—Dioskunayá sinchita castigawachun Baalmanta willakuqkunata imaynam rurasqaykiman hina sichu qamtapas paqarin kay horakama mana chaynata ruraruptiyqa —nispa.

3 Chaymi Eliasqa wañuypa patanpiña kasqanta qawakuykuspan ayqekurqa Juda law Beerseba llaqtaman,

chay llaqtapim sirviententa saqerurqa.

4 Payñataqmi chunniqninta pasakurqa huk punchaw puriyta,

chaypim huk retama sachapa sikinpi tiyaykurqa hinaspam wañuyta mañakuspan nirqa:

—Dios Taytalláy,

kunankamallañayá kawsasaq,

ñoqataqa wañurachiwayñayá,

ñoqaqa manam abueloykunamanta aswan allinchu kani —nispa.

5 Chaynata niruspanmi retama sachapa sikinpi siriykuspa puñururqa,

angel hamuruspanñataqmi llachpaykuspa nirqa:

—Hatarispa mikuy —nispa.

6 Chaymi puñusqanmanta rikchariruspa sawnanpa ladonpi rikururqa sansapa hawanpi rurasqa tortillata,

chaypitaqmi kachkasqa aysakupi yakupas,

mikuykuspa tomaykuspanmi kasqallan puñuykurqa.

7 Tayta Diospa angelnin kasqallan hamuspanmi llachpaykuspa nirqa:

—Hatarispa mikuy,

llumpay karuraqmi rinaykiqa kachkan —nispa.

8 Chaymi hatariruspa mikurqa hinaspa tomarqa,

chay mikuywan kallpanchakuykuspanmi tawa chunka punchaw hinaspa tawa chunka tutan rirqa Diospa Orqonwan sutichasqa Horeb Orqoman chayanankama.

9 Chayaruspanmi machaypi samarurqa chaymi Tayta Dios rimapayaspa nirqa:

—Yaw Elias ¿imatataq kaypi rurachkanki?

—nispa.

10 Chaymi Eliasñataq nirqa:

—Llapallan kamachiq Dios Taytalláy,

qanmantam llumpayllataña sientini,

Israelpa mirayninkunam contrato rurasqaykita saqeruspa altarnikikunatapas tuñirachinku.

Qanmanta willakuqkunata espadawan wañurachiptinkum sapallayña puchuruni,

ichaqa ñoqatapas maskawachkankum wañurachiwanankupaq —nispa.

11 Chaymi Tayta Dios nirqa:

—Hawaman lloqsimuspayá ñoqapa qayllaypi orqopi sayay —nispa.

Tayta Dios pasachkaptinmi sinchi-sinchi wayra orqokunata tuñichispa rumikunata ñuturqa ichaqa Tayta Diosqa manam wayrapichu karqa.

Wayra pasaruptinmi pacha kuyuy karurqa,

Tayta Diosmi ichaqa mana chay pacha kuyuypichu karqa.

12 Chay pacha kuyuy pasaruptinmi hamurqa nina,

Tayta Diosmi ichaqa mana ninapichu karqa,

nina pasaruptinmi hamurqa huk sumaq qasilla chiwiwiwiy.

13 Chaymi Elias uyariruspan uyanta tapakuykurqa capanwan,

machaymanta lloqsiramuspanmi machaypa punkunpi sayaykuspa uyarirqa:

—Yaw Elias ¿imatataq kaypi rurachkanki?

—niqta.

14 Chaymi payñataq nirqa:

—Llapallan Kamachiq Dios Taytalláy,

qanmantam llumpayllataña sientini,

Israelpa mirayninkunam contrato rurasqaykita seqaruspa altarnikikunatapas tuñirachinku.

Qanmanta willakuqkunata espadawan wañurachiptinkum sapallayña puchuruni,

ichaqa ñoqatapas maskawachkankum wañurachiwanankupaq —nispa.

15 Chaymi Tayta Dios nirqa:

—Damasco llaqta law chunniqmanyá kutikuy mayninmi hamusqaykita,

chayaspaykim Hazael sutiyoq runata aceitewan tallinki Aram nacionpi gobiernananpaq.

16 Nimsipa willkan Jehu sutiyoq runatañataqmi aceitewan tallinki Israel nacionpi gobiernananpaq,

Abel-mehola llaqtayoq Safatpa churin Eliseotañataqmi churanki qampa rantikipi ñoqamanta willakuq kananpaq.

17 Hazaelpa mana wañuchisqantam wañuchinqa Jehu,

Jehupa mana wañuchisqantañataqmi Eliseo wañuchinqa.

18 Chaywanpas Israel nacionpim puchuchirqani qanchis waranqa runakunata,

paykunaqa manam qonqorakurqakuchu nitaqmi Baal sutiyoq taytachataqa mucharqakuchu —nispa.

19 Elias richkaspanmi Safatpa churin Eliseota tarirurqa chunka iskayniyoq yunta bueyeskunawan yapuchkaqta,

chay yunta bueyeskuna ñawpaqninta riptinmi payñataq yapuchkarqa qepallaña riq yuntawan,

Eliseopa waqtanta pasachkaspanmi Eliasqa capanwan Eliseota capaykachirqa.

20 Chaymi Eliseoqa yapusqan yuntata saqeruspan Eliaspa qepanta kallparqa,

payta hayparuspanmi nirqa:

—Amayá harkakuwaychu,

tayta-mamaymantaraqyá despedikaykamusaq,

chaymantañam qatisqayki —nispa.

Chaymi Eliasñataq nirqa:

—Rispaykiyá kutimuy,

manam harkaykichu —nispa.

21 Kutiramuspanmi yunta bueyesta wañurachirqa,

takllatawan yugota yantaruspanñataqmi aychata yanururqa hinaspam runakunaman mikurachirqa.

Chaynata ruraruspanmi Eliasta qatirikurqa servinanpaq.