2 —Ñoqam pampamanta hoqarichkaq hina Israel nacionpi churarqayki runaykunapa jefen kanaykipaq ichaqa qampas Jeroboampa kawsasqanman hina kawsaspaykim Israel nacionpi runaykunata huchallirachinki,

chay huchallikusqankuwanmi piñarachiwanku.

3 Chaymi qamtawan castaykikunata chinkarachisaq,

Nabatpa churin Rey Jeroboampa castankunawan rurasqayta hinam rurasaq.

4 Castaykimanta llaqtapi wañuqkunatam allqokuna mikunqa,

campopi wañuqkunatañataqmi ullachkukuna mikunqa.

5 Rey Baasapa wakin rurasqankunaqa chaynataq mana manchakuspa rurasqankunaqa Israel nacion reykunapa vidanmanta willakuq libropim qellqasqa kachkan.

6 Abuelonkuna hina Rey Baasa wañuruptinmi Tirsa llaqtapi pamparurqaku,

paypa rantinpim gobiernarqa churin Ela sutiyoq runaña.

7 Hananipa churin Jehu sutiyoq willakuqwanmá Tayta Dios rimachirqa Rey Baasapa contranpiwan castanpa contranpi,

chaynataqa rimachirqa Rey Baasapas rurasqankunawan Jeroboampa castankuna hina Tayta Diosta piñachisqanraykum chaynataq paypa qayllanpi tukuy mana allinkuna rurasqanraykum chaynataq Rey Jeroboampa castankunatapas tukurusqanraykum.

8 Juda nacionpi Rey Asa iskay chunka soqtayoq watamanña gobiernachkaptinmi Baasapa churin Ela gobiernarqa Tirsa llaqtapi,

payqa iskay watam gobiernarqa Israel nacionpi.

9 Guerrapaq lamitad carretakuna kamachiq Zimri sutiyoq serviqninmi Rey Elapa contranpi hoqarikururqa,

Rey Elaqa Tirsa llaqtapim mayordomon Arsapa wasinpi tomaspa sinka kachkarqa.

10 Chaymi Zimri yaykuruspan wañurachirqa,

paytaqa wañurachirqa Juda nacionpi Rey Asa iskay chunka qanchisniyoq watamanña gobiernachkaptinmi,

Zimriñam Rey Elapa rantinpi gobiernarqa.

11 Zimrim gobiernayta qallaykuspallan Rey Baasapa lliw castankunata wañurachirqa,

manam puchuchirqachu huk qaritapas nitaq reclamaq aylluntapas nitaq pi amistadnintapas.

12 Baasapa lliw castankunatamá Zimri tukururqa Baasapa contranpi Tayta Dios willakuqnin Jehuwan willachisqanpi hina.

13 Rey Baasawan churin Rey Elam tukuy huchallikusqankuwan Israel casta runakunata huchallirachirqaku,

taytacha-mamachakuna rurasqankuwanmá yupaychasqanku Tayta Diosta piñarachirqaku.

14 Rey Elapa wakin rurasqankunaqa Israel nacion reykunapa vidanmanta willakuq libropim qellaqasqa kachkan.

15 Juda nacionpi Rey Asa iskay chunka qanchisniyoq watamanña gobiernachkaptinmi Rey Zimriqa gobiernayta qallaykurqa,

payqa qanchis punchawllam gobiernarqa Tirsa llaqtapi,

Filistea runakunapa llaqtan Gibetontam Israel tropakuna atacarurqakuña.

16 Campamentopi kaq runakunam yacharurqaku Rey Elata Zimri wañurachisqanta chaymi reypaq chay punchawllapi churarurqaku llapallan tropakuna kamachiq Omri sutiyoq runata chaynapi payña Israel nacionpi rey kananpaq.

17 Chaymi Omriqa Israel nacion llapallan tropakunapiwan Gibeton llaqtamanta pasaspa Tirsa llaqtataña atacarqaku.

18 Llaqta vencesqaña kasqanta Zimri qawaykuspanmi palaciopa ukunman hinakururqa hinaspam chaypiña kachkaspa kañaykurqa chay palaciota,

chaypimá ruparuspa wañururqa.

19 Payqa wañururqa Tayta Diospa qayllanpi llapa huchakuna rurasqanraykum,

payqa Israel nacionpi runakuna huchallichiq Jeroboampa hucha rurasqanman hinam kawsarqa.

20 Zimripa wakin rurasqankunaqa chaynataq Elapa contranpi hoqarikusqanqa Israel nacion reykunapa vidanmanta willakuq libropim qellqasqa kachkan.

21 Chaymantapunim Israel nacion runakuna iskayman rakikururqa.

Wakinmi Ginatpa churin Tibnita gobiernoman churayta munarqaku,

wakinñataqmi munarqa Omri churayta.

22 Omripa partidonkunam ichaqa ganarurqaku Tibnipa partidonkunata chaymi Tibni wañuruptin Omriña gobiernarqa.

23 Juda nacionpi Rey Asa kimsa chunka hukniyoq watamanña gobiernachkaptinmi Israel nacionpi Omri gobiernayta qallaykurqa.

Payqa chunka iskayniyoq watam gobiernarqa Israel nacionpi,

chay watakunamantam soqta watata Tirsa llaqtapi gobiernarqa.

24 Rey Omrim Semer sutiyoq runamanta Samaria moqota rantirurqa soqta chunka soqtayoq kilo qollqewan,

chay- pim llaqtata ruraruspa suticharqa Samariawan,

Samaria moqopa ñawpaq dueñon Semerpa sutinwanmi suticharqa.

25 Omripas Tayta Diospa qayllanpim mana allinta rurarqa,

paymanta ñawpaq tiempokunapi gobiernaqkunamantapas aswanraqmi rurarqa.

26 Israel nacion runakunata huchallichiq Jeroboampa rurasqanman hinam paypas kawsarqa.

Jeroboamqa karqa Nabatpa churinmi.

Omriqa taytacha-mamachakunata rurasqanwanmi Israelpa yupaychasqan Tayta Diosta piñachirqa.

27 Omripa rurasqankunaqa chaynataq mana manchakuspa rurasqankunaqa Israel nacion reykunapa vidanmanta willakuq libropim qellqasqa kachkan.

28 Abuelonkuna hina Rey Omri wañuruptinmi Samaria llaqtapi pamparurqaku,

paypa rantinpim gobiernarqa churin Acab.

29 Juda nacionpi Rey Asa kimsa chunka pusaqniyoq watamanña gobiernachkaptinmi Omripa churin Acab Israel nacionpi gobiernayta qallaykurqa.

Samaria llaqtapi yachaspanmi gobiernarqa iskay chunka iskayniyoq wata.

30 Omripa churin Acabmi Diospa qayllanpi mana allinta rurarqa,

paymanta ñawpaq tiempopi gobiernaqkunamantapas aswanraqmi rurarqa.

31 Nabatpa churin Jeroboampa hucha rurasqanmantapas aswanraqmi rurarqa.

Sidon llaqtapi Rey Et-baalpa churin Jezabelwanmi casarakururqa hinaspam Baal taytachata servispa adorarqa.

32 Baal taytachapaqmi altarta rurachirqa,

rurachirqataqmi templontapas Samaria llaqtapi.

33 Rey Acabqa rurachirqataqmi Asera sutiyoq mamachatapas,

chaykunawanmi ñawpaq tiempopi Israelpi gobiernaqkunamantapas aswanraq Israelpa yupaychasqan Tayta Diosta piñachirqa.

34 Acabpa tiemponpim Bet-el llaqtayoq Hiel sutiyoq runa mosoqmanta hatarichirqa Jerico llaqtata,

cimientonta churarachiptinmi piwi churin Abiram wañururqa,

llaqtapa punkunta churarachiptinñataqmi sullka kaq Segub sutiyoq churin wañururqa,

chaynapimá Nunpa churin Josueywan Tayta Diospa nichisqan cumplikurqa.