Nabotpa uvas Huertanta Rey Acab qechusqanmanta
21
Jezreel llaqtayoq Nabot sutiyoq runapam kapurqa uvas huertan.
Chay huertanqa karqa Samaria llaqtapi yachasqan Rey Acabpa palacionpa waqtanpim.
2 Chaymi Nabot sutiyoq runata Rey Acab nirqa:
—Palacioypa waqtanpi kasqanraykuyá qoykuway uvas huertaykita yuyukunata tarpunaypaq,
chaypa rantinpiqa qosqayki aswan allin uvas huertatañam,
mana munaptikiqa qollqenpiyá pagasqayki precionta —nispa.
3 Chaymi Rey Acabta Nabot nirqa:
—Amayá Tayta Diospas munachunchu abueloykunapa qowasqan herencia allpata qanman qoykunaypaqqa —nispa.
4 Chaymi Rey Acabqa Jezreel llaqtayoq Nabotpa nisqanwan palacionman kutikurqa llakisqa hinaspa piñasqa,
Nabotmá nimurqa:
—Abueloykunapa qowasqan herencia allpataqa manam qoykimanchu —nispa.
Palacionman chayaruspanmi camanman ustururqa,
perqa lawman muyuriruspanmi mana mikuyta munarqachu.
5 Chaymi warmin Jezabel hamuruspan nirqa:
—¿Imanasqataq llakisqa kachkanki hinaspataq mikuytapas wischupakuchkanki?
—nispa.
6 Chaymi Acabñataq nirqa:
—Jezreel llaqtayoq Nabot sutiyoq runatam nimurqani:
“Uvas huertaykitayá rantikuruway,
mana rantipi munaptikiqa huk uvas huertatayá qoykusqayki” nispa,
ichaqa manam munarqachu:
“Uvas huertaytaqa manam qoykimanchu” nispa.
7 Chaymi warmin Jezabel nirqa:
—Qamqariki Israel nacionpi reymi kanki.
Hatarispaykiyá mikuy chaynataq kusirikuy,
Jezreel llaqtayoq Nabotpa uvas huertantaqa ñoqam qosqayki —nispa.
8 Reina Jezabelmi qosan Acabpa sutinpi cartakunata qellqaruspan Acabpa sellonwan sellarurqa hinaspam aparachirqa Nabotpa yachasqan llaqtapi autoridadkunamanwan allin reqsisqa runakunaman.
9 Carta qellqasqanpim kaynata nirqa:
Runakunatayá kamachiychik ayunanankupaq hinaspayá llapallaykichikpa qayllaykichikman Nabot sutiyoq runata tiyachiychik.
10 Iskay mana allin runakunatayá maskaychik paypa contranpi llullakuspa:
“Diostawan reytam insultarqanki” ninankupaq.
Llaqtamanta hawaman pusaspaykichikmi rumiwan choqaspa wañurachinkichik.
11 Chaymi Nabotpa llaqtanpi yachaq autoridadkuna chaynataq allin reqsisqa runakuna Jezabelpa qellqasqan cartapa nisqanman hina rurarqaku.
12 Ayunopaq runakunata kamachispankumá llaqtapi runakunapa qayllanman tiyachirqaku.
13 Iskay mana allin runakuna hamuruspankum Nabotpa chimpanpi tiyaykurqaku chaymi chay mana allin runakuna llapa runakunapa qayllanpi Nabotpa contranpi llullakuspa nirqaku:
—Nabotmi Diostawan reyta insultarun —nispa.
Chaymi llaqtamanta hawaman pusaruspanku rumiwan choqaspa wañurachirqaku.
14 Chaymantam Reina Jezabelman willachimurqaku:
—Nabot sutiyoq runataqa rumiwan choqaspam wañurachinkuña —nispa.
15 Rumiwan wañurachisqankuta Jezabel yacharuspanmi qosan Acabta nirqa:
—Rispaykiyá Jezreel llaqtayoq Nabotpa huertanta dueñochakamuy,
payqariki manam chay huerta rantikuyta munasurqankichu.
Kunanqa wañurunñam,
manañam kawsanchu —nispa.
16 Jezreel llaqtayoq Nabotpa wañurusqanta Rey Acab yacharuspanmi uvas huertanta dueñochakaramunanpaq rirqa.
17 Chaymi Tisbe llaqtayoq Eliasta Tayta Dios nirqa:
18 —Samaria llaqtapi yachaq Israel nacionpa reyninwan tupaqyá riy,
payqa kachkan Nabotpa uvas huertanpim,
chay huertata dueñochakunanpaqmi rirun.
19 Ñoqa Tayta Diospa nisqaytam payman kaynata ninki:
“¿Nabot sutiyoq runata wañurachichkaspachum kapuqllantapas dueñochakurunkiraq?
Nabotpa yawarninta allqokuna llaqwasqanpim qampa yawarnikitapas allqokuna llaqwanqa” nispa.
20 Chaymi Eliasta Rey Acab nirqa:
—Yaw enemigoy ¿tariruwankichum?
—nispa.
Chaymi Eliasñataq nirqa:
—Arí,
tariruykim,
qamqa Tayta Diospa qayllanpi mana allin rurayllamanñam qokurunki.
21 Chaymi Tayta Dios kaynata nisunki:
“Kunanmi castigota apamusqayki,
llapallan miraynikikunatam tukusaq.
Qampa mirayniki qarikunatam chinkachisaq,
chinkachisaqmá Israel nacionpi sirviente kaqtapas otaq libre kaqtapas.
22 Nabatpa churin Jeroboampa castankunatawan Ahiaspa churin Baasapa castankunata hinam qampa castaykikunatapas chinkarachisaq Israel nacionta huchallichispa piñachiwasqaykirayku.”
23 Jezabelmantañataqmi Tayta Dios kaynata nin:
“Jezreel llaqtapi kaq chakrapim Jezabelpa aychanta allqokuna mikunqa” nispa.
24 “Pipas qam Acabpa aylluykimanta llaqtapi wañuqkunatam allqokuna mikunqa,
campopi wañuqkunatañataqmi ullachkukuna mikunqa” nispa.
25 Rey Acab hinaqa manam pipas karqachu Tayta Diospa qayllanpi mana allinlla ruraqqa,
warmin Jezabelmi umachaq tukuy huchakunata rurananpaq.
26 Acabmi karqa llumpay millakuypaq huchakuna ruraq,
taytacha-mamachakunatam adorarqa Amor casta runakunapa adorasqankuta hina.
Paykunatam Tayta Dios Israelpa mirayninkunapa qayllanmanta wischururqa.
27 Acab kaykunamanta uyariruspanmi pachanta llikipakururqa hinaspam luto pachawan churakuruspa ayunarqa.
Puñurqapas hina chay luto pachantillanmi hinaspam humillasqallaña purirqa.
28 Chaymi Tisbe llaqtayoq Eliasta Tayta Dios nirqa:
29 —¿Rikumurqankichum Acabqa imaynam humillasqa kasqanta?
Qayllaypi humillakusqanraykum kawsanankamaqa manaraq castigasaqchu,
churinpa tiemponpiñam castankunaman chay castigota apamusaq —nispa.