3 —Qori-qollqekipas,

allinnin warmikikunapas chaynataq allinnin churikikunapas ñoqapam —nispa.

4 Chaymi Israel nacionpa reyninñataq nirqa:

—Reynilláy,

qampa nisqaykipi hinam ñoqaqa tukuy imaykunapiwan qampaña kani —nispa.

5 Chay kachasqan runakuna mosoqmanta kutispankum Rey Ben-adadpa nimusqanta kaynata nirqaku:

—Kachamurqaykiqa qori-qollqekita,

warmikikunata chaynataq churikikunata qowanaykipaqmi.

6 Paqarinmi kay horata serviqniykunata kachamusaq hinaptinmi wasikitapas chaynataq serviqnikikunapa wasintapas maskachakunqaku,

llapa kuyasqaykimanta sumaqninta hapispam apamunqaku —nispa.

7 Chaymi Israel nacionpa reynin enteron nacionpi ancianokunata qayachimuspan nirqa:

—Yachasqaykichikpi hinapas chay runaqa mana allinniytam maskachkan,

payqa runankunatam kachamuwasqa warmiykunata,

churiykunata hinaspa qori-qollqeyta qonaypaq chaymi mana harkakurqanichu —nispa.

8 Llapallan ancianokunawan runakunañataqmi nirqaku:

—Amayá paytaqa kasuychu,

amataqyá qoychu mañasusqaykitapas —nispa.

9 Chaymi Rey Ben-adadpa kachamusqankunaman Rey Acab nirqa:

—Nimuychik señor reyniyman:

“Punta kaqpi llapa ima mañakuwasqantaqa qosaqmi,

kunan mañakuwasqantam ichaqa mana atiymanchu” nispa.

Chay kachamusqan runakuna kutispankum willakurqaku imam nisqanta.

10 Chaymi Ben-adad mosoqmanta Acabta nichimurqa:

—Dioskunayá sinchita castigawachun Samaria llaqtata purmarachiptiy ñutu allpallanpas soldadoykunapa putqoyninpi hayparuptinqa —nispa.

11 Chaymi Israel nacionpa reyninñataq Rey Ben-adadta nimunankupaq nirqa:

—Manaraq peleachkaspaqa amayá llumpaytaqa alabakuychu —nispa.

12 Ben-adadmi wakin reykunawan kuska ramadakunapi tomachkarqaku chaymi chay noticiata uyariruspa yanapaqninkunata nirqa:

—Alistakuychik atacanapaq —nispa.

Chaymi llaqtata atacanankupaq alistakurqaku.

13 Ichaqa Israel nacionpa reynin Acabmanmi Diosmanta willakuq asuykuspan nirqa:

—Tayta Diosmi kaynata nin:

“¿Rikuchkankichum kay nana-nanaq runakunata?

Kunanmi qampa makikiman churasaq Tayta Dios kasqayta yachanaykipaq” nispa.

14 Chaymi Acabñataq tapurqa:

—¿Piwantaq makiymanqa churamunki?

—nispa

Chaymi Diosmanta willakuqñataq Tayta Diospa nisqanta nirqa:

—Provinciakunapi jefekunata yanapaq mozokunawanmi —nispa.

Chaymi Acabñataq tapurqa:

—¿Pitaq qallarinqa peleayta?

—nispa.

Hinaptinmi Diosmanta willakuqñataq nirqa:

—Qanmi —nispa.

15 Chaymi provinciakunapi jefekunata yanapaq mozokunata Acab yuparurqa iskay pachak kimsa chunkan mozokunata,

yuparqataqmi Israelpa llapallan mirayninkunatapas chaymi karqa qanchis waranqa soldadokuna.

16 Chawpi punchawta lloqsiptinkum Rey Ben-adadqa kimsa chunka iskayniyoq yanapaqnin reykunawan ramadakunapi sinkallaña tomachkasqaku.

17 Chaymi provinciakunapi jefekunata yanapaq mozokuna puntata lloqsirqaku.

Rey Ben-adadmi runankunata kacharqa yachamunankupaq chaymi chay kachasqan runakuna willarqaku:

—Samaria llaqtamantam tropakuna lloqsimuchkanku —nispa.

18 Chaymi Ben-adad nirqa:

—Guerrapaq otaq mana guerrapaq lloqsimuptinkupas kawsachkaqllatayá hapimuychik —nispa.

19 Llaqtamantamá lloqsiramurqaku provinciakunapi jefekunata yanapaq mozokuna,

paykunapa qepantañataqmi lloqsimurqa llapa tropakuna.

20 Sapakamam enemigon wañuchiyta qallaykurqaku,

Aram soldadokuna lluptiyta qallaykuptinmi Israel soldadokunañataq qatirqaku.

Aram nacionpa reynin Ben-adadmi caballonpi lluptirurqa wakin silladakunapiwan.

21 Israel nacionpa reynin qatispanmi sillada tropakunatawan carretakunata vencerurqa.

Aram nacionniyoq tropakunatamá pasaypaqta vencerurqa.

22 Chaymi Diosmanta willakuqñataq Israel nacionpa reyninman asuykuspa nirqa:

—Kutispaykiyá aswan allintaraq allichakamuy.

Huk wata pasaruptinmi Aram nacion reyqa kutimunqa contraykipi peleaq —nispa.

23 Aram nacionpa reynintam yanapaqninkuna nirqaku:

—Israel casta runakunapa llapa diosninqa orqokunapa diosninmi chaymi ganaruwanchik.

Pampapi peleaspanchikmi ichaqa ganaruchwanchik,

24 chaynaqa kaynatayá ruray:

Reykunata puestonmanta horqospayá paykunapa rantinpiqa churay capitankunataña

25 hinaspayá tropakunatapas pierdemusqayki tropakunata hina alistay,

hina chaynallataqyá kachun caballokunapas chaynataq carretakunapas hinaptinmi pampapi peleaq lloqsispanchik ganasunchikpuni —nispa.

Chaymi Ben-adad kasukuspa paykunapa nisqanta hina rurarqa.

26 Huk wata pasaruptinmi Rey Ben-adad Aram tropakunata huñuruspa Afec llaqtaman hamurqa chaypi Israel casta tropakunawan peleananpaq.

27 Israel casta tropakunapas huñusqa kaspankum mikunankupaq qoqawchakuspa peleaq lloqsirqaku.

Aram tropakunapa chimpanpim Israelpa tropankuna samarurqaku,

paykunaqa karqaku iskay atajo cabrakuna hinallam,

Aram tropakunamanta kaqkunam ichaqa pampapas tapaykuqraq karqaku.

28 Diospa runan hamuspanmi Tayta Diospa nisqanta Israel nacionpa reyninman nirqa:

—Aram runakunam ninku:

“Tayta Diosqa orqokunallapa diosninmi,

manam qechwapa diosninchu” nispa,

chayraykum chay nana-nanaq runakunata makikiman churasaq,

chaynapim yachankichik Tayta Dios kasqayta —nispa.

29 Qanchis punchawmi tropakuna chimpa-chimpa karqaku,

qanchis kaq punchawpim ichaqa peleayta qallaykurqaku hinaptinmi huk punchawllapi Israel tropakuna Aram tropakunata wañurachirqaku pachak waranqata.

30 Puchuqkunam lluptirurqaku Afec llaqtaman,

ichaqa chay llaqtapa murallan tuñiykuspanmi wañurachirqa iskay chunka qanchisniyoq waranqa soldadokunata.

Ben-adadpas llaqtaman lluptiramuspanmi cuarton-cuarton pakaykachakurqa.

31 Chaymi Rey Ben-adadta yanapaqninkuna nirqa:

—Uyarirqanikum Israel nacion reykunaqa kuyapayakuq kasqankuta,

chaynaqa kunanyá luto pachawan pachakurusaqku hinaspataqyá kunkaykumanpas waskata watakurusaqku hinaspayá Israel nacionpa reyninman risaqku,

icharaqpas kawsaykachisunkiman —nispa.

32 Luto pachawan pachakuruspankum waskakunatapas kunkankuman watakuruspa Israel nacionpa reyninman hamurqaku hinaspam nirqaku:

—Serviqniki Ben-adadmi nimusunki:

“Ama wañuchiwaychu” nispa.

Chaymi Israel nacionpa reyninñataq nirqa:

—¿Payqa kawsachkanraqchu?

¡Wawqey hinam payqa!

—nispa.

33 Chay nisqanta allin señalpaq hapispankum apurawman nirqaku:

—Ben-adadqa wawqekim —nispa.

Chaymi reyñataq nirqa:

—Rispayá pusaramuwaychik —nispa.

Rey Ben-adad hamuruptinmi Rey Acab carretanman seqarachirqa.

34 Chaymi Rey Ben-adad nirqa:

—Taytaykimanta taytaypa qechusqan llaqtakunatam kutichipusqayki hinaptinmi Samaria llaqtapi taytaypa rurasqanta hina Damasco llaqtapi negociopaq callekunata ruranki —nispa.

Chaymi Rey Acab nirqa:

—Contratota ruraptinchikmi kacharisqaykiqa —nispa.

Contratota ruraruspanmá kachaykurqa.

35 Diosmanta willakuqmi Diospa nisqanman hina willakuqmasinta nirqa:

—Maqaway —nispa.

Ichaqa manam maqayta munarqachu.

36 Chaymi pay nirqa:

—Tayta Diospa nisqanta mana kasukusqaykiraykum ñoqamanta pasaptillayki leon wañurachisunki —nispa.

Chay runa pasaptinmá leonwan tuparuptin chay leon wañurachirqa.

37 Chaymantam Diosmanta willakuq runaqa huk runawan tuparuspa paytaña nirqa:

—Maqaway —nispa.

Chaymi qoyoyanankama takarurqa.

38 Chaymi Diosmanta willakuq runaqa pantachikunanpaq ñawinta watakuykuspa rirqa reyta ñanpi suyananpaq.

39 Rey pasachkaptinmi qaparispa nirqa:

—Kay serviqnikim guerrapi kachkarqani hinaptinmi huk soldado churachiwarqa huk presota kaynata niwaspan:

“Waqaychay kay runata,

lluptiruptinqa kikikim wañunki paypa rantinpi otaqmi kimsa chunka tawayoq kilo qollqeta paganki” nispa.

40 Ichaqa ruranaykunata kaypi-chaypi rurachkaptiymi chay runa chinkarurqa —nispa.

Chaymi Israel nacionpa reyninñataq nirqa:

—Kikillayki willakuykuspam sentenciakurunki —nispa.

41 Ichaqa ñawin tapakusqanta apurawllamanña horqokuruptinmi rey reqsirurqa chay runaqa Diosmanta willakuq kasqanta.

42 Chaymi Tayta Diospa nisqanta chay willakuq nirqa:

—Wañunanpaq sentenciasqay runata kacharisqaykimantam qamña wañunki paypa rantinpi,

runaykikunañataqmi wañunqa runankunapa rantinpi —nispa.

43 Chaymi Israel nacionpa reyninqa Samaria llaqtapi palacionman ripukurqa llakisqa hinaspa piñasqa.