Pin wongke ini ri yupone yina ofa
21
Empo Jisas yereri ungklama woneni,
wu yulu uma nunali romaula wamfafai yukaine ofa noneni naile panro bokis empo romaulaa yeliye tempol.
2 Ka wu yulu pin empo ini ri yupone wu namo yanpalo romaula plainrane panro bokis empo romaula.
Pin namo ommo onnele.
3 Ka Jisas yirengkle nu nanrona,
“Ki kire mi alwone pone,
pin namo yanpalo romaula yumalo uma mingklari empo nailene.
4 Uma mingklari namo nenru ploli pitiri nro empo ommo mingklari none nunaline yukaine ofa noneni.
Ka pin namo yina ompla rilele empo wone yunaye,
ka fei yuna plola ese yuꞌpu ompla woneni.”
Ommo ese nuku taim empo pike pekimo
(Matyu 24.1-2; Mak 13.1-2)
5 Disaipol plai woneni nulu tempol ka nire nanrona,
“Nu nuꞌpu roma upupu ka ommo plai empo nu uma nenrune yukaine ofa paiyi God ka samo mewpanrone tempol ka nangke paiyi uporo wamo.”
6 Ka Jisas yirengkle nu nanrona,
“Ki kire koplo mi empo ompla pone pulupe mee,
kaire wongke ese yolowi nu ese nemneki roma kenkenra ka wongke ese fei raune wongke riri,
ese onne!”
Jisas yoplo eni ese yolowi
(Matyu 24.3-14; Mak 13.3-13)
7 Ka nu naline Jisas nanrona,
“Tikse,
moule rongkele sa ommo namo ese nemei?
Ka ompla fika ese yuku nanrona ompla namo sa ekleneye ese yolowi?”
8 Ka Jisas yirengkle nu nanrona,
“Pone konsamo pulu nu uma ese rarnale pone mi plai.
Uma pinuma mingklari ese noloni noula kinini ka nire nanrona,
‘Ki kone mana namo,’
ka ‘Taim sa yolowi eklene pu.’
Uma nanrona,
pone fai pupelepe.
9 Empo pone pupu mi empo iim wamo ka nu uma ese nakle gapman nopune,
pone fa pumpe ka folworipe.
Ommo namo ese nemei se,
ka las de ese fei faflai yolowi.”
10 Ka wu yirengkle nu nanrona,
“Kantri ese nakle kantri nopu.
Nu kingdom plai ese nakle kingdom plai nopu.
11 Klai wamfafai ese nemei ka mokoi plai ommo fai none ese samo pekimo ka sik wamfafai ese nemei.
Ommo namo ese nemei mokoi mingklari empo pike.
Ka ommo fai nangke uma nemnum wamo ese nemei.
Ka uma ese nulu ommo wongkwongkeni nemi.
12 “Ommo mingklari namo ese nemei,
ka emen nu ese nukalneire pone ka nape pone eni wamo.
Nu ese kotim pone monre empo mow koli empo nu Juda fai nesapune ka nenru pone kalabus.
Nu ese numale pone paipi peli ungklamplen empo nu king ka uma empo fa nulune gapman,
nu ese nangke ommo namo pone,
empo fika,
pone fa pupenepe ki.
13 Ka ommo namo ese naine yukaine rokoi fai pone pirengklepe nu miuporo empo God.
14 Ka pone fai pumpe,
ka paipe wol mingklaripe mi rongkele ese pone pirengkle nu.
Pone wolpumalo ommo namo.
15 Empo fika,
ki kone ese kape pone ila uporo ka mi rongkele ese pone poplo,
ka nu uma empo kotim pone ese fei nangklumo mi poneni ka mi empo nu ese fei yumalo mi poneni.
16 Moka nangka ka inrani ka oli oikenra poneni ka uma foli poneni re ese nina pone paipi mew empo nu uma ese nangke fafaile pone.
Ka nu uma empo fa nangke fafaile pone ese nuꞌflo pone plai rili.
17 Uma pinuma mingklari wamo ese wolneni pone,
empo fika pone fai pupenepe ki.
18 Ka ila para wongke poneni ese fei fongklo ka firpalo.
19 Pone samo peli kelo sa pone ese pem laip fai waiye nanrona nanrona.
Jisas yoploye taunwamo Jerusalem ese fafaile wamo
(Matyu 24.15-21; Mak 13.14-19)
20 “Empo pone pulu nu iimuma neli mamane Jerusalem,
pone ese namale nanrona taim empo nu ese neklinimane Jerusalem sa yolowi ekleneye.
21 Empo taim namo nu uma fai naine distrik Judia nemropu panri naine koii alwola.
Nu uma empo fai naine taun wamo namo nemropu panro moile ka nu uma empo naine moile ese fei neri taun wamo namo.
22 Empo fika taim namo,
ommo fafaile wamo ese nemei nuku ommo mingklari yukaine mi nu neꞌre wiye buk empo God.
23 Taim namo ese samo fafaile wamo empo nu pinmana empo rengkinine ka nu pinmana empo naline roro kongkom.
Ommo fafaile namo ese nemei pike ka God ese wolpun neni wamo uma namo.
24 Nu uma empo fai nangke fafaile,
nu iimuma ese bainat nokle ka nu ese rili,
ka plai nu ese numale nakle painri ka nirample naine kantri plai empo pike ka nu neinangklu nu ese fei noloni kore kantri noneni.
Nu uma fei Juda ese nulune Jerusalem ka poinpanrene paiyi la taim God wone yaulengkle nu ese nulune mokoi namo ese pekimo se.
Kingke, Auna empo Mana ese yolowi kore
(Matyu 24.29-31; Mak 13.24-27)
25 “Ka pone ese pulu ommo wongkwongkeni ese nemei kaire,
kali ka kikla.
Uma empo pike ese num wamo ka nu ese fei namale ompla fika nu ese nangke empo nu nupu fulu wamo pikali ukuye.
26 Nu uma mingklari ese nulu ka nu ese wola fafaile ommo ese nemei pike mee,
ka nu ese num wamo nama kauka ka ri malma,
empo fika,
ommo kelo mingklari empo nemi ese folwori.
27 Ka taim namo nu ese nulu Auna empo Mana yuna kelo ka glori wamo ese yolo plau kupu.
28 Empo ommo namo nemeine,
pone pemei peli ka pinrapari pulu,
empo fika taim empo God yuꞌpu pone kore sa yolowi eklene pu.”
Pone konsamo namale mi empo ilo fik
(Matyu 24.32-35; Mak 13.28-31)
29 Ka wu yirengkle nu mi riri wongke nanrona,
“Pone pulu ilo fikb namo ka ilo mingklari.
30 Empo nu kolorine pone namale nanrona,
moulyufu sa yolowi ekleneye.
31 Won ese nanrona nro empo pone pulu ommo namo nemeine,
pone ese namale nanrona kingdom empo God sa yolowi eklene pu.
32 “Ki kire mi alwone pone,
nu uma empo naimele ese fei rili,
nu ese nulu ommo namo se sa nu ese rili.
33 Nemi ka pike ese pekimo,
la mi empo ki sa ese fei pekimo.
Nu disaipol konsamo nulu
34 “Pone poo,
pone ese fei paikolpo mii kelo yukaine wain ka bia ka pone pemfolwori,
ka pone ese fei wolape ommo mingklari empo pike ese nangke pone paipe uporo.
Pone pangke nanrona sa taim namo ese yolowi yem pone yukaine ommo kulu firyolo misiri.
35 Nanrona fane pone poo.
Empo fika ompla namo ese yemei nu uma empo pike mee.
36 Pone konsamo pulu ompla namo ningki kaire,
pesapupe ese pone peli kelo empo ommo namo nemei pone,
ka pone ese peli namaplen empo Auna empo Mana.”