—Rey Acabmanyá riy,

ñoqam kasqallan kay allpaman parata chayachimusaq —nispa.

2 Paypa qayllanmanmá Elias rirqa,

llumpay muchuymi kachkarqa Samaria llaqtapi.

3 Rey Acabmi qayachimurqa mayordomon Abdiasta,

Abdiasqa Tayta Diosta llumpay respetaqmi karqa.

4 Tayta Diosmanta willakuqkunata Reina Jezabel wañuchichkaptinmi Abdiasqa iskay machaykunapi pakarurqa pachak willakuqkunata.

Payqa sapa machaypim pakarurqa pichqa chunkatakama hinaspam mikuywan yakuwan kawsachirqa.

5 Rey Acabmá Abdiasta nirqa:

—Pastota maskamunaykipaqyá riy enteron nacionpi llapallan pukyukunamanwan wayqokunaman chaynapi caballokunatapas hinaspa mulakunatapas kawsachinanchikpaq,

mana chayqariki wakintach wañurachisunchik —nispa.

6 Chaymi nacionta muyuriramunankupaq iskayman rakinakururqaku,

Acab huknin ñanninta riptinmi Abdiasñataq huklawninta rirqa.

7 Abdias ñanninta richkaspanmi tuparurqa Eliaswan,

Eliasta reqsiruspanmi qonqoranpa pampaman kumuykuspan nirqa:

—¿Manachum qamqa Tayta Elias kachkanki?

—nispa.

8 Chaymi Eliasñataq nirqa:

—Arí,

ñoqam kani.

Nimuy reyniki Acabta:

“Eliasmi kaypi kachkan” nispa.

9 Hinaptinmi Abdiasñataq nirqa:

—¿Ima huchatataq rurarqani Acabman kachawaptiki wañuchiwananpaq?

10 Yupaychasqanchik Tayta Diosraykum jurani,

enteron nacionpim reyniyqa qamta maskachimusurqanki chaymi llapallanku nirqaku:

“Manam kaypichu” nispanku hinaptinmi nacionkunapi runakunata jurachirqa mana tarisusqaykimanta.

11 Chaychu kunan niwanki:

“Nimuy reynikita:

‘Eliasmi kaypi kachkan’ nispa.”

12 Reyman willaq pasanaykamam Tayta Diospa Espiritun aparusunki mana yachasqay sitioman,

Acabman willaykuptiycha pasamuspa mana tarisuspaykiñataq ñoqata wañurachiwanqa.

Ñoqapas mozo kasqaymantapunim Tayta Diosta respetani.

13 ¿Manachu pipas willasurqanki Diosmanta willakuqkunata Jezabel wañuchichkaptin pachak willakuqkunata iskay machaypi pichqa chunkatakama pakarusqayta chaynataq mikuywan yakuwan kawsachisqayta?

14 Kunanñataqmi niwanki:

“Rispaykiyá willamuy reynikiman:

Eliasmi kaypi kachkan nispa,”

chaynata niptiyqariki ñoqataqa wañurachiwanqach.

15 Chaymi Eliasñataq nirqa:

—Llapallan Kamachiq Kawsaq Tayta Diosraykum jurani,

ñoqaqa paypa serviqnin kasqayraykum paypa qayllanpi kachkani,

kunanpunim yaykusaq Rey Acabman —nispa.

16 Chaymi Abdias rirqa Rey Acabman willamuq,

willaykamuptinmi Acab hamurqa Eliaswan tupananpaq.

17 Eliasta Rey Acab qawaykuspanmi nirqa:

—¿Qamchum kachkanki Israel nacionta chaqwachiq?

—nispa.

18 Chaymi Eliasñataq nirqa:

—Ñoqaqa manam Israel naciontaqa chaqwachinichu,

qanmi chaqwachirqankiqa taytaykipa castankunapiwan Tayta Diospa kamachikusqankunata saqeruspa,

qamkunaqa Baal sutiyoq taytachakunatañam qatirqankichik.

19 Kunanyá Carmelo Orqoman huñuchimuy Israel nacionpi llapallan runakunata,

Baal sutiyoq taytachamanta tawa pachak pichqa chunkan willakuqkunata chaynataq Jezabelpa mikuchisqan Asera sutiyoq mamachamanta tawa pachak willakuqkunatapas.

20 Rey Acabmi Carmelo Orqoman huñurachirqa Israelpa llapallan mirayninkunatawan taytacha-mamachamanta willakuqkunata.

21 Eliasmi llapallan runakunaman asuykuspan nirqa:

—Haykapikamataq iskayrayankichik,

sichu Tayta Dios cheqap Dios kaptinqa paytayá qatiychik,

sichu Baal cheqap Dios kaptinqa paytañayá qatiychik —nispa.

Hinaptinmi runakunaqa mana imatapas nirqakuchu.

22 Chaymi Elias kasqallan runakunata nirqa:

—Sapallayñam Tayta Diosmanta willakuq puchuruni,

Baalmanta willakuqkunam ichaqa tawa pachak pichqa chunkan runakunaraq kachkanku.

23 Chaynaqa apamuwayku iskay bueyeskunata,

hukninta paykuna akllaspayá nakaruspa yantapa hawanman churachunku,

ninataqa amam chaypa ukunpiqa churanqakuchu.

Ñoqapas huknin bueyesta nakaspaymi yantapa hawanman churasaq,

ñoqapas ninataqa manam chaypa ukunpiqa churasaqchu.

24 Qamkunam mañakunkichik diosnikichikta,

ñoqapas mañakusaqtaqmi yupaychasqay Tayta Diosta,

mayqenpas ninata kachaykamuqmi cheqap Diosqa —nispa.

Chaymi llapallan runakuna nirqaku:

—Allinpunim nisqaykiqa —nispa.

25 Chaymi Baalmanta willakuqkunata Elias nirqa:

—Qamkunaqa achkam kankichik chaynaqa qamkunayá puntata bueyesta akllaspa nakaychik hinaspa diosnikichikta mañakuychik,

ichaqa amam ninataqa chaypa ukunmanqa churankichikchu —nispa.

26 Chaskisqanku bueyesta nakaruspankum achikyasqanmantapuni chawpi punchawkama Baal diosninkuta mañakurqaku kaynata nispa:

—¡Taytallayku Baal,

uyariykullawayku!

—nispa.

Ichaqa manam pitapas nitaq ima vozllatapas uyarirqakuchu chayraykum altar rurasqankupa muyuriqninpi tususpa-tususpa muyurirqaku.

27 Chawpi punchawña kachkaptinmi paykunata asipayaspan Elias nirqa:

—Aswantaraqyá qayakuychik,

payqariki diosmi,

ichapas yuyaymanachkan otaq ispakuchkanpas otaq illarunpas,

ichapas payqa puñuchkan mana pipa rikchariykachisqan —nispa.

28 Chaymi aswanraq qaparispanku costumbrenkuman hina espadakunawan hinaspa lanzakunawan cuerponkuta kuchukurqaku yawarpas suturimunankama.

29 Chawpi punchaw pasaruptinmi tardeykuqta ofrenda kañana horakama loco hinaña hinalla qaparkacharqaku ichaqa manam ima vozllatapas uyarirqakuchu,

manataqmi pipas contestamurqachu nitaqmi pipas atiendemurqachu.

30 Chaymi Elias llapallan runakunata nirqa:

—Asuykamuwaychik —nispa.

Hinaptinmi llapallan runakuna asuykurqaku chaymi Tayta Diospa tuñichisqa altarninta allicharurqa.

31 Jacobpa churinkunamanta chunka iskayniyoq ayllukunaman hinamá Elias chunka iskayniyoq rumikunawan altarta rurarqa.

(Jacobtam Tayta Dios nirqa:

“Israelmi sutiki kanqa” nispa.)

32 Tayta Diospaq altarta ruraruspanmi altarpa muyuriqninta yarqacharurqa yaqa iskay chunka litro yaku yaykuqpaq.

33 Yantata churaykuspanmi bueyesta nakarurqa hinaspam chay yantapa hawanman churaykurqa,

34 chaynata ruraruspanmi nirqa:

—Tawa puyñukunaman huntachiychik yakuta hinaspa yantapa hawanpi kaq nakasqa bueyesman hichaychik —nispa.

Hicharuptinkum Elias nirqa:

—Yapatawan hichaychik —nispa.

Chaywanpas nirqaraqmi yapatawan hichanankupaq chaymi kimsa kutikama hicharqaku.

35 Yakum altarmanta lloqllarispan yarqamanpas huntarurqa.

36 Wañuchisqa animalta kañananpaq hora chayaramuptinmi Diosmanta willakuq Elias altarman asuykuspa nirqa:

—Abrahampa,

Isaacpa hinaspa Israelpa yupaychasqan Dios Taytalláy,

Israel nacionpi Dios kasqaykitayá kunan reqsichikuy,

reqsichiytaqyá ñoqapas serviqniki kasqayta chaynataq kamachiwasqaykiman hina kaykuna rurasqaytapas.

37 Uyariykuwayá Diosnilláy chaynapi kay llapa runakunapas qamqa Tayta Dios kasqaykita yachanankupaq hinaspa karunchasqa sonqonkutapas kutirichimunaykipaq —nispa.

38 Chaymi Tayta Diospa ninan wichiykamuspan bueyesta,

yantata chaynataq rumikunatapas chinkarachirqa,

chakirachirqataqmi yarqapi yakutapas.

39 Chaymi llapallan qawaq runakuna qonqoranpa pampaman kumuykuspa nirqaku:

—Tayta Diosmi cheqap Diosqa,

Tayta Diosmi cheqap Diosqa —nispa.

40 Chaymi Elias nirqa:

—Baal taytachamanta willakuqkunata hapiychik,

amayá hukllapas lluptichunchu —nispa.

Hapiruptinkum Elias pusarqa Cison Wayqoman hinaspam chaypi wañurachirqa.

41 Chaymantam Rey Acabta Elias nirqa:

—Mikumuy,

tomamuy llumpay parapa qaparisqantam uyarichkani —nispa.

42 Acabmi pasarqa mikuq hinaspa tomaq.

Eliasñataqmi rirqa Carmelo Orqopa puntankama,

chaypim chuychuykuspa moqonkunapa chawpinman uyanta kumuykachirqa.

43 Hinaspam serviqninta nirqa:

—Rispaykiyá qawamuy lamar qocha lawta —nispa.

Sirvientenmi lamar qocha lawta qawamuspan nirqa:

—Manam imatapas rikumunichu —nispa.

Hinaptinmi Eliasñataq nirqa:

—Qanchis kutikama rispayá qawamuy —nispa.

44 Qanchis kaq kutipiñam sirvienten nirqa:

—Runapa maki plantan hina sayayniyoq puyutam lamar qochamanta seqamuqta rikuramuni —nispa.

Chaymi Eliasñataq nirqa:

—Rispaykiyá Rey Acabman nimuy:

“Carretaykiman caballokunata wataspayá ripuy para mana harkasunaykipaq” nispa.

45 Rey Acab carretanpi Jezreel llaqtaman richkaptinmi cielokunata sinchi wayrayoq yanay-yanay puyukuna tapaykurqa.

46 Eliasta Tayta Dios kallpanchaykuptinmi pachanta allichakuykuspan Jezreel llaqtaman kallparqa hinaspam Rey Acabmantapas puntataraq chayarurqa.