiendechiptinmi mañakusqan tiempokunapi Tayta Dios bendecirqa.

6 Filistea runakunawan Rey Uzias peleaspanmi tuñirachirqa Gat llaqtapa murallankunata,

Jabnia llaqtapa murallankunata hinaspa Asdod llaqtapa murallankunata,

chay Asdod llaqta lawpipas chaynataq Filistea runakunapa yachanan huklaw sitiokunapipas rurachirqam llaqtakunata.

7 Diosmi yanaparqa Filistea runakunapa contranpi peleaptin,

yanaparqataqmi Gur-baalpi yachaq Arabia runakunapa contranpi peleaptinpas chaynataq Meon casta runakunapa contranpipas peleaptinpas.

8 Amon casta runakunam Rey Uziasman pagaqku impuestota hinaptinmi alli-allin reqsisqa kasqan chayarurqa Egipto nacionpa linderonkamaraq,

payqa llumpayllaña atiyniyoqmi rikurirurqa.

9 Rey Uziasqa torrekunatapas rurachirqataqmi Jerusalen llaqtapi,

chaykunataqa rurachirqa “Esquina Punku” sutiyoq punkupa altonpim chaynataq “Qechwaman Qawaq” sutiyoq punkupa waqtanpim,

esquinapa altonpipas rurachispanmi sumaqta takyachirqa.

10 Payqa chunniqpipas rurachirqam torrekunata hinaspam pozokunatapas achkata uchkuchirqa,

chaynataqa rurarqa waqtakunapipas chaynataq pampakunapipas achkallaña animalninkuna kasqanraykum.

Kapurqataqmi chakrapi llamkaq runankunapas,

waqtakunapi kaq uvas huertakunapi llamkaq runankunapas chaynataq wakin huertankunapi llamkaq runankunapas.

Chaykunapiqa kapurqa chacrapi wiñaqkunata kuyasqanraykum.

11 Rey Uziaspaqa kapurqataqmi guerrapi peleaq soldadonkunapas,

paykunam guerraman lloqsiqku reypa secretarion Jehielpa rakisqanman hina chaynataq reypa serviqnin Masiaspa rakisqanman hina,

chay tropakunapa kamachiqninñataqmi karqa reypa churasqan Hananias.

12 Familiakunapa llapallan jefenkunam karqa iskay waranqa soqta pachaknin valeroso soldadokuna.

13 Paykunapa makinpim karqa guerraman riq kimsa pachak qanchisniyoq waranqa pichqa pachaknin alli-allin yachachisqa soldadokuna.

Paykunaqa atiyniyoq tropakuna kaspankum enemigonkupa contranpi reyta yanapaqku.

14 Uziasmi llapallan soldadonkunapaq alistarqa taksa harkachikuna armakunata,

lanzakunata,

cascokunata,

qasqontin-wasa harkaqkunata,

flechana arcokunata hinaspa warakakunata.

15 Jerusalen llaqtapim yachayniyoq runakunawan rurachirqa maquinakunata,

chaykunataqa rurachirqa torrekunapa hinaspa murallakunapa esquinanpi kananpaqmi chaynapi chaymanta flechakunawan flechanankupaq hinaspa hatun rumikunawan chamqanankupaq.

Chay rurasqankutaqa yacharurqakum karu llaqtakunapi yachaqkunapas.

Admirakuypaqta Dios yanapasqanraykum Usiasqa llumpay atiyniyoq rikurirurqa.

16 Aswanqa llumpay atiyniyoq karuspanmi hatun tukuqllaña rikurirurqa wichirunankama.

Yupaychasqan Tayta Diosta traicionaspanmi paypa templonman yaykuspa inciensota kañarqa incienso kañana altarpi.

17 Paypa qepantam yaykururqa sacerdote Azarias pusaq chunka valeroso sacerdotekunawan.

18 Paykunam Rey Uziaspa contranpi sayaykuspanku nirqaku:

—Rey Uzias,

Tayta Diospaq kañana inciensotaqa manam qamchu kañanayki,

chaytaqa rurananku Aaronpa miraynin sacerdotekunallam,

ñoqallaykum chaykuna ruranaykupaqqa sapaqchasqa kaniku.

Lloqsiy kay santuariomanta.

Kay rurasqaykiwanqa yupaychasqayki Tayta Diostam traicionarunki chaymi payqa humillarachisunki —nispa.

19 Rey Uziasmi hapichkarqa incienso qontichinata,

chayta qontichinanpaq hapichkaspanmi piñakururqa sacerdotekunawan hinaptinmi reypa urkunpi lepra onqoy rikurirurqa.

Chayqa pasarurqa Tayta Diospa templonpi sacerdotekuna qawachkaptinmi otaq incienso kañana altarpa waqtanpi kachkaptinmi.

20 Sacerdotekunapa jefen Azariaswan llapallan sacerdotekuna qawaykuptinkum reypa urkunpi lepra kachkasqa chaymi apurawllamanña lloqsichimurqaku templo ukumanta,

paypas apurawllamanñam lloqsimurqa Tayta Dios leprawan castigarusqanrayku.

21 Chaynapim Rey Uziasqa wañukunankama lepra onqoywan karqa hinaspam yacharqa sapaq wasipiña,

Tayta Diospa templonmanta rakisqa kaptinmi nacionpiqa churin Jotamña gobiernarqa runakunapa quejankunata arreglaspan.

22 Qallariyninmanta tukuyninkama rurasqankunataqa Diosmanta willakuq Isaiasmi qellqarqa,

Isaiasqa karqa Amospa churinmi.

23 Abuelonkuna hina Rey Uzias wañukuptinmi pamparurqaku abuelonkunapa sepulturanpa hichpanpi,

chay sepulturaqa tarikurqa reykunapa pampakunan sitiopim,

chaypiqa pamparurqaku:

“Leprawan onqoqmi” nispankum.

Paypa rantinpim churin Jotamña gobiernarqa.