Rey Josafat qaqchasqa kasqanmanta
19
Juda nacionpa reynin Josafat hawkalla Jerusalen llaqtapi palacionman kutimuptinmi
2 taripaqnin hamurqa Hananipa churin Jehu.
Paymi karqa Diosmanta willakuq chaymi Josafat sutiyoq reyta nirqa:
—¿Imanasqataq mana allin runakunata yanapanki hinaspa Tayta Dios cheqniqkunata kuyanki?
chayraykum Tayta Dios qampa contraykipi piñakurun.
3 Ichaqa qanmi rurarqanki allinkunata,
Asera sutiyoq mamachakunata kañarachispam kay nacionmanta qechururqanki hinaspam tukuy sonqoykiwan Tayta Diospa yanapakuyninta maskarqanki —nispa.
Juezkunata Rey Josafat churasqanmanta
4 Rey Josafatmi Jerusalen llaqtapi yachachkaspapas watukurqa runankunata,
payqa abuelonkunapa yupaychasqan Tayta Diosman kutirichinanpaqmi rirqa Beerseba llaqtakamaraq hinaspa Efrain law orqokunakamaraq.
5 Churarqam juezkunata Juda nacion llapallan murallasqa llaqtakunapi.
6 Chay juezkunatam nirqa:
—Piensaychik rurasqaykichikpi,
qamkunaqa imatapas arreglankichik manam runakunapaqchu aswanqa Tayta Diospaqmi,
paymi qamkunawan kachkan arreglota ruraptikichik.
7 Qamkunaqa Tayta Diosta manchakuspayá piensaychik imam rurasqaykichikpi,
yupaychasqanchik Tayta Diosqa manam munanchu mana allin ruraq kanaykichikta,
pimanpas sayapakunaykichikta nitaq yanqamanta regalokuna chaskinaykichiktapas —nispa.
8 Rey Josafatqa Jerusalen llaqtapipas churarqataqmi Leviy castakunata,
sacerdotekunata hinaspa Israel casta familiakunapa jefenkunata,
paykunataqa churarqa Tayta Diospa reglamentonkunapi hinaspa quejakunapi juezkuna hina arreglanankupaqmi.
Paykunaqa Jerusalen llaqtapim yacharqaku.
9 Chaymi paykunata rey kamachirqa:
—Tayta Diosta respetaspam cheqapllata rurankichik sumaq sonqollawan.
10 Llaqtakunapi yachaq aylluykichikkunam hamusunkichik ima quejankutapas allichanaykichikpaq chaynapi pipas wañusqa rikuriruq runaqa wañuchisqa kasqanta otaq mana wañuchisqa kasqanta yachanaykichikpaq hinaspa yachachikuykunaman hina ruranaykichikpaq.
Chay yachachikuykunapim kachkan kamachikuykuna,
decretokuna hinaspa reglamentokuna.
Paykunatayá yachachiychik Tayta Diospa contranpi ama huchallikunankupaq,
chaynapitaq Tayta Diospas qamkunapa hinaspa aylluykichikpa contranpi ama piñakunanpaq,
chaynata ruraspaykichikqa mana culpayoqmi kankichik.
11 Sacerdotekunapa jefen Amariasmi kamachisunkichik Tayta Diospa leyninmanta kaqkunapi,
Israelpa churin Zebadiasñataqmi kamachisunkichik reypa leyninmanta kaqkunapi,
Zebadiasqariki Juda ayllu runakunapa kamachiqninmi,
Leviy casta runakunañataqmi kanqa yanapaqnikichik.
¡Kallpanchakuspayá ruraychik!
¡Tayta Diosyá yanapachun allin ruraqkunataqa!
—nispa.