3 Gobiernonpi allintaña takyaruspanmi wañurachirqa taytanta wañuchiq serviqninkunata.

4 Chay runakunapa churinkunataqa manam wañuchirqachu Moisespa qellqasqan yachachikuy libropi Tayta Diospa kamachisqanpi hina.

Tayta Diosmi nirqa:

—Churi-wawankupa huchallikusqanmantaqa amam tayta mamantaqa wañuchinkichikchu nitaqmi tayta-mamanpa huchanmantapas churi-wawankutaqa wañuchinkichikchu.

Ichaqa huchallikusqankumantaqa sapakamatam wañuchinkichik —nispa.

5 Amasiasmi huñurachirqa Juda nacionpi kaqkunata hinaspam castankunaman hina churarurqa Juda casta runakunapa hinaspa Benjamin casta runakunapa kamachiqninkunapaq.

Iskay chunka watayoqmanta hanayman yuparachiptinmi karqa guerrapaq akllasqa kimsa pachak waranqa runakuna,

paykunaqa karqa lanzantinkamam hinaspa harkachikuna armantinkamam.

6 Israel nacionmantapas contratarqam pachak waranqa valeroso soldadokunata,

paykunataqa contratarqa kimsa waranqa kimsa pachaknin kilo qollqewanmi.

7 Diospa runan hamuruspanmi Rey Amasiasta nirqa:

—Reylláy,

Israel casta tropakunaqa amayá qanwanqa lloqsichunchu,

Tayta Diosqa manam yanapachkanchu Israel nacionniyoq runakunataqa nitaqmi yanapanchu Efrainpa llapallan mirayninkunatapas.

8 Sichu chaynata kallpanchakuspa peleaq riptikiqa Diosmi enemigoykikunapa qayllanpi vencerachisunki.

Diosqa atiyniyoqmi yanapasunaykipaqpas chaynataq vencerachisunaykipaqpas —nispa.

9 Hinaptinmi Amasias tapurqa Diospa runanta:

—¿Imatataq rurasaq Israel nacionniyoq tropakunapaq kay kimsa waranqa kimsa pachaknin kilo qollqewanqa?

—nispa.

Hinaptinmi chay Diospa runanñataq nirqa:

—Tayta Diosmi chaymantaqa aswan masta kutichipusunki —nispa.

10 Chaymi yanapananpaq hamuq Efrain casta tropakunata Amasias rakirurqa hinaspam wasinkuman kutirichirqa ichaqa paykunam ancha-anchata piñakururqaku Juda nacionpa contranpi hinaspam wasinkuman kutikurqaku piñasqallaña.

11 Amasias kallpanchakuruspanmi tropankunata pusarqa,

“Kachi Qechwa” sutiyoq sitioman.

Chaypim wañurachirqa Seir Orqo lawpi chunka waranqa soldadokunata.

12 Chaymantapas Juda nacionniyoq runakunaqa presocharurqakum wakin chunka waranqa soldadokunatapas.

Paykunatam qaqaman pusaruspa wikapaykamurqaku hinaptinmi cuerponku ñutupakururqa.

13 Guerraman mana rinankupaq Rey Amasiaspa kutichisqan tropakunañataqmi yaykururqaku Juda nacionpi llaqtakunaman,

paykunaqa Samaria llaqtamanta qallarispam Bet-horon llaqtakama yaykururqaku hinaspam wañurachirqaku Juda nacionniyoq kimsa waranqa runakunata,

tukuy ima kapuqninkutapas apakurqakum achkallataña.

14 Edom tropakuna wañuchimusqanmanta Rey Amasias kutimuspanmi apamurqa Seir Orqo law runakunapa taytachankunata hinaspam diosninta hina churaspan adorarqa,

kañapurqataqmi inciensotapas.

15 Hinaptinmi Tayta Dios piñakururqa Amasiaspa contranpi hinaspam willakuqninta kacharqa kaynata nimunanpaq:

—¿Imanasqataq mañakuchkanki huklaw nacionpa taytachankunataqa?

paykunaqa manam qanmantapas adoraqninkunata librarqachu —nispa.

16 Diosmanta willakuq kaykunata niptinmi reyñataq nirqa:

—¿Rey consejaqpaqchu qamtaqa churarqaykiku?

Upallayá icha ¿wañuytachu munanki?

—nispa.

Rimayta tukuruptinmi Diosmanta willakuqñataq nirqa:

—Chaykuna rurasqaykimantam Diosqa tantearunña wañuchisunaykipaq,

qamqariki consejasqaykunatam mana kasukurqankichu —nispa.

17 Juda nacionpa reynin Amasiasqa hukpa consejonta chaskispanmi comisionta kacharqa Israel nacionpa reynin Joasman,

payqa karqa Jehupa willkanmi otaq Joacazpa churinmi.

Rey Joasmanmá kaynata nichimurqa:

—Hamuy qanwanñataq qawanakuykunaypaq —nispa.

18 Hinaptinmi Israel nacionpa reynin Joasñataq Juda nacionpa reynin Amasiasta nichimurqa:

—Libano montepi wiñaq cardo qoram Libano montepi kaq cedro sachata nichimurqa:

“Warmi churikita qari churiywan casarachiy” nispa.

Ichaqa Libano monte animalmi chayninta pasaspan cardo qorata saruparurqa.

19 Qanmi Edom nacion vencerusqaykimanta alto tukuspa alabakunki.

Hawkallayá wasikipi kakuy.

¿Imanasqataq peleayta munanki qampas chaynataq Juda nacionpi kaqkunapas llakillapi rikurinaykichikpaq?

—nispa.

20 Amasiasmi ichaqa mana kasukurqachu.

Edom nacionpa taytachankunata Rey Amasias mañakusqanraykum Diospuni qoykurqa Rey Joasman.

21 Chayraykum Israel nacionpa reynin Joasqa tupanakurqa Juda nacionpa reynin Amasiaswan Bet-semes llaqtapi,

chay llaqtaqa kachkan Juda nacionpim.

22 Juda nacionniyoq soldadokunata Israel nacion soldadokuna venceruptinmi sapakama wasinkuman lluptikurqaku.

23 Bet-semes llaqtapimá Israel nacionpa reynin Joas presocharurqa Juda nacionpa reynin Amasiasta hinaspam pusarqa Jerusalen llaqtaman.

Amasiasqa karqa Joaspa churinmi otaq Joacazpa willkanmi.

Chay Israel nacionpa reynin Joasmi Jerusalen llaqtapa murallanta taqmarurqa pachak pusaq chunkan metro largoyoqta Efrain sutiyoq zaguan punkumanta esquinapi zaguan punkukama.

24 Paymi apakurqa Diospa templonpi kaq llapa qori-qollqetawan llapa serviciokunata,

chaykunataqa nanachikurqa Obed-edonmi,

apakurqataqmi reypa palacionpi kaq qori-qollqetapas.

Allin reqsisqa wakin runakunata garantiapaq hina Rey Joas pusaspanmi Samaria llaqtaman kutikurqa.

25 Israel nacionpa reynin Joacazpa churin Joas wañukusqanmantam Judá nacionpa reynin Joaspa churin Amasiasqa kawsarqa chunka pichqayoq watataraq.

26 Qallariyninmanta tukuyninkama Amasiaspa wakin rurasqankunaqa qellqasqa kachkan Juda nacionpa hinaspa Israel nacionpa reyninkunapa vidanmanta willakuq libropim.

27 Tayta Diosmanta Amasiaspa rakikusqan punchawmantam Jerusalen llaqtapi yachaqkuna paypa contranpi hoqarikururqaku chaymi Amasiasqa Lakis llaqtaman lluptikurqa aswanqa Lakis llaqtakama qatispankum chaypi wañurachimurqaku.

28 Paypa ayanta caballokunapi apamuspankum abuelonkunapa pampakusqan Juda law llaqtapi pamparurqaku.