Eliasmi willakun parapa usyananmanta
17
Galaad law Tisbe llaqtayoq Eliasmi Rey Acabta nirqa:
—Israelpa yupaychasqan Tayta Diosraykum jurani,
ñoqaqa paypa serviqnin kasqayraykum paypa qayllanpitaq kachkani:
“Kay watakunapim para mana kanqachu nitaqmi sullayllapas-sullamunqachu ñoqa ninaykama” nispa.
2 Tayta Diosmi Eliasta nirqa:
3 —Intipa qespimunan lawman rispaykiyá Jordan Mayupa chimpan Querit Wayqopi pakakamuy.
4 Wayqomantam yakuta tomanki,
mikuytañataqmi kamachisqayman hina cuervo sutiyoq alton pawaqkuna apamusunki —nispa.
5 Tayta Diospa kamachisqanman hina Elias ruraspanmi rirqa Jordan Mayupa chimpan Querit Wayqopi yachananpaq.
6 Chaymi cuervokuna tantatawan aychata apamuqku sapa tutapaytawan sapa tardeykuqta,
yakutañataqmi tomarqa wayqomanta.
7 Nacionman para mana chayamusqanraykum manapas unaypi wayqopi yaku chakirurqa.
Viudapa wasinpi Elias samakusqanmanta
8 Eliastam Tayta Dios nirqa:
9 —Hatarispaykiyá Sidon law Sarepta llaqtaman riy hinaspayá chaypi yachamuy,
chaypim viudata kamarachiniña mikuchisunaykipaq —nispa.
10 Eliasmi Sarepta llaqtaman rispan chayarurqa llaqtapa punkunman hinaspam yanta pallakuchkaq viudata rikururqa,
payta qayaykuspanmi nirqa:
—Ama hina kaspaykiyá aysakupi as yakuta aparamuway tomaykunaypaq —nispa.
11 Yaku apamuq pasaptinmi chay viudata qayaspan nirqa:
—Apamuwaytaqyá tantatapas —nispa.
12 Chaymi viudañataq nirqa:
—Yupaychasqayki kawsaq Tayta Diosraykum jurayki,
tantayqa manam kapuwanchu,
kapuwaspaqa-kapuwachkan tinajaypi putqoy harinawan puyñuchaypi pisi aceitellañam,
kunanmi huñuchkarqani iskay kimsa yantakunata chaywan ñoqapaqwan wawaypaq tantarunaypaq hinaspa mikuykuspa wañukunaykupaq —nispa.
13 Eliasmi nirqa:
—Amayá manchakuychu,
rispaykiyá ruraramuy nisqaykiman hina ichaqa ñoqapaqyá puntata ruraykapamuway tortillata,
chayta aparamuwaspaykiñam,
qampaqwan wawaykipaqa ruramunki.
14 Israelpa yupaychasqan Tayta Diosmi nin:
“Tinajaykipi harinapas chaynataq puyñuchaykipi aceitepas manam pisinqachu ñoqa Tayta Dios allpaman parata chayachimunaykama” nispa.
15 Chaymi viudaqa ruraramurqa Eliaspa nisqanman hina chaynapim viudapas,
Eliaspas chaynataq viudapa familianpas unay tiempo mikurqaku.
16 Tinajapi harinapas manam tukurqachu,
manataqmi pisirqachu puyñuchapi aceitepas.
Chaynamá karqa Eliaswan Tayta Diospa nichisqanpi hina.
17 Wasiyoq viudapa wawan llumpayllataña onqoruptinmi samayninpas chinkarurqaña.
18 Chaymi viudañataq Eliasta nirqa:
—¿Imatataq kayta ruraruwanki,
Diospa runan?
¿Mana allin rurasqaymanta yuyarichiwaspa waway wañuchinaykipaqchu hamurqanki?
—nispa.
19 Chaymi Eliasñataq nirqa:
—Apamuy wawaykita —nispa.
Mamanpa brazonmanta chaskiykuspanmi altospi samasqan cuartoman aparurqa,
camanman churaykuspanmi
20 Tayta Diosta mañakuspan nirqa:
—Yupaychasqay Dios Taytalláy ¿samakusqay wasipi viudatapas llakichinkichum wawanta wañurachispayki?
—nispa.
21 Wawapa hawanman kimsa kutikama pakchakuykuspanmi Tayta Diosta mañakurqa kaynata:
—Yupaychasqay Dios Taytalláy,
ruegakuykim kay wawapa vidanta kasqallan kutiykachinaykipaq —nispa.
22 Eliaspa mañakusqanta Tayta Dios uyariruspanmi wawata kawsarirachirqa.
23 Chaymi wawata Elias marqarikuykuspa altospi cuartomanta uraykarachirqa,
mamanman qoykuspanmi nirqa:
—Kayqaya wawaykiqa kawsarirun —nispa.
24 Chaymi viudañataq nirqa:
—Kunanqa yachaniñam cheqap Diospa runan kasqaykita,
yachanitaqmi Tayta Diospa palabran rimasqaykipas cheqap kasqanta —nispa.